YOSUA 24 - KITAB NU TUMPU ALLA LELE MA'IMAI'

I Yosua notataemo hi mian nu Israel kiijo' i Sikhem

¹ I Yosua nomposihukmo iwi-iwi' aha tulunan nu bansa Israel kiijo' i Sikhem, lantas nompokaumo to tu'a-tu'anyo, to pola-polaya', mian kopian ka' to sulu-suludadu anu matangkas na pangkatnyo da toka mae mangadap. Sahingga tinokamo na aha nangadap hi Tumpu Allah.

² Lapas aijo' i Yosua notataemo hi aha iwi-iwi', “Potombihing mae apaa na anu pinoto'imo nu Tumpu, Tumpu Allah nu Israel hi belemiu, ‘Naipuan mae mompolee' nu belemiu jinojoongmo i santoa nu Kaunyo Efrat, ka' nonsombahmo to pilo-pilogot. Samian anu aijo' hi aha aijo'mo i Terah, tuuma i Abraham ka' i Nahor.

³ Lantas ingalang-Ku na i Abraham tuuma nu mompolee' miu aijo', lengkat mae i lipu' anu i santoa nu Efrat aijo' ka' nonsai ia da mamba monsongkohi iwi-iwi' na lipu' nu Kana'an. Aku nombee'imo da nanjoo' na lee'nyo. Momonanyo anu binee'-Ku hi ia i Ishak,

⁴ lantas tinoka hi Ishak binee'an-Kumo ua'aha na anak, aijo'mo i Yakub ka' i Esau. Binee'an-Ku na i Esau bungkutnyo nu Edom da tano' aijo' iamo na tumpunyo, panyo i Yakub tuuma nu mompolee' miu aijo', nolalinmo namba i Mesir, tiba to ana-anaknyo.

⁵ Lapas aijo' sinaing-Kumo na i Musa ka' i Harun, ka' nomobee'imo balaa' daka' i Mesir, lantas Aku nonsabatakonmo belemiu lengkat mae ikiijo'.

⁶ Binoang-Kumo na mompolee' nu belemiu aijo' nosabat lengkat mae i Mesir, lantas aha mian nu Mesir nololoi'mo mae aha tiba kareta anu bau pahampate ka' suludadu anu sinumake' i ajahan. Ka' salatan mompolee' nu belemiu aijo' tinokamo i Ambai Gelagah,

⁷ aha notataemo nompoita tulung hi beleng-Ku. Sahingga tampat i olot nu aha tiba to mia-mian nu Mesir aijo' pinotimbaling-Kumo da pinintung, ka' kinuluban-Kumo na aha mian nu Mesir haha aijo' nu ambai sahingga aha iwi-iwi' i nolomosmo. Sinumbu'mo miu iwi-iwi' apaa na anu binaung-Kumo kiijo' i Mesir. Pinin hondo na belemiu jinojoong i padang bone'.

⁸ Lantas binoang-Kumo na belemiu i lipu' nu aha mian Amori anu jojoong i sasu kabete'an Kaunyo nu Yordan. Aha nompahampateakonmo belemiu panyo pino'untung-Kumo na belemiu nahampate nongewa aha. Belemiu nompatundu'mo lipu' nu aha, ka' i hopu'an-Kumo na aha.

⁹ Lantas tomundo nu Moab, aijo'mo i Balak anak i Zipor, nongewamo belemiu. Ia nonsaimo mian namba hi Bileam anak i Beor ka' nongkakase da i Bileam mongkutuki belemiu.

¹⁰ Panyo Aku madi' nongala-ala pongka'oho' i Bileam, sahingga ia nombalakatimo belemiu. Sumo aijo' na Aku nomposalamatmo belemiu da boli nohumpak balaa' hi Balak.

