YEREMIA 44 - KITAB NU TUMPU ALLA LELE MA'IMAI'

Potuunon nu Tumpu toka hi aha mian nu Israel anu kiijo' i Mesir

¹ Tumpu nompoto'i mae hi belengku mongkona iwi-iwi' na mian nu Israel anu jojoong i Mesir, aijo'mo ikota' Migdol, Tahpanhes, Memfis, tiba idaerah salatan,

² Sumo uuka na potuunon nu Tumpu Anu Mahakuasa, Tumpu Allah Israel hi aha, “Belemiu nonsakisimo balaa' anu pinokonang-Kumo hi Yerusalem tiba hi iwi-iwi' na kota' sangga'at nu Yehuda. Sampe uuka aiya kota' haha aijo' daagi' hau-haunyo hansun madi'mo ko anu nonjojoongi,

³ Han aijo' jinadimo kalana mian anu monjojoongi binaladosa'mo, sahingga nonsabapimo notambuha'mo. Aha nonsombahkonmo koloban ka' nonsombahmo to pilo-pilogot anu ma'isa' toho' sinombah nu aha, ka' mule' belemiu kabai mompolee' nu belemiu.

⁴ Aku saja'mo nompokau namba hi belemiu to posa-posaihon-Ku aijo'mo to nabi-nabi, anu nontewa' aha da bolimo mombau palabuatan anu ma'idek anu Ku ka'ideki aijo'.

⁵ Panyo belemiu madi' nongka'oho' nohongo ka' madi' nompalahatikan. Belemiu madi' nongka'oho' binelenti nombau palabuatan anu ma'idek aijo'mo nonsombahkonmo koloban hi to pilo-pilogot.

⁶ Mokonyo aijo' pinobuntung-Kumo na tambuha'-Ku tiba idek nu kinyonyang-Ku hi kota-kota' Yehuda tiba jalan-jalan kiijo' i Yerusalem. Iwi-iwi' pinapung-Kumo sahingga tinimbalimo ihansun ka' kinunmo susumo anu tinoamo tempo' uuka aiya.

⁷ Ka' uuka aiya Aku, Tumpu Anu Balakuasa hondo, Tumpu Allah Israel mompokilawamo kadaka' belemiu nombaumo palabuatan anu timbali monsaduakon kasilaka'an anu daka' aijo' hi butong nu belemiu. Te belemiu kahanda'mo monsilakai iwi-iwi' na mian – mo'ane, boune, to ana-anak, tiba bungamea' – sahingga madi'mo daagi' ko samian na bansa nu belemiu na daagi' tontuha'?

⁸ Kadaka' belemiu nombaumo hahan anu monsabapimo Aku motambuha'? Belemiu tinokamo i Mesir ka' jinojoongmo, ilipu' anu ma'isa osumbu-sumbu' nu belemiu aijo' lantas belemiu monsombahmo pilogot ka' monsombahkonmo koloban hi to pilo-pilogot nu lipu' aijo'! Te belemiu kahanda'mo mohansuni posi butong nu belemiu da belemiu nu alumo nu bansa iwi-iwi' idunia aiya ka' mule' sanggo nu belemiu lewa'mo opake salaku bau pontotobi'akon?

⁹ Te kinolilimanmo nu belemiu na palabuatan iwi-iwi' anu ma'idek bibinaumo nu belemiu i tano' Yehuda tiba ijalan-jalan ikota' Yerusalem aijo'mo palabuatan nu mompolee' nu belemiu, ka' to tomu-tomundo' Yehuda tiba to bengke-bengkele' nu aha tiba belemiu ka' mule' bengkele' nu belemiu?

¹⁰ Panyo sampe toka sinaa uuka belemiu madi' ahi' mangaku sala'. Belemiu madi'mo mae nongadati Aku ka' madi'mo tinumuu' montuluti atulan anu pinalentahkon-Kumo hi belemiu ka' hi mompolee' mae nu belemiu.

¹¹ Mokonyo aijo' Aku, Tumpu Anu Balakuasa hondo, Tumpu Allah Israel, mongewamo belemiu ka' mohansunimo songko-songko na Yehuda.

¹² Ka' de maluanyo aha mian nu Yehuda anu daagi' tinontuha' suele ko kahanda' mamba i Mesir, da jojoongmo kiijo' mae, saba' aha suele silakamo ahi' iwi-iwi'. Aha iwi-iwi' anu tu'amo kabai anu daagi' anak silakamo i Mesir i uno nu pahampatean, kabai kalana kasusa'anmo i anu okaan. Mian timbalimo mabuhuk na montoa kantumuu'an nu aha ka' lewa'mo mongalu aha. Sanggo nu aha lewa'mo opake salaku bau pongkutuki.

¹³ Susumo Aku nohukumo Yerusalem sumo aijo'mo suele na Aku mohukum aha anu jinojoongmo i Mesir. Aha silakamo i uno nu pahampatean, kalana kasusa'an i anu okaan, kabai kalana panyakit anu molele.

¹⁴ Aha mian nu Yehuda anu daagi' tinontuha' anu nambamo i Mesir, ka' jojoongmo kiijo' mae madi'mo daagi' ko samian na daagi' tumuu' kabai madi' silaka. Madi'mo daagi' ko samian na daagi' minsusule' mae i Yehuda maumo ahi' han aijo' talalo hondo nu ka'ima'i nu aha. Totu-totu'u madi'mo daagi' ko anu minsusule' mae, boli mompiakon pa' to pia-piangkuka na mian anu moko ala mopalai.”

