YESAYA 58 - KITAB NU TUMPU ALLA LELE MA'IMAI'

Puasa' anu totu'unyo

¹ Tumpu notatae, “Poloboo'mo hoso-hoson! Poto'imo hi mian anu palesayamo hi beleng-Ku na ko dosa-dosa' nu aha.

² Aha monsombah Aku sansina-sinaa, ka' mongka'ima'i monsumbu' kahanda'-Ku da kokoonyo aha nombaumo anu ma'ima', ka' nontulutimo atulan-Ku. Aha notatae, tukoonyo nu aha sanang hondo na aha monsombah Aku ka' mongka'ima'i atulan-Ku anu adin.”

³ Pinokilawa nu bansa aijo', “Apaa na gunanyo na kita bapuasa' de Tumpu madi' montoa mae? Apaa na gunanyo kita ta'aluk de Ia madi' mompalahatikan mae?” Tumpu notatae, “Totu-totu'unyo, hau-haunyo belemiu bapuasa', belemiu molio posi ka'untungan ka' mongakali to mia-mian anu mongala tambo hi belemiu.

⁴ Hau-haunyo belemiu puasa', belemiu mahanggaga ka' mahantuda' moka' mongalamo kabaaniannyo. Osangka nu belemiu, belemiu puasa' mombau da Aku mohongomo do'a nu belemiu?

⁵ De belemiu puasa, belemiu monsakisa butong nu belemiu; belemiu mompoduku ubak nu belemiu susumo hon nu hemput. Belemiu mompolatas kalung ka' okakambuhi nu abu', ka' male'mo aijo'. Aijo'mo na osanggohi nu belemiu puasa'? Osangka nu belemiu Aku sanang i palabuatan nu belemiu aijo'?

⁶ Uuka na puasa' anu Ku kahanda'i; Alinakonmo na pompungu nu kasansala'an ka' hukuman anu madi' adin, ka' opobebas na mian haha aijo' anu sinansalamo.

⁷ Obagi na kaanon nu belemiu hi mian anu mo'ohopmo, otalima na to mia-mian anu mahalajangan i laigan nu belemiu. Obee'i baju' na mian anu langgo' ka'boli mojalo i utus nu belemiu anu palalumo otulungi.

⁸ Sahingga jingka tolohinsi'mo hi belemiu susumo sinaa bete'mo mae ka' iwi-iwi'na bela nu belemiu malia'mo ma'alin. Au monsangaluimo belemiu ka' momposalamatmo belemiu. Aku toka monjagai belemiu iyaya mae na tampat.

⁹ De belemiu balado'a, ku talimaje. De belemiu momoita hi beleng-Ku, Ku taamije. Boli daagi' monsansala sangko sangalu nu belemiu, bolimo obau na mo'uwali ka' mongalu.

¹⁰ Bee'i mongkaan na mian anu mo'ohop ka' tulungi na to mia-mian anu sinansalamo. De belemiu mombaumo sumo aijo', saba' pikat hondomi' anu atina' hi belemiu majingkamo susumo sinaa.

¹¹ Aku saja' monjagai ka' nombee'i mongkaan belemiu i tano' anu nategesmo; Ku jagai na belemiu da tataap sehat ka' mahoson. Belemiu kakanannyo sumo ale' anu sukup na ueenyo, susumo mata nu uee anu madi' toho' mo'oti.

¹² Kota' anu pininmo na na'idek po'ule'mo opotinjo i tampatnyo anu momona. Belemiu osanggohimo ‘Bansa anu po'ule'mo nombau pagan mesen ka' nompokoima'imo to lai-laigan anu i hansunmo.’ ”

Hukuman hi mian anu moholomati sinaa nu Sabat

¹³ Tumpu notatae, “Holomati na sinaa nu Sabat sinaa bau ponsomban Tumpu. Boli ola mongkalesang posi kapentingan nu belemiu isinaa aijo'. Lame'akon na sinaa aijo' salaku sinaa anu ma'ima'; holomati na sinaa nu Tumpu, boli mamba moyaya: boli mokalaja kabai montaloakon potatae anu madi' kokaliangannyo.

¹⁴ Sahingga belemiu lame'mo kalana nontulutimo Aku. Ku pojadimo na belemiu oholomati isongko-songko na dunia. Belemiu sanangmo na tumuu' kalana hasin nu tano' pusaka' i Yakub mompolee' nu belemiu. Aku, Tumpu na notataemo.”