YEREMIA 38 - KITAB NU TUMPU ALLA LELE MA'IMAI'

I Yeremia i uno nu bubung anu notismo

^1-3 Tumpu nompalentahmo mae aku da mompoto'i potunon aiya hi mian da'isan, “Kota' aiya Ku bee'mo hi aha suludadu nu Babel ka' nu patundu'mo nu aha. Ihe na mian anu jojoong ikota' silakamo i uno nu pahampatean, kabai kalana kasusa'anmo ikaanon kabai kalana panyakit anu molele. Panyo de ihe na mosabat ka' mombee'mo butongnyo hi aha mian nu Babel, na madi' ahi' opatei; nyawanyo salamatmo.” I Sefaca anak i Matan, i Gedalya anak i Pasyhur, i Yukhal anak i Selemya, tiba i Pasyhur anak i Malkia nohongomo iwi-iwi' na anu pinoto'ing-Kumo aijo'.

⁴ Sahingga nambamo na to mia-mian anu ko pangkatnyo haha aijo' hi tomundo' ka' nompoto'i, “Mian aiya tionyo ahi' opatei na hukumannyo. Kalana sababnyo ia nontaloakonmo susumo aijo' sahingga to sulu-suludadu ihentemo na kinyonyoa nu aha iwi-iwi' ka' mian sangga'at anu daagi' jinojoong ikota' aiya. Ia madi'mo nontulungi mian da'isan panyo ola mule' ahi' nonsilakaimo aha.”

⁵ I Tomundo' Zedekia nontaami, “Ma'ima'mo! Baumo na ia yayamo anu nu ka'ima'i aku madi'mo moko ala montewa belemiu.”

⁶ Lantas ingalamo nu aha na aku lantas pinungumo nu aha ka' inguluakonmo nu kahohon na aku i uno nu bubung, bubung aijo' anu i Malkia anak momo'ane i tomundo' anu kiijo' ipopasan nu laigan i tomundo'. Bubung aijo' madi'mo ko ueenyo, olamo henseknyo jadi aku ninsoopmo i hensek aijo'.

⁷ Tempo'nyo aitu daagi' ko samian ia mian nu Sudan anu mokalaja ilaigan nu tomundo'. Sanggonyo i Ebed-Melekh. Ihongonyomo na aku taalu' inguluakonmo i uno nu bubung aijo'. Tempo'nyo aijo' i tomundo' hau-haunyo mompipin rapat i Sabatan Daka' Benyamin.

⁸ I Ebed-Melekh nambamo nokiijo' ka' nompoto'imo hi tomundo'.

⁹ “Tuan Anu Opopodaka', palabuatan nu mian haha aijo' madi' ma'ima'. Aha nonguluakonmo i Nabi Yeremia i uno nu bubung; ia tantu silakamo nu ohop ikaiyong, kalana anu okaan i kota' aiya ningkotmo.”

¹⁰ Lantas pinalentahmo itomundo' na i Ebed-Melekh, “Pomboa aha totolu' na mian ka' sawe'akon na i Yeremia lengkat ibubung itina' da ma'isa pe'e ia silaka.”

¹¹ Sahingga nambamo na i Ebed-Melekh tiba aha totolu' na mian haha aijo' igudang anu kiijo' ilaigan nu tomundo' ka' nongalamae hude anu nahudemo ikiijo' lantas inguluakonmo nu aha tiba kahohon hi belengku i uno nu bubung aijo'.

¹² I Ebed-Melekh nompoto'imo mae hi belengku da momposapit hude aijo' ilepaku da bau polapisi kahohon da madi' kandalisan. Sahingga tinulutankumo na anu pinoto'i i Ebed-Melekh aijo'.

¹³ Lantas ihela'mo nu aha na aku da osabatakonmo lengkat i bubung aijo'. Lantas aku tinahanmo ipopasan nu laigan nu tomundo'.

I Zedekia nokipokinde'imo hi Yeremia

¹⁴ Daagi' kinosansinaan sangga'at, i Tomundo' Zedekia nompalentahmo mian da momboa aku mangadap hi ia i sabatan daka' anu ko totolu'nyo i Laigan nu Tumpu. Ia notataemo mae hi belengku, “Aku mompokilawamo hi beleyum ka' beleyum tionyo ahi' montaami mae nu pontaami anu sahondo-hondonyo. Boli ko anu opohowini.”

