YESAYA 50 - KITAB NU TUMPU ALLA LELE MA'IMAI'

¹ Tumpu notataemo hi aha Israel, “O, mian anu palesayamo hi beleng-Ku, nu sangka nu beleyum Aku molaa'mo beleyum, susumo samian na langkai' nu mian molaa'mo bengkele'nyo? De sumo aijo' yo iya na sulat poga'atan? Nu sangka nu beleyum Aku mompobalukmo beleyum, susumo samian na tuuma mompobalukmo anaknyo hi mian anu nontagemo samaya? Misa' ahi' sumo aijo'! Beleyum ihakop ka' binoamo ilipu' nu mian, kalana dosa' ahi' tiba palabuatan ma'idek nu beleyum!

² Kadaka' aijo' aha mian anu palesayamo hi beleng-Ku mau samian madi' ko anu montaami mae, tempo'nyo Aku tokamo mae molaga aha? Pa' ugaat aha ola ahi' momohokot kalana monsangka Aku madi' moko ala mompobebas ka' mule' madi' moko ala momposalamat aha? Padahan mau ola Ku palentah na ambai timbali mo'oti, iwi-iwi na kaunyo timbali Ku pojadi padang tampat anu mateges, sahingga to ika-ikan matemo ka' mabusikmo.

³ Aita' langit Ku pojadimo pikat taha-tahahumo, Kinukuban-Kumo susumo hude ponsaput anu sinilakamo.”

Posaihon nu Tumpu anu tulu-tulutanmo

⁴ Tumpu Anu Matangkas na Kuasanyo nompogulu'mo aku notatae, da potataengku mompohoson mian anu ilusekmo. De subu-subumo Nu po ingatmo mae na anu nu ka'ima'i nu kinyonyoangku, da mohongomo pangajalan-Nyo anu obee' hi belengku.

⁵ Tumpu mompopangalati'mo mae Aku; aku madi' motomuhuk kabai mompala'imo Ia.

⁶ Ku bee'mo na tundunku hi mian anu mondokemo mae aku; ka' mule' gagisingku hi mian anu monggautmo jangkutku. Aku madi' mombilokakon ohupku, tempo'nyo aku sola'mo o'alu ka' sola'mo otupe'i

⁷ Kalana Tumpu montulungimo mae aku, sahingga aku madi'mo ahi' opopo'ambang. Aku nompohosonmo kinyonyoangku da sabaan ahi'; ku sumbu' saba' aku na madi' ahi' opopo'ambang.

⁸ Kalana Tumpu na ohani ahi', Ia nompoto'imo saba' aku na madi' ahi' kokasala'an. Ihe na mongkahanda'i mae painggaga tiba aku? Imbo' da kita mompaha ahop hingga-hinggat. Ihe na mongewa mae aku? Pokau mae da ia mongohani mae aku.

⁹ Memang ahi', Tumpu Anu Matangkas na Kuasanyo montinjohimo mae aku, ihe na baani mompoto'i mae aku kokasala'an? Iwi-iwi' na mian anu mompisala'i mae aku saidi' mae mingkotmo, susumo hude anu iluso'mo kinaanmo nu ane'.

¹⁰ O, belemiu anu moholomati Tumpu, ka' mompotombihing mae potatae nu posaihon-Nyo, jalan anu otului nu belemiu ugaat ahi' pintung madi' kojingkanyo anu monjingkai belemiu; panyo palesaya na Tumpu; paninseha hi Tumpu nu belemiu.

¹¹ O, belemiu anu mongka'oho'mo monsilakai mian sangga'at, posi tanga'anmo nu belemiu na monsilakai belemiu. Tumpu na mombau aijo' da jadi, belemiu osakisamo hondo.