YESAYA 4 - KITAB NU TUMPU ALLA LELE MA'IMAI'

¹ Tempo'nyo aijo' aha popitu' na to bou-boune montoongimo samian na mo'ane ka' notatae, “Pobee' mae na kami da mongakuimo beleyum salaku langkai'mo mami, da kami madi' ma'ambang kalana madi' no'osoa. Anu okaan tiba pakean mami oposi tanggungje mami.”

Yerusalem po ule'mo ma'ima'

² Po ule'je toka na tempo'nyo nu potimbalimo nu Tumpu na sosu'anon iwi-iwi' ka' mule' kau' tumuu'mo ka' daka'mo ilipu' aiya. Toka isinaa aijo' aha mian nu Israel anu salamat mongoai'mo kabilahian ka' sanangmo na kinyonyoa kalana nohumpakmo hasin nu ale'nyo.

³ Batu-batu mian anu daagi' tinasisa i Yerusalem, ka' mule' aha to mia-mian anu pinile'anmo nu Tumpu da oposalamat, osanggohimo sinusi'mo.

⁴ Kakuasa'anmo nu Tumpu na momputusi saidi' mae ka' mompoko ima'imo mian anu palesayamo hi Ia. Ia mompobelesi'mo baso' nu to mia-mian i Yerusalem anu pinatean ikota' aijo'.

⁵ Lantas aita i Puge'nyo nu Sion tiba iwi-iwi' na mian anu sinihukmo ikiita' nu potimbalimo nu Tumpu na kundom de sinaamo ka' mule tibuk lantas moak nu apu de pihimo. Kakuasa'an-Nyomo ahi' nu Tumpu na montindungi ka monjagai songko-songko na kota' aijo'.

⁶ Ia na montindungi da madi' masingit ipanas anu taha-tahahumo mapengges de sinaamo ka' mompotimbalimo tampat bau pingkongan de mabohos mae na ujan ka' mule' de ko antong mae daka'.