YESAYA 64 - KITAB NU TUMPU ALLA LELE MA'IMAI'

¹ Beakmo mae na langit ka' pintatau'mo mae, o, Tumpu, genggomo na bungkutnyo iwi-iwi' da gayu'anmo i ahop nu Belento,

² susumo apu mompomoakmo kau' ka' mompolumua'mo uee. Potoamo na kakuasa'an nu Belento hi to sampo-sampobali' nu Belento, sahingga iwi-iwi na bansa langkakatanmo i ahop nu Belento.

³ Belento toho'mo nombau palabuatan anu opalias hondo anu madi' sinangka-sangka mami, Belento nintatau'mo mae ka' i ahop nu Belento iwi-iwi na bungkutnyo ginayu'anmo.

⁴ Ma'isa toho' kinomian nohongo ka' ma'isa toho' kinomian anu nontoamo samian na tumpu anu nompalentahmo mian anu taha'iman hi ia, olamo ahi' samata-mata belento na nombaumo hi aha anu sumo aijo'.

⁵ Belento molalabot mian anu hodi' na kinyonyoanyo ka' anu tumuu' montuluti pongka'oho' nu Belento. Belento nontambuha'imo kami panyo kami tataap ahi' baladosa' memang naipuan pe'e mae kami sinala'mo.

⁶ Kami iwi-iwi' mian anu nahenyumo, ka' mule' palabuatan mami anu ma'ima' na'idekmo ka' kinotonmo. Kami mingkotmo kalana palabuatan mami anu na'idekmo susumo hon anu nagayoumo nu lahabakonmo nu mombun.

⁷ Madi'mo ko anu balado'a hi Belento, kabai mongkakase da otulungi nu Belento kalana pinosulukmo nu Belento na ohup nu Belento da madi' otoa mami, ka' mule' nompojohokmo kami da osilakaimo nu dosa' mami.

⁸ Panyo Belentomo ahi' na Tuuma mami, kami tano' ponto na pinotimbali, ka' Belentomo ahi' na nontali' ka' Belento na nompotimbali.

⁹ Jadi bolimo ahi' talalo motambuha' o, Tumpu, bolimo daagi' sola' monginau' dosa' mami; toa mae, na kami aiya mian anu palesayamo hi Belento.

¹⁰ Iwi-iwi na kota' susi' nu Belento sumomo ahi' padang tampat anu mateges Yerusalem tinimbalimo padang tampat anu kinunmo ka' ilingmo.

¹¹ Laigan nu Tumpu anu susi' ka' mule' talasanggo, tampat nu mompolee' mami sola' mompuji' Belento, tinanggotanmo nu apu; iwi-iwi' na tampat anu oka'ima'i mami singkapmo na'idek.

¹² Tinoamo nu Belento na iwi-iwi' aijo' o, Tumpu kadaka' Belento ola momohokot? Te belento ola mule' mompojohok kami monta'up sansala anu taha-tahahumo?