YESAYA 13 - KITAB NU TUMPU ALLA LELE MA'IMAI'

Tumpu mohukumo Babel

¹ Aiya na potuunon nu Tumpu anu tinalima i Yesaya anak i Amos mongkona Babel:

² Paha hangkat na bandela' aita' ipuge'nyo mai-maimadi' ko anu montumuu'i salaku tanda mahampatemo. Poto'i hi aha to sulu-suludadu ka' tangkakon na lima nu beleyum da aha montumbuhimo iwi-iwi na sabatan daka' nu kota' anu bubuulon aijo'.

³ Tumpu nolagamo to sulu-suludadu anu pinile'an-Nyomo. Aha to babaani, madi' baleko' ka' mule' timbali Nu taha'imani. Tumpu nombee'imo pakalaja'an hi aha da mohukumo aha mian anu tinambuha'an-Nyomo.

⁴ Potombihing na hengge'nu mian aita' me ibungkutnyo, sumomo ahi' hengge' nu mian anu da'isan tongko'. Potombihing na kalaja'an-kalaja'an singkapmo ihengge, ka' aha bansa-bansa anu sinihukmo. Tumpu Anu Daka' na Kuasanyo nompalesamo gombuan nu suludadu anu kahanda'mo mahampate.

⁵ Aha tinokamo lengkat mae ilipu' anu toto jo'o-jo'on ipuusnyo nu tano'. Tumpu notambuha'mo sahingga nonggunakonmo aha da monsilakaimo songko-songko na dunia.

⁶ Polotando'mo kalana sinaa nu Tumpu toka mae malia'mo, aijo'mo sinaa kasilaka'an anu nu potokamo mae nu Tumpu Anu Daka' na Kuasanyo.

⁷ Toto samian nu oa'i kapi'mo na limanyo ka' madi'mo kokabaaniannyo.

⁸ Aha iwi-iwi' jadimo mabuhuk anu taha-tahahumo, ka' lewa'mo maha piosan nu buhuk susumo boune anu kahanda'mo mompohampe anak. Aha mompaha didinmo ka' bata-batamo, ohup nu aha mohahamo kalana na ambangmo.

⁹ Sinaa nu Tumpu malia'mo mae toka ka' toka isinaa aijo' nu potudunmo nu Tumpu na tambuha'-Nyo ka' mule' pusa-Nyo anu taha-tahahumo. Tano' timbalimo tampat anu mateges ka' toto samian anu binaladosa'mo osilakaimo.

¹⁰ Toto saangu' na mandala ka' gombuan nu mandala' madi'mo daagi' kojingkanyo; batu nu sinaa pikatmo de ia bete'mo mae, ka' mule' bitu'on madi'mo daagi' majingka mae.

¹¹ Tumpu motataemo, “Ku hukumo na dunia aiya kalana palabuatannyo na'idekmo tiba aha mian anu toto ide-idek na kinyonyoanyo kalana dosa-dosa' nu aha. Toto samian na anu buulon Ku popo ambangmo, ka' mule' anu montige-tige tiba anu buhingison Kuhukumo.

¹² Mian anu oposalamat ola sangkiding, aha lebemo tomajo'onan samian ka' samian, sahanyomo mosoni' anu madi' kogalo'nyo na dengke na okabot.

¹³ Ku pojadimo na langit tananggahan ka' tano' gayu'an itampatnyo de tokamo na sinaanyo Aku, Tumpu Anu Daka' na Kuasanyo mompotoamo tambuha'-Ku.

¹⁴ Mian anu lengkat mae i salipu'an jijinojoongmo i Babel saidi' mae moga'aga'atmo ka' mopalaimo minsusule' ilipu'nyo toto samian. Aha pokakanamo susumo jonga anu mopalaimo da madi' nu kabot nu mian anu mompagalapi, kabai susumo gombuan nu domba anu madi'mo ko polaya'nyo.

¹⁵ Maumo pa' ihe na ohakop ojalo'mo sampe mate.

¹⁶ Nu sakisimo nu aha na to bunga-bunga mea' nu aha ohansunimo, ka' mule' laigan nu aha iwi-iwi' otongkalimo ka' mule' to bengke-bengkele' nu aha opakisamo na mompatiduhusi.”

¹⁷ Tumpu motataemo, “Kupotukamo i uno nu kinyonyoa nu aha bansa Madai na montumbuhimo Babel, aha madi' opoko ala otamboi nu salaka kabai mosoni'.

¹⁸ Tiba pompelet nu aha ka' mule' hihisnyo nu pateimo nu aha na to oli-olitau. Aha madi' mongkalibosi bunga mea' ka' mule' madi' molibos hi to ana-anak.

¹⁹ Babel aijo' ma'ima'an hondo ka' binaumo katalasanggoan nu aha anu jojoong ikiijo'. Panyo Aku, Tumpu, mohansunimo ia susumo anu binaung-Kumo hi Sodom tiba hi Gomora.

²⁰ Mau pe'e samian madi'mo daagi' ko anu jojoong ikiijo' mae. Madi'mo daagi' ko mian nu aha Arab anu lewa' mamba momoya na mombau kema' nu aha itampat aijo' ka' mule' madi'mo ko to pola-polaya' na molaya' mee' tiba dombanyo da opo, otot kiijo mae.

²¹ Tampat aijo' nujojoongimo nu binatang anu toto ela-ela'. Mongkoek mimpetamo ilaigan nu aha haha aijo' ka' mule' tomonsi' unta jojoongmo ikiijo' mae. Mee' toto ela-ela' maha lumpa-lumpatanmo i, olot nu laigan anu singkapmo nohobo'-hobo'.

²² Huu' nu dedeng nu alas tiba serigala ohongomo lengkat mae aijo' ilaigan lewa-lewa' ponsombahan pilogot ka' ilaigan nu tomundo' Babel. Kahansunannyo malia'mo toka na tempo'nyo ka' tempo' aijo' madi'mo daagi' otunda.”