YOSUA 22 - KITAB NU TUMPU ALLA LELE MA'IMAI'

Aha tulunan nu bansa anu i da'erah sasu kabete'an pinokaumo ninsusule' i da'erahnyo

¹ Lapas aijo' i Yosua nolagamo Aha tulunan nu bansa Ruben, Gad tiba sambagian na tulunan nu bansa Manasye anu i sasu kabete'an Kaunyo nu Yordan, lantas notataemo hi aha,

² “Belemiu nombaumo iwi-iwi' apaa na anu pinalentahkonmo i Musa hi belemiu, posaihon nu Tumpu aijo'. Ka' belemiu suele nontulutimo iwi-iwi' na palentah-ngku.

³ Sumo uukamo na kopinnyo madi' toho' belemiu nompojohok to utu-utus nu belemiu, mian nu Israel sangga'at, mosi pahampate. Belemiu nontulutimo totu-totu'u iwi-iwi' na palentah nu Tumpu Allah nu belemiu.

⁴ Sahingga susumo anu jinanji'-Nyomo, Tumpu Allah nu belemiu nombee'imo ka'amanan hi to utu-utus nu belemiu, mian nu Israel sangga'at. Jadi, uuka aiya pinsusule'mo i posi da'erah nu belemiu i sasu kabete'an Kaunyo nu Yordan aijo' anu binee'mo i Musa hi belemiu u'utu mae.

⁵ Ka' sabole-bole o inau' da belemiu saja' montuluti atulan anu pinalentahkonmo i Musa hi belemiu, aijo'mo kalibosi na Tumpu Allah nu belemiu, otuluti na pongka'oho'-Nyo, o hongo-hongo na palentah-Nyo iwi-iwi' boli panggagah hi Ia, ka' palesaya na Ia nu kinyonyoa totu-totu'u.”

^6-9 Lapas aijo' i Yosua nompatantumo ka' nompobee'mo aha minsusule' i da'erah nu aha ka' nompotuun sumo uuka, “Belemiu tempo' uuka kinayamo ka' belemiu minsusule'mo lantas momboamo potu'on manjoo', salaka, mosoni', tambaga, besak, ka' hude. Obagi-bagiakon suele na balang anu pinahuhuakon miu aijo', obee' hi to mia-mian sangga'at anu bubuu' sangko tulunan nu bansa miu.” Sahingga tulunan nu bansa Ruben, Gad tiba tulunan mae nu bansa Manasye anu kiijo' mae sasu kabete'an Yordan aijo' nompala'imo aha mian nu Israel sangga'at, ka' nambamo lengkat i Silo i da'erah Kana'an nambamo i posi tano' nu aha i da'erah Gilead. Aha jinojoongmo i tano' aijo' susumo anu pinalentahkonmo nu Tumpu hi Musa. (Sambagian na tulunan nu bansa Manasye nohumpakmo hi Musa, tano' i sasu kabete'an Kaunyo nu Yordan, ka' sambagian na tulunan nu bansa Manasye sangga'at nohumpakmo hi Yosua tano' i sasu kinsoban Kaunyo nu Yordan hingga-hinggat tiba iwi-iwi' na tulunan nu bansa sangga'at.)

Mezbah koko Kaunyo nu Yordan

¹⁰ Salatan tulunan nu bansa Ruben, Gad tiba tulunan nu bansa Manasye anu i sasu kabete'an nu Yordan aijo' tinokamo i Gelilot – panyo daagi' i sasu kinsoban Kaunyo nu Yordan – aha nompotinjomo sa'angu' na mezbah anu daka' ka' anu ma'ima' hondo koko kaunyo.

^11-12 Aha mian nu Israel sangga'at nohongomo hi bubuu' bansa nu aha notatae, “Aha mian tulunan nu bansa Ruben, Gad tiba tulunan nu bansa Manasye anu i sasu kabete'an kiijo' mae i Kaunyo nu Yordan nompotinjomo sa'angu' na mezbah kiijo' i Gelilot koko Kaunyo nu Yordan panyo daagi' ninsoop da'erah-nto!” Sahingga aha iwi-iwi' sinihukmo i Silo kahanda'mo mamba mompahampateakon tulunan nu bansa Israel haha aijo' anu i sasu kabete'an kiijo' mae i Kaunyo nu Yordan.

