YEREMIA 46 - KITAB NU TUMPU ALLA LELE MA'IMAI'

Mesir pinatundu'mo kiijo' i Karkemis

¹ Tumpu nompoto'imo mae hi belengku mongkona bansa-bansa,

² lengkat pe'e mae i Mesir. Ia nompoto'i mae hi belengku mongkona suludadu i Nekho tomundo' nu Mesir, anu pinatundu'mo kiijo' i Karkemis koko Kaunyo nu Efrat tempo'nyo daagi' i Nebukadnezar na tomundo' nu Babel itaun kino opatnyomo na i Yoyakim nompalentah binau tomundo' nu Yehuda. Sumo uuka na pinoto'i nu Tumpu mongkona han aijo',

^3-4 “To sulu-suludadu nu Mesir anu toto tangka-tangkas na pangkatnyo nongaisakonmo ais da mosadiamo na to sulu-suludadu nu aha, ‘Boitmo na talombo', Pusokmo na baju' besak tiba songko anu ko aja'nyo! Posadiamo na kanta ka' pinsoopmo ibalisan! Belemiu, suludadu anu monsake'i ajahan, pokonamo na bau kasake'an! Sake'imo na ajahan nu beleyum, lako'mo mamba pahampate!’

⁵ Panyo Aku, Tumpu nontoamo aha ninsusule'mo mae kalana nabuhukmo. To sulu-suludadu nu aha pinatundu'mo mae ka' nopalaimo mae kalana nabuhukmo madi'mo daagi' nonsiloi hiku.

⁶ Mian anu makolit madi'mo noko ala nopalai, ka' mian anu baani madi'mo noko ala nompotumuu' butongnyo hi sampobali'. Aha tinosumpunmo ka' tinombahangkangmo isasu utara, isonibi nu Kaunyo Efrat aijo'.

^7-8 Ihe na ia anu nosawe'mo susumo uee nu Kaunyo Nil, susumo kaunyo anu nongiaba'imo sinin na sonibinyo? Aijo'mo lipu' Mesir. Ia notatae, ‘Aku totinjomo ka' mongkuasaimo tano'. Ku hansunimo na kota iwi-iwi' tiba mian anu jojoong ikiijo'.

⁹ Popadeka'mo o to aja-ajahan! Bagalagimo o to kare-kareta! Donganmo mamba o to sulu-suludadu anu montoongi kanta lengkat mae i Sudan tiba Libia. Ka' suele belemiu o to mia-mian anu toto pande-pande na mompana' lengkat mae ilipu' Lidia.’ ”

¹⁰ Panyo aku, i Yeremia mompoto'i saba' aiyamo na sinaa nu Tumpu Allah Anu Matangkas na Kuasanyo ka' Mahakuasa; toka isinaa aijo' Ia mombalosakonmo hi aha iwi-iwi' na sampobali'-Nyo. Bajak-Nyo mongkaanmo aha sampe mobosu, ka' monginumo baso' nu aha sampe ma'osa. Sinaa uuka Tumpu Anu Mahakuasa, mongkolot iwi-iwi' na koloban-Nyo isasu utara, isonibi nu Kaunyo Efrat aijo'.

¹¹ O belemiu mian anu jojoong i Mesir, lako'mo mamba i Gilead polio pakuli'! Panyo maunyomo ahi' sumo aijo' madi' kopakuli' na moko ala mompo alin belemiu.

¹² Kantumuu'an nu belemiu anu moko ambang aijo' sinumbu'mo nu to bansa-bansa. Loboo' nu belemiu kinahongoanmo isongko-songko na dunia. Suludadu samian montumpakmo suludadu sangga'at; sahingga aha sama-sama tinombahangkangmo kulu-kulup itano'.

I Nebukadnezar tinokamo mae

¹³ Salatan i Nebukadnezar tomundo' nu Babel tinokamo mae nontumbuhi Mesir, Tumpu nompoto'imo mae hi belengku, Ia notatae,

¹⁴ O “Yeremia bebakon na lele aiya isongko-songko na kota' Mesir, aijo'mo i Memfis, i Migdol, tiba i Tahpanhes, ‘Posadiamo ka' tinjohakon ahi' kalana iwi-iwi' na anu nu belemiu ohansunimo i uno nu pahampatean!

¹⁵ Kadaka' i Apis pilogot nu belemiu anu mahoson hondo aijo' nopalaimo? Kalana pinatundu'mo nu Tumpu na ia!’