¹¹ Lapas aijo' belemiu notaapmo i Kaunyo nu Yordan, ka' tinokamo i Yerikho. Aha mian nu Yerikho nompahampateakonmo belemiu sumo aitu mule' na aha mian nu Amori, mian nu Feris, Kana'an, Het, Girgasi, Hewi tiba mian nu Yebus. Panyo belemiu pino'untung-Kumo na nahampate nongewa aha iwi-iwi'.

¹² Tempo'nyo belemiu nambamo nontumbuhi aha, pinolingung-Kumo na aha ka' nabuhukmo sahingga ua'aha na tomundo nu Amori haha aijo' nopalaimo nompala'i belemiu. Misa' bajak nu belemiu ka' mule' misa' pana' nu belemiu na nompo'untung belemiu nahampate.

¹³ Tano' anu binee'-Kumo hi belemiu, ingalamo nu belemiu mau madi' kinolawe apa-apaa. Ka' kota-kota anu binee'Kumo hi belemiu misa' belemiu na nombau. Panyo tempo' uuka aiya belemiumo na jinojoong ikiijo', ka' belemiumo na nongkaan bua' nu anggur ka' bua' nu zaitun padahan misa' belemiu na nonsu'an.’ ”

¹⁴ “Jadi, uuka aiya,” koonyo mule' i Yosua, “o'adati na Tumpu. Opalesaya ka' o hongo-hongo na Ia nu kinyonyoa anu totu-totu'u ka' boli panggaga. Bolimo mompalesaya to pilo-pilogot sangga'at anu sinombah nu mompolee' miu naipuan mae tempo'nyo i Mesopotamia ka' i Mesir. Anu opalesaya ka' o hongo-hongo ola samata-mata Tumpu.

¹⁵ De belemiu madi'mo palesaya ka' mohongo-hongomo Tumpu poto'i mae nasa-nasa sinaa aiya ihe na anu opalesaya ka' o hongo-hongo nu belemiu; hi to pilo-pilogot sangga'at anu sinombahmo nu mompolee' miu kiijo' mae i Mesopotamia naipuan mae kabai hi to pilo-pilogot mian nu Amori anu lipu' nu aha kinajojoonganmo nu belemiu uuka aiya. Panyo kami – aku tiba kami salaigan – mompalesayamo ka' mohongo-hongomo samata-mata hi Tumpu.”

¹⁶ Sahingga aha mian nu Israel haha aijo' nontaamimo, “Kami madi' hondo-hondo mompala'i Tumpu lantas mompalesayamo ka' mohongo-hongomo to pilo-pilogot sangga'at!

¹⁷ Tumpu Allah-nto na nompobebasmo to mompo-mompolee'to tiba kita da madi'mo binotuanan kiijo' mae i Mesir. Kita nontoamo anu okabangangi binau nu Tumpu. Saja' Tumpu nonjagai kita iyayamae na anu ilajangantomo iwi-iwi', notulu hi iwi-iwi' na lipu' nu mian anu i salipu'an.

¹⁸ Ka' salatan kita ninsoopmo i lipu' aiya Tumpu nolaa'mo mian nu Amori iwi-iwi' anu jojoong i aiya. Jadi kami palesayamo ka' mohongo-hongomo Tumpu, kalana Iamo na Tumpu Allah-nto.”

^19-20 Lantas i Yosua notataemo, “Panyo belemiu kugantang madi' moko ala palesaya ka' mohongo-hongo Tumpu, kalana Ia Tumpu Allah anu susi'. Anu Ola Sa'a-sa'angu'nyomo. Ia madi' mongka'oho' ko anu mongkakanai. De belemiu mompala'imo Ia ka' palesayamo ka' mohongo-hongomo hi to pilo-pilogot sangga'at, Ia madi'mo mongampuni dosa' nu belemiu. Panyo ola ahi', Ia mongewamo ka' mohukum belemiu. Ia mompateimo belemiu, maumo naipuan mae Ia nanonongmo hi belemiu.”

