YEHEZKIEL 41 - KITAB NU TUMPU ALLA LELE MA'IMAI'

¹ Mo'ane aijo' nomboamo aku isuo'nyo anu aijo' itotonga'nyo anu osa-osanggohi Tampat Anu Susi' hondo. Ia nongukunmo jalan ise-ise'anu bau kalambanan mokiijo'; komantannyo totolu' na meten.

² Ka' kobolanyo olima' na meten. Pimpi'nyo poti-potimbiha' kobutolunyo ohua' ka' mintonga' na meten. Lantas ia nongukunmo Tampat Anu Susi' hondo aijo': ko mantannyo 20 meten ka' kobolanyo 10 na meten.

³ Lapas aijo' ia ninsoopmo isuo'nyo anu sasu unonyo. Ia nongukunmo jalan ise-ise' anu bau kalambanan mokiijo': komantannyo a'angu' na meten ka'kobolanyo totolu' na meten, ka' pimpi'nyo poti-potimbiha' kobutolunyo totolu' ka' mintonga' na meten.

⁴ Lantas ingukunnyomo suele na suo'nyo aijo': ko ewanyo sulapa' opat, ko mantannyo tiba kobolanyo pokakana sampulu' na meten. Lapas aijo' ia notataemo mae hi belengku, “Aiyamo na Tampat Anu Susi' hondo.”

Suo'nyo-suo'nyo anu binau ipimpi' mesen nu Laigan nu Tumpu

⁵ Lapas mule' mo'ane aijo' nongukunmo pimpi' mesen nu Laigan nu Tumpu anu sasu unonyo: ko butolunyo totolu' na meten. Aijo' i pimpi' mesen Laigan nu Tumpu titikup daagi' ko suo-suo'nyo kobolanyo ohua' na meten.

⁶ Suo'nyo haha aijo' totolu' na lunduannyo ka' toto salundu daagi' ko suo'nyo mule' 30. Pimpi' mesen anu isambiha'nyo toto salundu' lebe monipis madi' sumo pimpi'nyo mesen anu akaong mae i aluknyo na lunduannyo, sahingga suo'nyo haha aijo' timbali pinosusun mau madi' pilenje nombolo'i pimpi' mesen nu Laigan nu Tumpu aijo'.

⁷ Otoa mae isambiha'nyo na pimpi' mesen nu Laigan nu Tumpu aijo' pokakana na kobutolunyo lengkat akaong mae i aluknyo toka-toka mokiita'. Aijo' ipimpi' mesen Laigan nu Tumpu sasu sambiha'nyo, anu isasu sambiha'nyo nu suo'nyo haha aijo' daagi' ko ojan daka' ohua' sahingga mian timbali moliba' lengkat mae ilunduannyo anu i aluknyo mokiita' ilunduannyo anu ko ohua'nyo tiba kototolu'nyo.

^8-11 Pimpi' mesen sasu sambiha'nyo nu suo'nyo haha aijo' kobutolunyo ohua' ka' mintonga' na meten. Laigan aijo' ko sabatannyo anu bau kalambanan mokiijo' isuo'nyo haha aijo' anu isasu utara Laigan nu Tumpu ka' mule' sabatan sangga'at anu bau kalambanan mokiijo' isuo'nyo haha aijo' anu isasu salatan. Duhu-duhuk na Laigan nu Tumpu daagi' pentrasinyo kobolanyo ohua' ka' mintonga' na meten; ko tangkasnyo totolu' na meten lengkat i tano' ka' binau pokakana susumo fundasi nu suo'nyo haha aijo' ipimpi' mesen nu Laigan nu Tumpu. I olot nu pentrasi tiba laigan haha aijo' anu bau kajojoongan nu to ima-imam daagi' mule' ahi' ko dasanyo anu kobolanyo sampulu' na meten, sasu kowi ka' koanan i Laigan nu Tumpu.

Laigan anu sasu kinsoban

¹² Isambiha' nu popasan nu Laigan nu Tumpu sasu kinsoban daagi' ko laigan daka' komantannyo 45 meten ka' kobolanyo 35 meten, ka' mule' kobutolunyo nu pimpi'nyo mesen haha aijo' ohua' ka' mintonga' na meten.

Ukulan nu Laigan nu Tumpu

¹³ Mo'ane aijo' nongukunmo komantannyo nu Laigan nu Tumpu; 50 meten. Lengkat mae isasu padutnyo nu Laigan nu Tumpu tinoka-toka ipimpi' mesen padutnyo nu laigan daka-daka' sasu kinsoban komantannyo suele 50 meten.

¹⁴ Sasu ahopnyo nu Laigan nu Tumpu anu mongahopi kabete'an tibamo popasannyo anu ikowinyo ka' koanannyo kobolanyo suele 50 meten.

¹⁵ Mo'ane aijo' nongukun mule' laigan daka-daka' aijo' anu mongahopi popasan isasu kinsoban; kobolanyo 50 meten tibamo pimpi'nyo mesen anu isasu kowinyo ka' koanannyo. Dasanyo-dasanyo anu kiijo' i Laigan nu Tumpu, dasanyo anu sasu ahopnyo, Tampat Anu Susi',

Bahagian-bahagian nu Laigan nu Tumpu

¹⁶ binunga-bungan nu kau' salaku bingkainyo, lantas salonyo sampe tolongannyo iwi-iwi'. Tolongannyo haha aijo' timbali opokonai lalansenyo.

¹⁷ Iwi-iwi' na pimpi'nyo anu sasu unonyo binunga-bungan nu ukilan-ukilan

¹⁸ kau palem tiba malaekat. Malaekat aijo' ohua' na ohupnyo

¹⁹ sa'angu' ohup nu manusia anu mongahopi kau' palem anu sasu kowinyo ka' ohup nu singa anu mongahopi kau' palem anu sasu koanannyo. Ukilan haha aijo' saja' daagi' isongko-songko na Laigan nu Tumpu,

²⁰ lengkat pe'e isalonyo toka-toka aita' ibuan nu sabatan.

²¹ Iwi-iwi' na ohi' nu sabatan anu i Tampat Anu Susi' sulapa' opat. I ahop nu Tampat Anu Susi' hondo daagi' ko anu susumo mezbah te kau' na binau.

Mezbah anu kau' na binau

²² Kotangkasnyo sa'angu' ka' mintonga' na meten, ka' kobolanyo sa'angu' na meten. Pasu'nyo iwi-iwi', salonyo tiba pimpi'nyo te kau' na binau. Mo'ane aijo' notataemo mae hi belengku, “Aiyamo na meja' anu i ahop nu katokaan nu Tumpu.”

Sabatan-sabatan

²³ Ipuus nu jalan ise-ise' anu bau kalambanan mokiijo' i Tampat Anu Susi' hondo daagi' kosabatannyo sa'angu', sumo aitu mule' i Tampat Anu Susi' hondo daagi' kosabatannyo sa'angu'.

²⁴ Sabatannyo haha aijo' kotumbannyo ohua' anu otuhea'akon itotonga'nyo.

²⁵ Tumban haha aijo' i Tampat Anu Susi' hondo binunga-bungan nu ukilan-ukilan kau' palem ka' malaekat-malaekat, pokakana susumo ipimpi'nyo iwi-iwi'. Idasanyo anu ibahagian sasu sambiha'nyo daagi' kojalaja'nyo te kau' na binau.

²⁶ Ipimpi'nyo poti-potimbiha' daagi' kotolongannyo, ka' pimpi'nyo binunga-bungan nu ukilan-ukilan kau' palem.