YOHANES 2 - KITAB NU TUMPU ALLA LELE MA'IMAI'

Bau-bauon po'osoan i Kana

¹ Kino uwansinaanyo daagi' ko bau-bauon po'osoan i kota Kana i tano' nu Galilea, ka' tina i Yesus daagi' i kiijo' mae.

² I Yesus tiba anu saja' mombatuki Ia suele tinaang da mamba i bau-bauon aijo'.

³ Salatan anggur ningkotmo, tina-Nyo notataemo hi Yesus, “Aha kinamingkotanmo i anggur.”

⁴ I Yesus nontaami, “Kita tina boli mompokau Aku. Ma'isa toka na tempo'nyo Aku momponyata' butong-Ku.”

⁵ Panyo tina i Yesus notatae hi to posa-posaihon, “Baumo pa' apaa na anu tinaloakon-Nyo hi komiu.”

⁶ I kiijo' daagi' ko gumbang anom anu pinosadia bau kapalaluan pindudu'an susumo kabiasa'an adat nu Yahudi. Gumbang haha aijo' sa'angu' isinyo kila-kila sa'atu na liter.

⁷ I Yesus notatae hi to posa-posaihon haha aijo', “Isii na gumbang haha aijo' nu uee.” Aha nongisi sampe nobuke'.

⁸ Lantas i Yesus notatae hi aha, “Uuka ala na uee atina' sangkiding ka' boa hi tumpu nu bau-bauon.” Aha nomboa uee aijo' hi tumpu nu bau-bauon.

⁹ Ka' ia nonginummo uee anu tinimbalimo anggur. (Madi' sinumbu'nyo na anggur aijo' pa' nolengkat mae iya ola to posa-posaihon anu nolambe' uee aijo', banggan aha na monsumbu'.) Lantas tumpu nu bau-bauon aijo' nongohani boting mo'ane,

¹⁰ lantas notatae hi ia, “Biasanyo opo'inum pe'e nu mian na anggur anu ma'i-ma'ima' momonanyo, ka' de to mia-mian anu tinaang ma'osamo na monginum, atina'je ka' anggur anu biasamo. Panyo kita utus monguna' anggur anu ma'ima' hondo sampe uuka aiya!”

¹¹ Aijo'mo na anu okabangangi momonanyo binau i Yesus. Binaunyo na aijo' i Kana i tano' nu Galilea. Tiba tanda aijo' Ia nompotoamo katalasanggoan-Nyo. Sahingga anu saja' mombatuki Ia, pinalesayamo hi Ia.

¹² Lapas aijo' i Yesus nambamo i Kapernaum tiba tina-Nyo, to utu-utus-Nyo, ka' anu saja' mombatuki Ia. Aha jinojoong kiijo' mae tino pia-piansinaamo na kopinnyo.

I Yesus ninsoop i Laigan nu Tumpu

¹³ Tempo'nyo Sinaa Daka' Paskah nu Yahudi malia'mo toka, i Yesus namba i Yerusalem.

¹⁴ I Laigan nu Tumpu i Yerusalem, Ia nontokai anu saja' mompobaluk sapi', domba tiba tomonsi' malapati'; ka' anu saja' montolosi doi sinumuhang i kiijo'.

¹⁵ I Yesus nombau sa'angu' na pompohos, te kahohon na binau lantas nonsia'i binatang haha aijo', te domba ka' sapi' lengkat i uno nu Laigan nu Tumpu. Santo meja-meja' nu anu saja' montolosi doi pinosungkehet-Nyo, sahingga doi nu aha notatabumo noyaya.

¹⁶ Lantas Ia notatae hi anu mobaluk tomonsi' malapati', “Hangkat na aiya iwi-iwi'. Boli opotimbali na Laigan nu Tuumang-Ku tampat badagangan!”

¹⁷ Sahingga anu saja' mombatuki Ia tinonginau'mo i ayat nu Kitab nu Tumpu sumo uuka, “Mongka'ima'i Laigan-To, o Tumpu, talalo saja' Ku inau' i kinyonyoang-Ku.”

¹⁸ To mia-mian anu mongkuasai Yahudi nonggagakon i Yesus, koonyo nu aha, “Soba pombau anu okabangangi salaku tanda hi kami, momponyata' taalu' Beleyum ko hak mombau sumo aiya.”

¹⁹ I Yesus nontaami, “Hobo'akon na Laigan aiya, ka' i uno nu tolun sinaa po'ule'je Ku potinjo.”

²⁰ Lantas aha notatae, “Patompulu' anom na taun na kopinnyo nompotinjo Laigan nu Tumpu aiya. Ka' Beleyum na mongka' oho' po'ule' mompotinjo na ola tolun sinaa?”

²¹ Panyo Laigan nu Tumpu anu pinatuan nu potatae i Yesus aijo'mo butong-Nyo.

²² Jadi, lapas aijo' salatan i Yesus po'ule'mo pinotumuu' lengkat i kinasilakaan-Nyo, tinonginau'je na anu saja' mombatuki Ia saba' han aijo' toho'mo tinaloakon-Nyo. Sahingga aha pinalesayamo hi apaa na anu tinulis i uno nu Kitab nu Tumpu, ka' apaa na anu tinaloakonmo i Yesus.

Nusumbu' I Yesus na mian iwi-iwi'

²³ Hau-haunyo i Yesus kiijo' i Yerusalem tempo'nyo Molame'akon Paskah, da'isan na mian pinalesaya hi Ia kalana nombaumo anu okabangangi.

²⁴ Panyo i Yesus madi' mompalesaya aha, kalana Nusumbu' na mian iwi-iwi'.

²⁵ Madi' pilenje mian mombee'i katalangan hi Ia mongkona mian pa' ihe, kalana nu posi sumbu' pa' apaa na i uno nu kinyonyoa nu mian.