YESAYA 62 - KITAB NU TUMPU ALLA LELE MA'IMAI'

¹ Kalana Yerusalem sahingga aku motataemo, kalana Sion sahingga aku madi' ola momohokot, sampe ia momposalamatmo ka' kamenangannyo majingkamo susumo potong de pihimo.

² O, Yerusalem, to bansa-bansa montoamo kamenangan nu beleyum, to tomu-tomundo' montoamo kaholomatan nu beleyum. Beleyum osanggohimo nu sanggo anu salaje ponsanggohi posi Tumpu na nombee'i sanggo aijo'.

³ Beleyum timbalimo susumo makota' anu ma'ima' ilima nu Tumpu, makota' nu kalaja'an ilima nu Tumpu nu beleyum.

⁴ Sanggo nu beleyum misa'mo daagi' ‘Anu Pinala'ianmo’, lipu' nu beleyum misa'mo daagi' ‘Anu ilingmo’. Beleyum osanggohimo, ‘Anu nu kalibosi nu Tumpu’, ka' mule' lipu' nu beleyum osanggohimo ‘Anu inaki'mo,’ kalana Tumpu sinitujumo hi beleyum, Ia sumomo ahi' langkai' nu beleyum ilipu' nu beleyum.

⁵ Susumo samian na olitau nongosoaimo langkoyang anu ma'isa toho' no'osoa sumo aitumo na Anu Nompotimbali beleyum nongosoaimo beleyum. Susumo samian na boting mo'ane lame'mo na montoa bengkele'nyo, sumo aitumo na Tumpu sinanangmo hi beleyum.

⁶ Ipagan mesen nu Yerusalem ku pojoong na anu monjagai, sinaa tiba pihi aha madi' ola momohokot, panyo tionyo ahi' saja' mompoingat Tumpu, te palajanjian anu binau-Nyomo.

⁷ Aha madi' timbali ola mompojohok Ia, ola momohokot, de Yerusalem ma'isa po'ule' Nu potinjo, ka' mompotimbalimo talasanggo isongko-songko na dunia.

⁸ Tumpu nonsumpa'mo palajanjian-Nyo ka' nu pojadimo nu kuasa-Nyo: “Aku madi'mo daagi' mombee' gandum nu beleyum hi sampobali' nu beleyum; anu kinalaja nalawe hondo nu beleyum sampe nohumpak hasinnyo.

⁹ Panyo beleyum ahi' na mongala anu pinadakmo, mongkaanmo hasinnyo ka' mompuji'mo Tumpu; ka' belemiumo ahi' na anu montipumo bua'nyo nu anggur, monginumo ueenyo ipopasan nu Laigan-Ku.”

¹⁰ Mian anu jojoong i Yerusalem, posabatmo mae motulu i sabatan daka' posadiakon na jalan hi aha to mia-mian anu minsusule'mo. Baumo na jalan daka', alinakon na batunyo, potinjo na to bande-bandela' nu to bansa-bansa.

¹¹ Tumpu mombee'imo potunon sumo uuka hi aha songko-songko na dunia, “Poto'i hi aha anu jojoong i Sion, ‘Toa, Tumpu anu Momposalamat tinokamo! Ia sinangaluan mae nu to mia-mian anu pinobebasnyomo.’ ”

¹² Aha osanggohimo; ‘Mian anu susi'’; ‘Mian anu pinosalamatmo nu Tumpu’. Yerusalem osanggohimo ‘Kota' anu lewa'mo sinale'an nu Tumpu’, ‘Kota' anu madi'mo daagi' nu pala'i nu Tumpu’.