¹³ Lantas i Pinehas, anak i Imam Eleazar, na sinai mae nu mian Israel mamba hi tulunan nu bansa Ruben, Gad tiba tulunan nu bansa Manasye anu kiijo' mae i da'erah Gilead sasu kabete'an nu Yordan.

¹⁴ Hingga-hinggat tiba i Pinehas suele inamba aha sampulu' na to tu'a-tu'anyo nu bansa Israel, – sa'angu' na tulunan nu bansa anu i sasu kinsoban Kaunyo nu Yordan, samian na ingala, toto samian na tu'anyo nu auwan anu hi aha mae sa'anakan.

¹⁵ Sahingga tinokamo na aha kiijo' i kajojoongan nu tulunan nu bansa Ruben, Gad tiba tulunan nu bansa Manasye i da'erah Gilead.

¹⁶ Lantas aha nompoto'imo pongka'oho' nu mian iwi-iwi' anu pinalesayamo hi Tumpu, koonyo nu aha hi to mia-mian tulunan nu bansa Ruben, Gad tiba tulunan nu bansa Manasye, “Kadaka' belemiu nombaumo kalakuan anu ma'idek aiya hi Tumpu Allah Israel? Kalana belemiu nosi potinjomo mezbah, belemiu madi'mo mohongo-hongo Tumpu! Belemiu madi'mo nontuluti palentah-Nyo!

¹⁷ Pa' belemiu madi'mo nonginau' dosa'to kiijo' mae i Peor? Tempo'nyo aitu kita i hukumo nu Tumpu nu panyakit anu molele, maumo kita aiya mianmo anu pinalesayamo hi Ia! Sampe tempo' uuka aiya kita daagi' mongoa'i balaa'nyo. Apaa aijo' ma'isa sukup?

¹⁸ Ka' uuka aiya, belemiu mongka'oho' mule' mohiku Tumpu? De belemiu sinaa aiya madi'mo mohongo-hongo Tumpu, dodop Ia pusamo hi aha iwi-iwi' mian nu Israel.

¹⁹ De da'erah nu belemiu aijo' mahumimi'mo ka' madi'mo pantas pombauan tampat ponsomban Tumpu, lalinmo mae mo'uuka i da'erah nu Tumpu, anu ko Kemahnyo nu Tumpu. Poita mae na sambahagian da'erah mami, asan boli panggaga hi palentah nu Tumpu kabai madi'mo mohongo-hongo kami ka' montuangimo mule' sa'angu' na mezbah sangga'at, yo aitu ko mezbahmo na kita nu Tumpu Allah.

²⁰ Sabole-bole o inau' na i Akhan anak i Zerah madi'mo nongka'oho' nombatuki palentah nu Tumpu mongkona bala-balang anu tionyo ahi' o idei ka' apaa na kina'ahenannyo. Iwi-iwi' na mian nu Israel i hukum! Anu binaladosa' ola i Akhan, panyo anu sinilaka misa' ola ia!”

²¹ Lantas aha mian tulunan nu bansa Ruben, Gad tiba Manasye anu i sasu kabete'an aijo' nontaami,

²² “Anu Daka' na kuasanyo aijo'mo Tumpu! Nu sumbu' kadaka' kami nombaumo sumo aiya, da belemiu suele monsumbu' apaa na anu okahanda'i mami! De kami mombau anu sumo aijo' ko kahanda' madi'mo mohongo-hongo Tumpu, kabai kalana kami madi'mo palesaya hi Ia, bakasmo da kami silakamo uuka aiya!

²³ Tumpumo na mohukum kami, de kami ko kahanda' madi'mo mohongo-hongo Tumpu ka' mosi potinjomo mezbah na kami bau ponsombahkonan koloban anu opotunu kabai koloban gandum, kabai koloban bau pompodame.