²¹ Sahingga aha mian nu Israel haha aijo' nontaamimo “Madi'! Kami madi' palesaya ka' mohongo-hongo to pilo-pilogot sangga'at. Kami palesayamo ka' mohongo-hongomo samata-mata Tumpu!”

²² Lantas i Yosua notataemo, “Jadi posi belemiumo na timbali sakisi tukoonyo nu belemiu, belemiu nompoto'imo palesayamo ka' mohongo-hongomo Tumpu.” “Totu'u,” na koonyo nu aha, “posi kamimo na timbali sakisi.”

²³ “Desumo aijo' yo alinmo na to pilo-pilogot nu to bansa-bansa sangga'at anu daagi' itina' hi belemiu na,” koonyo i Yosua, “ka' balajanji'mo saba' belemiu mohongo-hongomo Tumpu, Tumpu Allah nu Israel.”

²⁴ Lantas mian haha aijo' notataemo hi Yosua, “Kami palesayamo ka' mohongo-hongomo ola samata-mata hi Tumpu, Tumpu Allah-nto. Kami montulutimo palentah-Nyo iwi-iwi'.”

²⁵ Sahingga i sinaa aijo' kiijo' i Sikhem i Yosua nombaumo palajanjian tiba aha mian nu Israel; ka' ikiijo' na ia nompoto'imo hi aha atulan haha aijo' tiba palentah-palentah anu tionyo ahi' otuluti nu aha.

²⁶ Iwi-iwi' na atulan tiba iwi-iwi' na palentah-palentah haha aijo' tinulismo i uno nu kitab Atulan nu Tumpu Allah. Lapas aijo' ia nongalamo sa'angu' na batu anu daka', lantas pinotinjonyomo i patu nu kau' anu daka' i tampat bau ponsomban Tumpu.

²⁷ Lapas aijo' notataemo na i Yosua hi aha mian iwi-iwi' anu ikiijo', “Batu aiya na timbali sakisinto. Iwi-iwi' na potatae anu tinaloakonmo nu Tumpu hi kita, tinaloakonmo i ahop nu batu aiya. Jadi, batumo aiya na timbali sakisi hi belemiu da mompo'ingat belemiu da boli panggaga hi Tumpu hi Tumpu Allah nu belemiu.”

²⁸ Ahennyo i Yosua nonsaimo mian haha aijo' da minsusule'mo; lantas aha iwi-iwi' ninsusule'mo i tano' nu aha toto samian.

I Yosua tiba i Eleazar sinilakamo

²⁹ Lapas aijo' i Yosua anak i Nun posaihon nu Tumpu aijo', sinilakamo salatan umunnyo sina'atumo ka' sampulu' na taun.

³⁰ Ia i lamun i posi tano'nyo kiijo' i Timnat-Serah i bungkutnyo nu Efraim sasu utara i bungkutnyo nu Gaas.

³¹ Tempo'nyo i Yosua daagi' tutuu' aha mian nu Israel palesaya ka' mohongo-hongo Tumpu. Ka' mau mule' ia sinilakamo aha tataap palesaya ka' mohongo-hongo Tumpu tempo'nyo aitu kiijo' hi aha daagi' ko to pola-polaya' anu nonsakisimo iwi-iwi' apaa na anu binaumo nu Tumpu hi aha mian nu Israel.

³² Butongnyo i Yusuf anu sinilakamo aijo' binoa nu aha mian nu Israel lengkat mae i Mesir ka' i lamunmo kiijo' i Sikhem i tano' anu ingolimo i Yakub, olinyo sa'atu na doi salaka hi to ana-anak i Hemor, tuuma i Sikhem. Tano' aijo' binee'mo salaku buden hi lee' i Yusuf.

³³ Lapas aijo' i Eleazar anak i Harun suele sinilakamo, ka' i lamunmo kiijo' i Gibea, aijo'mo kota i da'erah nu bungkutnyo nu Efraim. Kota aijo' binee'mo hi Pinehas, anak i Eleazar. 66