YEHEZKIEL 39 - KITAB NU TUMPU ALLA LELE MA'IMAI'

I Gog pinatundu'mo

¹ Tumpu Anu Matangkas na Kuasanyo notatae, “O manusia anu madi' tumuu' batu, tambuha'imo na i Gog tomundo' anu balakuasa hondo ilipu' Mesekh, tiba Tubal, ka' poto'i hi ia taalu' Aku aiya sampobali'nyo.

² Ku hela'mo na ia, ka' momboamo ia osabatakon lengkat mae i daerah anu majo'on sasu utara mamba i bungkutnyo nu Israel.

³ Ikiijo' mae Ku sapahimo na pana'nyo sahingga tongkakabasmo ilimanyo kowi, ka' Ku potatabumo na hihisnyo anu aijo' totoong ilimanyo koanan.

⁴ Aita' ibungkutnyo nu Israel i Gog tiba iwi-iwi' na suludadunyo tiba anu nosa'angu'mo tiba ia silakamo ka' bangke' nu aha Ku bee'mo hi iwi-iwi' na tomonsi' tiba hi binatang anu mahangas da nu kaan nu aha.

⁵ Suludadu haha aijo' tombahangkangmo ka' silakamo sinin na ale'. Aku, Tumpu Anu Matangkas na Kuasanyo notataemo.

⁶ Ku potokamo mae na apu da mompapu tano' nu Magog tiba isinin na sonibi nu bone anu ko miannyo monjojoongi ka' tumuu' madi' ko anu mompoposia. Sahingga nu sumbu'je nu aha iwi-iwi' taalu' Akumo ahi' na Tumpu.

⁷ Panyo aijo' hi aha Israel, Ku poto'imo na sanggong-Ku anu susi' ka' sanggong-Ku aijo madi'mo daagi' ohumimi'i. Sahingga nu sumbu'je nu to bansa-bansa taalu' Akumo ahi' na Tumpu, Tumpu anu susi' lengkat mae hi aha Israel.”

⁸ Tumpu Anu Matangkas na Kuasanyo notataemo, “Memang totu'u sinaa anu sinanggong-Kumo aijo' tokamo mae.

⁹ Mian anu jojoong i iwi-iwi na kota' nu aha Israel mosabatmo mamba da'isan hondo montoluki iwi-iwi na toongon anu pinala'ianmo, aijo'mo kanta, tiba bajak, pana' tibamo hihisnyo tiba tokon anu bau pondoke. Iwi-iwi' aijo' nu pojadimo nu aha kau' anu oposun ka' aijo' sukup na opake popitu' na taun na kopinnyo.

¹⁰ Jadi aha madi'mo daagi'mo mongala kau' anu oposun i ale' kalana sinin na toongon anu pinala'ianmo aijo' sukupmo na oposun. Aha montololangimo ka' mongagoimo halata' nu to mia-mian anu nontololangimo ka' nongagoimo halata' nu aha. Aku, Tumpu Anu Matangkas na Kuasanyo notataemo.”

Polamunan i Gog

¹¹ Tumpu notatae, “De iwi-iwi' aijo' jadimo Ku bee'imo na i Gog tano' bau polamunan i Israel, i Bangka'nyo nu Potapan anu kiijo' isasu kabete'an i Ambai Mate. Ikiijo'mo na i Gog tiba iwi-iwi' na suludadunyo olamun, ka' bangka'nyo aijo' osanggohimo ‘Bangka'nyo nu Suludadu i Gog’.

¹² Popitu' na bitu'on na kopinnyo na aha mian nu Israel kalangkabut molamun iwi-iwi' na bangke' da tano' aijo' madi'mo daagi' mahumimi'.

¹³ Songko-songko na mian nu lipu' montulungimo pakalaja'an molamun aijo'; ka' kalana mombaumo pakalaja'an aijo' saba' aha montalimamo tambonyo de tokamo na sinaa nu kamenangan-Ku. Aku, Tumpu Anu Matangkas na Kuasanyo notataemo.

¹⁴ Salatan popitu' na bitu'on aijo' tomboliumo, to pia-piangkuka na mian opokaumo da monsongkohi lipu' aijo' molio bangke-bangke' nu mian anu daagi' sika-sika bandang itano', ka' de daagi' nu lamunmo nu aha da belesi'mo na lipu' aijo' madi'mo mahumimi'.

