YESAYA 63 - KITAB NU TUMPU ALLA LELE MA'IMAI'

Tumpu nompatundu'mo bansa-bansa Anu monjagai,

¹ “Ihe na ia anu tinokamo lengka mae i Bozra daerah Edom? baju'nyo momea', pakeannyo ma'ima' hondo, ia lumajang anggasan ka' mule' tagap.” “Akumo na Tumpu anu moko ala momposalamat ka' toka mae momboa lele nu kamangan.”

Tumpu Anu monjagai

² “Kadaka' pakean nu beleyum momea' sumo atina' susumo baju' nu anu mompeeti bua' nu anggur?”

Tumpu

³ “Sausa'-Ku na ninsoop i tampat pompetian anggur aha mian anu palesayamo hi beleng-Ku madi' ko anu nontulungi Aku. To bansa-bansa pinahampeja'akon-Kumo bau nu tambuha'-Ku, susumo nompeja-peja'mo bua' nu anggur. Baso' nu aha tinolopinjitmo mae nohomei baju'-Ku, nohumimi'imo songko-songko baju'-Ku.

⁴ Aku noko batanga'mo sinaanyo anu pombalosakonanmo ka' tempo'nyo pompobebasanmo mian anu palesayamo hi beleng-Ku.

⁵ Aku nolio, panyo madi' ko anu nontulungi mae, Aku binangangmo kalana madi' ko anu nombantui mae. Lantas posi kahosonan-Ku na nontulungi mae Aku tambuha'-Ku na nontulungi mae Aku.

⁶ I uno nu tambuha'-Ku anu talalomo hondo, Ku pahampeja'akonmo na to bansa-bansa; Ku silakaimo na aha, ka' baso' nu aha Ku bubusakonmo i tano'.”

Kanonongan nu Tumpu hi Israel

⁷ Aku kahanda'mo moleleakon kalibosan nu Tumpu ka' mompuji' Ia kalana palabuatan-Nyo. Molabi-labi na balakat-Nyo hi mian anu palesayamo hi Ia, kalana Ia talalo molibos ka' kalibosan-Nyo madi' kokamingkotannyo.

⁸ Tumpu notatae, “Memang aha aijo' mian anu palesayamo hi beleng-Ku to ana-anak anu madi' monsusa'i mae.” Sahingga Ia tinimbalimo anu Nomposalamatmo aha,

⁹ Iamo ahi' na kinona nu kasusa'an nu aha, Tumpu madi' nonsai mian kabai anu mombolosakon, posi Iamo ahi' na nompobebas aha kalana liibos ka' kalibosan-Nyo. Ia saja' ahi' monjagai aha daagi' pe'e naipuan mae.

¹⁰ Panyo aha notomuhukmo ka' mule' nomposusa'mo kinyonyoa nu Tumpu. Sahingga Ia tinimbalimo sampobali' nu aha posi Iamo ahi' na nahampate nongewa aha.

¹¹ Lantas tinonginau'mo tempo'nyo naipuan mae tempo'nyo i Musa, posaihon nu Tumpu. Aha nompokilawamo, “Iyamo mae na Tumpu anu nolaya'mo to pola-polaya' nu aha mian anu pa lesayamo hi Ia notulu i ambai? Iyamo mae na Tumpu anu nombee'mo kuasa-Nyo hi aha?

¹² Iyamo mae na Tumpu anu nonsangaluimo i Musa, nu lima-Nyo maho-mahoson hondo ka' nombagimo ohua' na uee i ahop nu aha da sanggo-nyo talasanggo sampe toka sidu-sidutu'?

¹³ Iyamo mae na Tumpu anu nolaya'mo aha ilumajang notulu i uee anu maleeng? Susumo ajahan notulu ipang tampat anu mateges aha madi' ahi' toho' tinosumpun.”

¹⁴ Tumpu nomboamo aha itampat pilawean, susumo potuu'on binoamo da mongotot hemput itampat padang anu ewa. Sumo aijo'mo na Ia mompotiju' mian anu palesayamo hi Ia, da sanggo-Nyo opopodaka'.

Do'a mongkakase da okalibosi ka' otulungi mae

¹⁵ O, Tumpu, toa mae mo uuka atina' i suluga', lengkat mae atina' ikajojoongan nu Belento anu susi' ka' talasanggo. Iyamo mae na kalibosan tiba kabaanian nu Belento? Iyamo mae na kanonongan tiba kalibosan nu Belento? Boli mae montahan aijo', bee'mo mae hi kami.

¹⁶ Te misa' Belentomo ahi' na Tuuma mami? I Abraham tiba i Yakub madi' Monsumbu' kami. Panyo belento o, Tumpu atina'mo ahi na Tuuma mami anu Nomposalamatmo kami daagi' pe'e naipuan mae.

¹⁷ O, Tumpu kadaka' Nu pojohokmo mae na kami sala' na palabuatan mami? Kadaka' Belento mompobakasmo kinyonyoa mami sahingga kami madi'mo mongkabuhuk Belento? Pinsusule'mo mae, o'inau' ahi' na to posa-posaihon nu Belento O, inau' ahi' mae na mian anu palesayamo hi Belento anu Belentomo na tumpunyo.

¹⁸ Kadaka' Nu pojohokmo na sampobali' mompahampeja'akonmo Laigan nu Belento, ka' to mia-mian mohumimi'imo puge'nyo nu Belento anu susi'?

¹⁹ Belento nongatunmo kantumuu'an mami susumo au'aitu Belento madi' toho' nongkuasai kami; susumo au'aitu kami madi' toho' tinimbali mian anu palesayamo hi Belento.