¹⁵ Aku nontaami, “De ku poto'i na anu sahondo-hondonyo, tantu belento Tomundo' monabu'akonmo mae hukuman mompatei hi belengku; ka' de aku mombee'i pokinde', belento Tomundo' madi' ahi' montuluti pokinde' aijo'.”

¹⁶ I Tomundo' Zedekia hoko-hokot nompoto'imo palajanjian hi belengku, koonyo, “Atas sanggo nu Tumpu Allah anu tumuu', Tumpu Allah anu mombee'i kantumuu'an hi kita, aku madi' ahi' mompatei beleyum kabai mombee'mo beleyum hi to mia-mian anu kahanda'mo mompatei beleyum.”

¹⁷ Lantas pinoto'ingkumo hi Zedekia tukoongku Tumpu Anu Mahakuasa, Tumpu Allah nunusombah nu aha mian Israel, nompoto'imo mae sumo uuka, “De beleyum tundu'mo hi aha to mia-mian anu ko pangkatnyo hi tomundo' Babel, beleyum madi' ahi' opatei ka' mule' kota' aiya madi' ahi' opapui. Beleyum tiba to utu-utus nu beleyum saidi' mae salamat.

¹⁸ Panyo de beleyum madi' ahi' tundu', saba' kota' aiya nu kuasaimo ahi' nu aha Babel. Nu papumo nu aha sampe motanggot ka' suele beleyum madi'mo daagi' tumuu'.”

¹⁹ Tinaaman i tomundo', “Ku kabuhuk na to mia-mian sangko bansanto anu nopalaimo namba naninggalum hi aha mian nu Babel. Boli-boli dumo aku obee'mo hi aha ka' osakisamo.”

²⁰ Tinaamanku, “Madi'”, “Belento Tomundo' madi' mule' obee' hi aha. Ku kakase sabole-bole da belento Tomundo' montuluti potuunon nu Tumpu; saidi' mae iwi-iwi' jadi ma'ima', ka' mule' belento Tomundo madi' ahi opatei.

²¹ Panyo de belento Tomundo' madi' ahi' tundu', saba' Tumpu nompotoamo hi belengku apaa na anu saidi' mae jadi.

²² Tinoangkumo apaa na anu pinotoa aijo', aijo'mo to bou-boune iwi-iwi' anu daagi' kiijo' ilaigan nu tomundo' Yehuda sinabatakonmo ka' binoa hi to miamian anu ko pangkatnyo ikalaja'an Babel. Hau-haunyo lumajang aha notataemo, ‘I tomundo' ingakalanmo nu to soba-sobatnyo anu mompahakona hondo, ka' kinuasanmo nu aha. Uuka aiya salatan tengkenyo tinongkelejutmo i uno nu hensek, aha iwi-iwi' tinolosule'mo.’ ”

²³ Po ule' mule' aku notatae, “Iwi-iwi' na anak tiba bengkele' nu belento Tomundo' osabatakonmo ka' oboamo hi aha Babel. Belento Tomundo' madi'mo daagi' nupotumuu' nu aha. Belento Tomundo' nu hakopmo i tomundo' Babel, ka' kota' aiya opapumo sampe motanggot.”

²⁴ Lantas notataemo na i Zedekia, “Boli osisik maumo pa' hihe na anu sola' sinisikto aiya, da nyawa nu beleyum madi' opoposia.

²⁵ De nu hongomo nu to mia-mian anu kopangkatnyo na aku binasisikmo tiba beleyum, aha tokamo mae ka' mompokilawa hi beleyum apaa na anu lewa'mo sinisikto. Aha balajanji'mo madi' mompatei beleyum de beleyum monsisikmo iwi-iwi' hi aha.

²⁶ Anu opoto'i taalu' beleyum pagala mongkakase aku da aku madi' mokiboa beleyum minsusule' italungku' ka' silakamo kiijo' mae.”

²⁷ Lapas aijo' madi' pinin iwi-iwi' na mian anu kopangkatnyo tinokamo mae nompokilawa hi belengku. Ka' pinoto'ingkumo hi aha susumo anu pinalentahkonmo itomundo' hi belengku. Tiba jalan anu sumo aijo' madi' aha nombau apa-apaa hi belengku kalana madi' kinosamian na monsumbu' anu sinisik itomundo' tiba aku.

²⁸ Aku tataap ahi' tinahan ipopasan nu laigan nu tomundo' sampe tinoka na sinaanyo Yerusalem pinatundu'mo nu sampobali'.