YESAYA 57 - KITAB NU TUMPU ALLA LELE MA'IMAI'

Palasombahan nu pilogot kinutukanmo

^1-2 Mian anu ma'ima' na gau'nyo ka' palesaya hondo hi Tumpu, de silakamo madi' ko samian pe'e na mompalahatikan ia. De silakamo aha madi'mo daagi' nukona nu kasansala'an ka' aha nilawemo i tampat anu madi'mo ko anu mompoposia.

³ Panyo belemiu mian anu baladosa', po'ukamo mae da oputusimo! Belemiu aiya madi' lebe ma'ima' molingkudui miana nu pa ilimu' mombau anu okahelani, mian anu masala' ka' boune anu molio kantumuu'annyo ola mombau masala'!

⁴ Ihe na okokojoi nu belemiu? Ihe na anu o, alu na belemiu? Temisa' belemiumo ahi' na tulunan nu mian anu talalo baleko' ka' anu saja' mombau hengge'?

⁵ Belemiu nonsombahmo to pilo-pilogot anu mombee'i kalumba'an ka' butong nu belemiu binoamo nu napisu ipatuu nu kau' anu o, anggap ko balakatnyo. Belemiu nolamunmo to ana-anak nu belemiu i bangka'nyo nu kaunyo nyo, i liang nu batu.

⁶ Jadi pantas belemiu nolimu'mo batu malonde lengkat i aijo'. Aijo'mo na bagian nu belemiu! I batu-batumo haha aijo' na pondudu'akonan nu belemiu anggur ka' monsombahkon gandum. Osangka nu belemiu Kuka'ima'i na aijo' iwi-iwi'?

⁷ Belemiu mamba ibawo nu bungkutnyo da monsombahkon koloban ka' mompopuas napisu nu belemiu.

⁸ Belemiu mompo'una' i sabatan nu bonua nu belemiu patong anu moko ambang Belemiu nompala'imo Aku. Belemiu nongukatakonmo baju' nu belemiu ka' i nale'mo i kamale'an anu pino'ewamo nu sindua'an nu belemiu titinamboanmo da hoyot hingga-hinggat lantas mompopuasmo napisu nu belemiu.

⁹ Belemiu mompakemo minya-minya' anu manohongo, lantas mambamo monsombah pilogot Molokh. Belemiu nonsaimo to posa-posaihon i lipu' anu toto jo'o-jo'on, ka' mule' i dunia nu mian anu silakamo.

¹⁰ Madi' ko kapa'osannyo na belemiu molio to pilo-pilogot. Osangka nu belemiu aha timbali mombee'i kahosonan, sahingga belemiu madi'mo mabuhuk.

¹¹ Tumpu notatae, “Ihe na pilogot haha aijo' anu nombaumo belemiu da nabuhuk, sahingga belemiu binalekomo ka' madi'mo nonginau' mae Aku? Pa' belemiu madi'mo monsombah Aku, kalana Aku pininmo hondo na madi'mo kino lewo-lewo'?

¹² Panyo Ku poto'i hi belemiu; kapalesaya'an nu beleyum atina' madi' totu'u, ka' sinin na palabuatan nu belemiu madi' kogunanyo hi belemiu.

¹³ De belemiu moloboo' bakas da patongje haha aijo' na momposalamat belemiu! Aha molapusmo na nolahabakon nu baleba', ka' madi'mo daagi' ko anu otoa mau ola minsan na tolo husa! Panyo mian anu minsondo' hi beleng-Ku ia na mongkuasai lipu' aijo' ka' monsombahmo Aku i laigan-Ku.”

Tumpu binalajanji'mo montulungi ka' mompa'alinmo mian anu palesayamo hi Ia

¹⁴ Daagi' ko anu notatae, “Baumo ka' posadiamo na jalan da bau kajalanan nu mian anu palesayamo hi beleng-Ku bolimo daagi' ko anu madi' mombau.”

¹⁵ Kalana sumo uukamo na potatae nu Tumpu Anu Matangkas na Kuasanyo ka' susi', anu balakuasa sampe toka sidu-sidutu', “Kajojoongan-Ku i tampat anu matangkas ka' susi', panyo suele ahi' jojoong hi to mia-mian anu ma'ima' na kinyonyoanyo, ka' anu binalatobatmo isinin na dosa' nu aha, da opo'ule'mo na sumangat nu aha tiba halapan nu aha.

¹⁶ Madi' sampe toka sidu-sidutu'mo na Aku mompisala'i mian anu palesayamo hi beleng-Ku; madi' ahi' saja'mo Aku motambuha', da boli hente na kinyonyoa nu aha, padahan Akumo aiya na mompotumuu' aha.

¹⁷ Dosa' kageguanan nu aha nonsaduakonmo Aku notambuha, kalana aijo' aha Ku hukumo ka' Ku pala'imo. Panyo aha talalo hondo panggaga ka' tataap mosi liomo jalan.

¹⁸ Tinoang-Kumo na kalakuan nu aha, panyo aha Ku bee'i kahosonan. Ku jagaije ka' ku tulungi na aha ka' mohase' mian anu molibosmo na kinyonyoa.

¹⁹ Aku mombee'ije ka' amanan hi iwi-iwi' na mian, maumo anu ohani kabai anu majo'on. Aku mombee'ije kahosonan hi mian anu palesayamo hi beleng-Ku.

²⁰ Panyo mian anu ma'idek na gau'nyo aijo' sumomo ambai anu bokolon ka' madi' toho' tenda. Soloknyo monganjuhakon hemput tiba hensek.

²¹ Madi' ko ka amanannyo na mian anu baladosa',” nakoonyo nu Tumpu.