YESAYA 35 - KITAB NU TUMPU ALLA LELE MA'IMAI'

Jalan anu mompanjolongi kasalamatan

¹ Padang tampat anu mateges ka' mule' tano' anu kinunmo lame'mo, bunga-bunga singkapmo timboka ipadang anu ewa natampatnyo.

² Padang tampat anu mateges ko ewa-ewanyomo, ka' mongelokmo nu lagu anu mompolame'. Ia ma'ima' hondo sumomo ahi' bungkutnyo nu Libanon, sahayanyo sumomo ahi' bangka'nyo nu Karmel ka' Saron. Sahingga batu-batu mian timbali montoa kuasa nu Tumpu, ka' mule' kaholomatan nu Tumpunto.

³ Pohoson na lima anu madi' moko ala mombau apa-apaa, pohoson na buku nu ike-ike' anu iludokmo.

⁴ Poto'imo hi mian anu mongoa'i madi' ko angga'nyo, “Pohoson na kinyonyoa nu belemiu, boli mabuhuk, Tumpu nu belemiu tokamo mae kalana mohukumo sampobali', Ia tokamo mae momposalamat belemiu.”

⁵ Tempo'nyo aijo' mian anu napisokmo moko alamo montoa-toa, ka' mian anu mabongon moko alamo mohongo.

⁶ Mian anu kinapi'mo maha lumpatanmo susumo jonga, mian anu imomo'mo lewa'mo molo ais kalana ilame'mo. Kalana mata nu uee lubatmo ipadang tampat anu mateges, kaunyo mo ilimo ipadang tampat anu ewa.

⁷ Bone' anu mapanas timbalimo talaga, tano' anu kinunmo timbalimo kaho mata nu uee. Tampat anu u'utu mae kinajojoonganmo nu dedeng nu kuhat, nu tumuu'imo nu biho' tiba pondan

⁸ Ikiijo' mae ko jalanmo anu daka', “Jalan anu mompanjolongi kasalamatan” na sanggonyo. Mian anu baladosa' madi' montulu ikiijo', mian anu ponga' madi' mompotalas mian anu montulu ikiijo'.

⁹ Itampat aijo' madi' ahi' ko singanyo kabai binatang anu mahangas sangga'at. Aha to mia-mian anu nu posalamat nu Tumpu na lumajang montulu ikiijo'.

¹⁰ Aha to mia-mian anu pinobebasmo nu Tumpu na minsusule'mo; aha minsoopmo ikota' Yerusalem ka' lewa'mo montaligalai, ohup nu aha balasahayamo kalana ilame'mo sampe toka sidu-sidutu'. Aha saidi' mae bilahimo ka' lame'mo; pikilan susa' ka 'mule' sola' motusa' imadi'anmo.