YEREMIA 43 - KITAB NU TUMPU ALLA LELE MA'IMAI'

I Yeremia binoamo i Mesir

¹ Potuunon nu Tumpu Allah Israel, anu tionyo ahi' ku poto'i hi aha mian da'isan noko poto'ingkumo iwi-iwi'.

² Lantas i Azarya anak i Hosaya ka i Yohanan anak i Kareah tiba iwi-iwi' na mian sangga'at anu singkap buulon aijo' notataemo mae hi belengku, “Beleyum baleko'. Tumpu Allah mami madi' nompalentah beleyum da montewa' kami boli mamba jojoong i Mesir.

³ I Barukh anak i Neria aijo'mo ia na pagala nonsale'i beleyum da boli montuluti kami da mian nu Babel mongkuasaimo kami ka' mompateimo kabai momboamo kami i Babel.”

⁴ Mau i Yohanan kabai iwi-iwi' na suludadu tiba mian da'isan madi'mo nontuluti palentah nu Tumpu da jojoongmo ahi' i Yehuda.

⁵ I Yohanan tiba iwi-iwi' na suludadu haha aijo' nomboamo i Mesir iwi-iwi' na mian anu daagi' i Yehuda ka' mule' iwi-iwi' mian anu ninsusule'mo mae lengkat ilipu' sangga'at tampat aha gina'a-ga'atakon.

⁶ To momo'ane, to bou-boune, to ana-anak, ka' to lalangkoyang anak nu tomundo' anu binee'mo i Nebukadnezar da nu jagai i Gedalya tibamo aku ka' i Barukh, iwi-iwi' binoamo i Mesir.

⁷ Aha madi'mo nontuluti palentah nu Tumpu, lantas nambamo i Mesir sampe-sampe tinoka i kota' Tahpanhes na kojo'onnyo.

⁸ Ikiijo' mae Tumpu notataemo mae hi belengku,

⁹ “Ala na batu toto daka-daka' ka' lamun i uno nu tano' i ahop nu sabatan pinsoopan i gedung nu pamalentah ikota' aijo'. Usahakon da to mia-mian nu Yehuda montoa beleyum mombau han aijo'.

¹⁰ Lantas poto'i hi aha taalu' Aku, Tumpu, Anu Mahakuasa, Tumpu Allah Israel, mompotokamo mae posaihon-Ku i Nebukadnezar tomundo' nu Babel mamba itampat aijo. Ka' aita' ibawo nu batu haha aijo' anu ilamun nu beleyum i uno nu tano' aijo' ia mompotinjomo kalaja'annyo ka' mombokamo kemah nu kalaja'annyo.

¹¹ I Nebukadnezar tokamo mae ka' mompatundu'mo Mesir. Ka' to mia-mian anu tinantukanmo silaka kalana panyakit anu molele silakamo nu panyakit anu molele. Aha anu tinantukanmo oboa salaku mian anu ihakop, ka' anu tinantukanmo silaka i uno nu pahampatean silakamo ahi' i uno nu pahampatean.

¹² Aku momposulimo apu ilaigan nu to pilo-pilogot nu aha Mesir, ka' i tomundo' Babel mompapuimo patong iwi-iwi' nu pilogot ilaigan nu pilogot kabai momboamo ilipu'nyo. Susumo samian na polaya' nu binatang mombaso'imo baju'nyo da bolimo ko kutunyo, sumo aijo'mo na i tomundo' Babel monsapuimo sampe belesi'mo na Mesir lantas po ule' mule' mamba madi'mo daagi' ko anu molingkang ia.

¹³ Tugu-tugu nu bapilogotan kiijo' i Heliopolis i Mesir ohansunimo ka' mule' laigan nu to pilo-pilogot nu aha Mesir opapuimo sampe mingkot iwi-iwi'.”