YESAYA 38 - KITAB NU TUMPU ALLA LELE MA'IMAI'

I Tomundo' Hizkia nasakitmo ka' pino alinmo

¹ Itempo'mo aijo' na i Hizkia nasakit ka' me sangkiding sinilakamo. I Nabi Yesaya anak i Amos nambamo nontoa ia ka' nompoto'i, “Pinotuun mae nu Tumpu da belento Tomundo' mompobelesmo iwi-iwi' na ulusan, kalana belento Tomundo' madi'mo daagi' ma'alin. Madi'mo pin belento Tomundo' silakamo.”

² I Hizkia nobalikmo nongahopi mesen, lantas binalado'amo,

³ “Tutugiakon mae na aku aiya nontulutimo hondo-hondo Belento nu kinyonyoangku anu sahodi-hodi'nyo. Aku saja'mo binala usaha nontuluti pongka oho' nu Belento.” Lantas i Hizkia ihumangmo ka' talalomo hondo nolibos.

⁴ Salatan i Yesaya nambamo Tumpu nompokaumo ia,

⁵ da po ule' minsusule' hi Hizkia ka' opoto'i na potuunon-Ku sumo uuka, “Aku, Tumpu, Tumpu nunu sombah i Daud mompolee' nu beleyum nohongomo do'a nu beleyum ka' nontoamo lolu' nu beleyum. Daagi' Kutuangi sampulu' ka' olima' na taun na umun nu beleyum.

⁶ Beleyum tiba kota' Yerusalem Ku pobebasmo da madi'mo nu palentah i tomundo' Asyur. Kota' aiya tataapmo saja' Kujagai.” Lantas i Yesaya nonsaimo mian da mompija-pijak bua' nu ara ka' okelakon ibisun aijo' hi Hizkia da ma'alinmo. Lantas pinokilawamo i Tomundo' Hizkia, “Apaa na pontoan salaku tanda saba' Tumpu memang mompo alinmo mae aku ka' mule' aku timbalimo mamba i Laigan nu Tumpu?”

⁷ Tinaamanmo i Yesaya, “Uuka na tanda anu binee'mo nu Tumpu hi belento Tomundo' aijo'mo Ia mongganapimo palajanjian-Nyo.

⁸ Ipontoan jam anu ola montoa lolung nu batu nu sinaa bibinau i Tomundo' Ahas, Tumpu mombauje lolungnyo mundun sampulu' na galis”. Sahingga imundunmo na lolung aijo' sampulu' na galis.

⁹ Salatan i Hizkia na'alinmo ia nontulismo nyanyian anu bau pompuji'nyo sumo uuka:

¹⁰ “Aku notataemo, salaje' mohintonga' na umunku, aku tionyo ahi' mambamo, mompomingkotmo kantumuu'anku anu daagi' tinontuha' idunia nu mian anu sinilakamo.

¹¹ Aku notataemo, aku madi'mo daagi' montoa Tumpu itano' aiya, kabai montoa mian idunia aiya.

¹² Nyanyianku madi'mo kotusanannyo, ajanku aku silakamo tinokamo, susumo kemah nu polaya' binatang anu tinatakanmo; susumo hude anu ginuntingmo aijo' ipakakas pontonunan; aku nonganggap Tumpu mongkodo'imo kantumuu'anku.

¹³ Sampahu-pahu na aku mongkadede'akon untuk, ku oa'i na bukungku iwi-iwi' nu hansunimo nu sa'angu' na singa; aku nonganggap Tumpu mongkodo'imo kantumuu'anku.

¹⁴ Potataengku ko ise-ise'nyomo ka' madi'mo mahoson, susumo tomonsi' dara aku saja'mo mompele-pele'. Matangku napoe'mo na saja' monsinda langit, Tumpu pobebasakonmo mae na aku da madi'mo susa' susumo aiya.

¹⁵ Apaa na anu daagi' kutaloakon? Aiya palabuatanmo nu Tumpu; aku madi'mo tohoyot kalana sinusa'mo hondo.

¹⁶ O, Tumpu, bee'i mae na aku kantumuu'an nu potatae tiba palabuatan nu Belento, da aku tumuu' olamo ahi' samata-mata hi Belento.

¹⁷ Untuk kuku oa'i mongabali'mo susumo madi' ko apa-apaanyo, Belento nomposalamatmo aku da madi'mo kinokasilaka'an; iwi-iwi na dosa'ku ingampunanmo nu Belento.

¹⁸ Idunia nu mian anu sinilakamo madi'mo ko anu mompuji' Belento, mian anu sinilakamo madi'mo daagi' montaha'imani kanonongan nu Belento.

¹⁹ Ola mian anu daagi' tutuu' na mompuji' Belento, susumo anu kubaumo sinaa aiya. To tu'a-tu'anyo monsisikakon hi to ana-anaknyo kanonongan nu Belento anu taha-tahahumo hondo, o, Tumpu.

²⁰ O, Tumpu Belento nompo alinmo aku, sahingga kami nonyanyimo nyanyian bau pompuji' iLaigan nu Belento, okutiakon kasapi', i uno nu kantumuu'an mami.”