¹⁵ Hau-haunyo aha lumajang lantas nu humpakmo nu aha na buku nu mian, nu pokonaimo nu tanda koko buku aijo', da to mia-mian anu binee'anmo kalaja molamun montoamo tanda aijo' ka' molamunmo buku aijo' i Bangka'nyo nu Suludadu i Gog.

¹⁶ Tiba jalan anu obau sumo aijo', tano' aijo' binaso'anmo sahingga madi'mo nahumimi'. (Imihinyo mae i bangka'nyo aijo' ko kota'nyomo ka' sanggonyo pokakana tiba sanggo Suludadu i Gog.)”

¹⁷ Tumpu Anu Matangkas na Kuasanyo notataemo mae hi belengku, “O manusia anu madi' tumuu' batu, laga na tomonsi' iwi-iwi' tiba binatang sangga'at da aha toka mae lengkat iyaya mae na tampat da mongkaan anu singkapmo sinilaka anu pinotoukan-Kumo hi aha. Aku mombaumo bau-bauon anu daka' aita' i to bungku-bungkutnyo nu Israel, ikiita' mae aha mongkaanmo ponoha' ka' monginumo baso'.

¹⁸ Aha mongkaanmo bangke'-bangke' nu suludadu ka' monginumo baso' nu to mia-mian anu balakuasa i dunia. To sulu-suludadu tiba anu balakuasa haha aijo' opateimo susumo mee' lakinyo kabai anak nu mee' kabai sapi' anu toto lompo-lompo'.

¹⁹ Salatan Ku poko pateimo mian haha aijo' sumomo ahi' koloban, to tomo-tomonsi' ka' binatang sangga'at mongkaanmo lompo'nyo iwi-iwi' sampe mongoa'imo bubun ka' monginumo baso'nyo sampe malangumo.

²⁰ I meja'-Ku aha mompobosumo kompong nu aha tiba iwi-iwi' na ajahan ka' anu monsake'i ajahan haha aijo' tiba to sulu-suludadu. Aku, Tumpu Anu Matangkas na Kuasanyo notataemo.”

Israel po ule'mo kinalibosan

²¹ Tumpu notatae, “Ku potoamo na kakuasa'an-Ku hi aha bansa-bansa. Nu toaje nu aha pa' mosia na Aku monggunakon kuasang-Ku monsidahi kaputusan-kaputusan-Ku anu adin.

²² Mulai aijo' nu sumbu'je nu aha Israel taalu' Akumo ahi' na Tumpu nu aha.

²³ Ka' iwi-iwi' na bansa monsumbu'je taalu' aha mian nu Israel binoa ipinomboan, aijo' kalana dosa' nu aha hi beleng-Ku. Aha pinala'ian-Kumo ka' pinojohok-Kumo da pinatundu' nu sampobali' ka' pinatean i uno nu pahampatean.

²⁴ Ihukum-Kumo na aha sitimbang tiba kahenyuan nu aha ka' palabuatan anu ma'idek nu aha, lantas pinala'ian-Kumo na aha.”

²⁵ Tumpu Anu Matangkas na Kuasanyo notatae, “Panyo uuka aiya po ule'mo Ku kalibosi na aha mian nu Israel lee' i Yakub ka' po ule'mo Ku pokopiani na kantumuu'an nu aha. Tiba jalan anu sumo aijo' na Aku monjagai da sanggong-Ku tataap oholomati.

²⁶ De aha po ule'mo ma'ima na jojoong ilipu' nu aha ka' madi'mo daagi' ko anu sola' mompopobuhuk aha sahingga nu kolilimimo nu aha mosia na aha pinopo ambangmo kalana madi'mo nompajuli mae Aku.

²⁷ Po ule'mo Ku sule'akon na aha lengkat mae ilipu'-lipu' nu sampobali' nu aha ka' mule' kasusi'an-Ku nu toaje nu aha iwi-iwi' na bansa kalana palabuatan-Ku aijo'.

²⁸ Sahingga nu sumbu'je nu mian anu palesayamo hi beleng-Ku taalu' Akumo ahi' na Tumpu nu aha. Kalana Akumo ahi' na nomboa aha itampat pinomboan aha, panyo Aku mule' ahi' na nonsule'akon aha ilipu' nu aha ka' madi' nompala'i mae mau pe'e ola samian na aha kiijo' mae.

²⁹ Ku dudu'akonmo mae na Roh-Ku hi aha bansa Israel, ka' madi'mo daagi' mompala'i aha. Aku, Tumpu Anu Matangkas na Kuasanyo notataemo.”