¹⁶ Manjoo' na suludadu nu belemiu tinosumpunmo ka' tinombahangkangmo. Aha binasisikmo samian ka' samian, ‘Imbo' kita minsusule'mo hi bansanto da kita timbali daagi' tumuu' madi' nu silakai nu bajak nu sampobali'to.’

¹⁷ Bee'imo sanggo sangga'at na i tomundo' Mesir; ‘Anu sasaja' hengge ka' ola nonsia-siakan kasampatan.’

¹⁸ Aku, Tumpu Allah anu tumuu', Aku tomundo', Tumpu Anu Mahakuasa. Susumo Bungkutnyo nu Tabor natunjomo nokiita' i olot nu to bungku-bungkutnyo, ka' mule' Bungkutnyo nu Karmel natunjomo nokiita' noliu-liumo ambai, sumo aijo'mo na kahosonannyo nu aha anu toka mae montumbuhi beleyum.

¹⁹ Posadiamo, o mian anu jojoong i Mesir kalana ohakopmo ka' oboamo! Memfis timbalimo tampat anu hansunmo – anu liingmo kalana madi'mo ko anu monjojoongi.

²⁰ Mesir sumomo anak nu sapi' anu molompo', panyo saja' nu posuba'at nu lalo daka-daka' anu lengkat mae isasu utara.

²¹ Ka' mule' to sulu-suludadu anu sola' nu tamboi madi'mo noko ala nombau apa-apaa sumomo ahi' anak nu sapi' anu talalomo nolompo'. Aha madi'mo noko ala nontinjohakon. Iwi-iwi' ninsusule'mo ka' nopalaimo da salamat. Sinaa pohukumanmo aha tinokamo; tempo'nyomo na aha nu tuda'imo mae nu balaa'.

²² Mesir nopalaimo ka' sinudanmo susumo ulo kalana suludadu nu sampobali nu aha kino oha-ohaninyomo mae. Aha nontumbuhimo ia nu bobolo' sumomo ahi' mian nontaa'mo kau'

²³ ka' notaa'imo ingko-ingkot kau' nu alas anu manjoo' hondo ka' madi' opoko ala opinsoopi. Suludadu nu sampobali' madi' pinoko ala ilekeng, lebe manjoo' nu lingkuduimo na kihi-kihi'. Aku, Tumpu mompoto'imo,

²⁴ Mian anu jojoong i Mesir o ambangimo kalana nu patundu'mo nu bansa anu lengkat mae isasu utara. Aku, Tumpu notataemo.”

²⁵ Tumpu Anu Mahakuasa, Tumpu Allah Israel, nompoto'imo, “Aku mohukumo Amon, pilogot lengkat mae i Tebe, tiba iwi-iwi' na Mesir ka' mule' to pilo-pilogot tiba to tomu-tomundo'nyo. Tomundo' nu aha Mesir tiba aha iwi-iwi' na mian anu nontakabunakonmo ia

²⁶ Ku bee'mo hi Nebukadnezar tomundo' nu aha Babel tiba hi suludadunyo anu kokahanda'mo mompatei aha. Panyo imihinyo mae, Mesir po ule'mo ahi ojojoongi susumo naipuan mae. Aku, Tumpu, notataemo.”

Tumpu momposalamatmo mian anu palesayamo hi Ia

²⁷ “O mian nu Israel anu palesayamo hi beleng-Ku, boli mabuhuk! Posaihon-Ku i Yakub boli langkakatan! Belemiu tiba lee' nu belemiu Ku posalamatmo lengkat mae ilipu' anu majo'on, tampat pinomboan belemiu. Belemiu minsusule'mo ka' jojoongmo ilipu' nu belemiu ka' madi'mo ko anu mompoposia. Belemiu tumuu'mo ma'ima'; madi'mo daagi' ko anu okabuhuk nu belemiu.

²⁸ Jadi bolimo daagi' mabuhuk, o mian anu palesayamo hi beleng-Ku Aku tokamo mae momposalamat belemiu. To bansa-bansa, tampat pipinongga'a-gaa'takonan-Kumo belemiu iwi-iwi' Ku silakaimo, panyo belemiu na madi' ahi' sumo aijo'. Memang belemiu madi' ahi' bebas ihukuman panyo hukuman-Ku anu onabu'akon hi belemiu na adin ahi' madi' mompahasala' tiba anu tinantukanmo. Aku, Tumpu, notataemo.”