²⁴ Misa' aijo' ahi' na anu okahanda'i mami, To utu-utus! Kami mompotinjo mezbah aijo', kalana kami bata-bata boli-boli sinaimihi lee' mae miu motatae hi lee' mami. 'Belemiu madi' palesaya hi Tumpu, Tumpu Allah nu Israel!

²⁵ Soba toa, Ia nompotimbalimo Kaunyo nu Yordan aiya i totonga'to ko kahanda' da mongga'at kami tiba belemiu to mia-mian nu Ruben tiba Gad. Totu-totu'u belemiu madi'mo palesaya hi Tumpu.' Sahingga apaa na saidi' mae jadi? Tantu lee' nu belemiu montewa'mo lee' mami da madi'mo monsombah Tumpu.

²⁶ Jadi kami nompotinjomo mezbah, misa' da bau ponsombahkonan koloban anu opotunu kabai apaa na anu osombahkon mami,

²⁷ panyo da timbali tanda hi kita, sambiha' ka' sambiha' ka' hi lee'to sinaimihinyo mae, taalu' kami aiya totu-totu'u monsombah Tumpu i Kemah anu katokaan-Nyo kalana momboamo koloban anu opotunu, palasombahan-palasombahan ka' koloban bau pompodame. Tiba jalan anu sumo aijo' lee' nu belemiu madi'mo montaloakon tukoonyo lee' mami madi' palesaya hi Tumpu.

²⁸ Jadi anu okahanda'i mami aijo'mo: de lee' miu motatae sumo aijo' saba' lee' mami timbali motatae, 'Toa na mezbah aijo'! Mompolee' mami nompotinjomo sa'angu' na mezbah nu Tumpu, misa' da bau ponsombahkonan koloban anu opotunu kabai koloban anu osombahkon, panyo da bau tanda hi kita sambiha' ka' sambiha'.'

²⁹ Boli obata-batai kami madi' mongka'oho' panggaga hi Tumpu kabai madi'mo palesaya hi Ia, kalana nompaka baumo mezbah sangga'at ponsombahkonan koloban anu opotunu kabai koloban gandum, kabai apa-apaa na anu osombahkon, padahan kita daagi'mo ko mezbah nu Tumpu Allah i ahop nu Kemah anu Bau Katokaan nu Tumpu.”

³⁰ Iwi-iwi' na anu pinoto'imo nasa-nasa nu aha tulunan nu bansa Ruben, Gad tiba tulunan nu bansa Manasye i sasu kabete'an aijo' i hongomo i Imam Pinehas tiba aha sampulu' na to tu'a-tu'anyo nu mian Israel anu i sasu kinsoban Kaunyo nu Yordan. Sahingga nanasamo hi aha apaa na anu pinoto'imo aijo'.

³¹ Lantas notataemo na i Pinehas, anak i Imam Eleazar, hi mian haha aijo' tulunan nu bansa Ruben, Gad tiba Manasye anu i sasu Kabete'an, “Uuka aiya sinumbu'mo mami na Tumpu, saja' mombalakati kita, kalana belemiu saja' mohongo-hongo Ia: Belemiu nomposalamatmo mian nu Israel da boli nuhukum nu Tumpu.”

³² Lapas aijo' nambamo na i Pinehas tiba to pola-polaya' nu aha Israel aha aijo'. Aha nompala'imo mian nu aha Ruben tiba Gad haha aijo' i da'erah Gilead, lantas ninsusule'mo namba i Kana'an, ka' nompoto'imo apaa na anu jinadimo aijo' hi mian nu Israel.

³³ Sahingga aha mian nu Israel nanasamo i han anu jinadimo aijo', lantas aha lewa'mo nompuji' Tumpu Allah. Aha madi'mo lewa' nonsisik kahanda' nu aha da mompahampateakonmo mian nu aha Ruben tiba Gad ka' mohopu'imo lipu' nu aha.

³⁴ Ahennyo tulunan nu bansa Ruben tiba Gad haha aijo' notataemo, “Mezbah aiya timbalimo sakisinto iwi-iwi' saba' Tumpu aijo'mo na Tumpu Allah.” Sahingga sinanggohanmo nu aha na mezbah aijo' “Sakikisi”.