¹⁵ Lantas nambamo mae hi belengku manjoo' hondo na mian, aijo'mo iwi-iwi' na to momo'ane anu nonsumbu'mo taalu' bengkele'nyo nonsombahkonmo koloban hi pilogot, ka' iwi-iwi' na to bou-boune anu tinjo-tinjo ikiijo' tibamo mian nu Israel anu jojoong i Patros, bahagian sasu salatan Mesir. Aha nompoto'imo mae hi belengku,

¹⁶ “Kami madi'mo mongka'oho' mohongo apaa anu nu poto'i mae nu beleyum hi kami atas sanggo nu Tumpu.

¹⁷ Iwi-iwi' na anu jinanji'mo mami, tionyo ahi' obaumo mami. Kami saja'mo ahi' monsombahkon koloban hi Tomundo' boune nu Suluga' ka' mondudu'akon anggur salaku palasombahan hi ia susumo anu biasamo nu bau nu aha ikota-kota' Yehuda ka' ijalan-jalan ikota' Yerusalem nu aha mompolee' mami, tiba aha to tomu-tomundo' ka' to mia-mian anu kopangkatnyo aijo'mo pamalentah mami ka' mule' ahi' kami. Tempo'nyo aijo' manjoo' hondo na anu okaan mami, kami mohumpakmo kamajuan ka' madi'mo ko anu okasusa'akon mami.

¹⁸ Panyo salatan kami madi'mo monsombahkon koloban hi Tomundo' boune nu Suluga' ka' madi'mo mondudu'akon anggur salaku palasombahan hi ia saba' sinin na apa kakulanganmo hi kami; mian mami silakamo i uno nu pahampatean, kabai kalana kasusa'an i anu okaan.”

¹⁹ Lapas mule' boune haha aijo' notataemo, “Langkai' mami situju na kami mombau roti mimbau-balu' Tomundo' boune nu Suluga' ka' mompapui koloban ka' mule' monsombahkon anggur hi pilogot mami aijo'.”

²⁰ Kona hi aha iwi-iwi' na mo'ane ka' boune anu nontaamimo susumo aijo', ku poto'i,

²¹ “Te osangka nu belemiu na Tumpu madi' monsumbu' kabai nongkolilimimo sinin na koloban anu sinombahkonmo ikota-kota' Yehuda tiba ijalan-jalan kiijo' i Yerusalem nonsombahkonmo na mompolee' nu belemiu, ka' mule' to tomu-tomundo' tiba to mia-mian anu ko pangkatnyo atina' hi belemiu, ka' mule' mian da'isan ilipu' aiya ka' mule' belemiu suele?

^22-23 Madi'mo nu poko intim nu Tumpu na montoa belemiu monsombahkon koloban hi to pilo-pilogot sangga'at. Palabuatan nu belemiu atina' ma'idek ka' moko ambang. Belemiu binaladosa'mo hi Tumpu ka' madi'mo tinulu-tulutan hi palentah-Nyo. Mokonyo aijo' uuka aiya lipu' nu belemiu ihansunmo sahingga madi'mo jadi ojojoongi, ka' sanggonyo opakemo lewa bau pongkutuki. Mian anu montoa mabuhukmo'.”

^24-25 Lantas pinoto'ingkumo hi aha iwi-iwi' na mian haha aijo', lebe-lebe hi aha to bou-bounenyo, koongku Tumpu Anu Mahakuasa nompoto'imo mae sumo uuka, hi aha mian nu Yehuda anu jinojoongmo i Mesir, “Belemiu tiba sinin na bengkele' nu belemiu binasumpa'mo hi Tomundo' beoune nu Suluga' taalu' belemiu mompapuimo koloban tiba mule' ahi' nonsombahkonmo anggur hi ia. Palajanjian nu belemiu aijo' ginanapanmo nu belemiu. Jadi ma'ima'mo! Baumo ahi' apaa na anu jinanji'mo nu belemiu atina'.

²⁶ Panyo uuka aiya potombihing mae apaa na anu Ku poto'i hi belemiu, o mian nu Israel anu jinojoongmo i Mesir; Aku, Tumpu basumpa' atas sanggongKu anu talasanggo saba' belemiu madi'mo daagi' Ku pobee' mompake sanggong-Ku na mombaumo apa-apaa anu opakeakon palajanjian. Belemiu madi'mo timbali motatae, ‘Aku basumpa' atas sanggo nu Tumpu Allah anu tumuu'!’

²⁷ Aku bala usahamo da belemiu silakamo ka' madi'mo mohumpak ka'ima'an i uno nu kantumuu'an, sampe belemiu silakamo iwi-iwi' mau pa' kalana pahampatean kabai kalana panyakit anu molele.

²⁸ Me pa' to pia-piangkuka na mian na daagi' tumuu' ka' daagi' minsusule' i Yehuda lengkat mae i Mesir. Sahingga iwi-iwi' na mian nu Yehuda anu kiijo' i Mesir montoaje pa' potatae nu aha kabai pa' potataeng-Ku na anu ko bukutinyo.

²⁹ Ku potokamo mae na balaa' hi belemiu itampat aiya bau pompobukuti hi belemiu saba' hukuman anu tinanga'an-Kumo onabu'akon hi belemiu totu-totu'u memang ahi' ototu'uimo.

³⁰ I Hofra tomundo' nu aha Mesir Ku bee'mo hi sampobali' nu aha anu ko kahanda'mo mompatei ia, susumo Aku nombee'mo i Zedekia tomundo' nu aha Yehuda hi Nebukadnezar tomundo' nu aha Babel, sampobali'nyo kokokahanda'mo mompatei ia aijo'.”