YEHEZKIEL 3 - KITAB NU TUMPU ALLA LELE MA'IMAI'

¹ Tumpu notatae, “O, manusia anu madi' tumuu' batu, kaanmo na kitab anu ilulunmo aiya lantas lako'mo ka' poto'imo hi aha mian nu Israel.”

² Lantas nati anga'mo na aku ka' Tumpu nombee'mo mae kitab anu ilulunmo aijo' da ku kaanmo.

³ Ia notatae, “O, manusia anu madi' tumuu' batu, kaanmo! Isiimo na kompong nu beleyum nu kitab anu ilulunmo aiya.” Lantas kitab aijo' kinaankumo ka' nyamitnyo matami' matami' hondo sumomo ahi' juu' nu uani'.

⁴ Tumpu notatae mule', “O, manusia anu madi' tumuu' batu, lako'mo mamba hi aha mian nu Israel ka' potokakonmo na potuunon-Ku aiya iwi-iwi' hi aha.

^5-6 Hi aha na ponsaihan-Ku beleyum, misa' hi aha anu basa' nu aha madi' osumbu' aijo'mo mian anu lengkat mae isalipu'an ka' madi' nu pangalati'i nu beleyum. De maluanyo beleyum Ku sai hi bansa anu susumo aijo' tantu aha mohongomo potatae nu beleyum.

⁷ Panyo bansa Israel na madi' ahi' mongka oho' beleyum ka' Aku mule' madi' ahi' nu palahatikan nu aha. Aha iwi-iwi' panggaga hondo ka' madi' tulu-tulutan.

⁸ Uuka aiya beleyum Ku potimbalimo da panggaga ka' mule' da baani susumo aha.

⁹ Beleyum Ku potimbalimo sumo batu gahanggan na kohosonnyo ka' kokutnyo sumo intan. Boli mabuhuk hi aha anu saja' motomuhuk aijo'.”

¹⁰ Lapas aijo' Tumpu notatae mule', “O, manusia anu madi' tumuu' batu, palahatikan ima-ima' ka' o, inau' pa apaa na anu Ku poto'i hi beleyum.

¹¹ Lako'mo mamba hi aha bansang nu beleyum anu binoamo ka' pinojoongmo kiijo' mae ka' potokakon apaa na anu Ku poto'i, Aku, Tumpu Anu Matangkas na Kuasanyo poto'i hi aha pa' nu hongo nu aha kabai na madi'.”

¹² Lantas Roh nu Tumpu nohangkatmo aku ka' aitu mae ihikungku ihongongkumo na potatae susumo gohung na kodaka'nyo nontaloakon, “Opuji' na Tumpu anu talasanggo kiita' i suluga'!”

¹³ Aku nohongomo onyi' nu polipik nu malaekat haha aijo' anu nompaha kabo-kabotmo, ka' mule' daladak nu bola nu loda anu daka' hondo na onyi'nyo sumomo ahi' onyi' nu luulu' kabai tano' madodo.

¹⁴ Kakuasa'an nu Tumpu na tinoka mae hi belengku, ka' salatan aku ihangkatmo ka' binoamo nu Roh-Nyo kinyonyoanku ingoa'anku napakatmo ka' mule' napanasmo.

¹⁵ Sahingga tinokamo na aku itampat pinomboan ka' pinompojoongan to mia-mian i Tel-Abib isonibi nu Kaunyo Kebar. Kopinnyo ingipitun na aku jinojoong ikiijo'; aku madi'mo noko ala nombau apa-apaa ka'binangangmo kalana iwi-iwi' aijo' aituje na ihongongku ka' tinoangku.

Tumpu nohangkatmo i Yehezkiel da monjagai Israel

¹⁶ Salatan pinitunsinaamo Tumpu notataemo mae hi belengku,

¹⁷ “O, manusia anu madi' tumuu' batu, beleyum Ku hangkatmo da monjagai bansa Israel. Potokakon na pokinde'-Ku anu Ku bee' hi aha sumo uuka,

¹⁸ De Ku poto'imo na samian anu ko palabuatannyo ma'idek tionyo ahi' opateimo, panyo beleyum madi' mompokinde'i ia da ia mombabali'i kalakuannyo, da ia salamat ahi' saba' ia silaka daagi' ahi' susumo samian na anu baladosa' ka' montanggungi ia sinilaka aijo', otuntut hi beleyum.

¹⁹ De beleyum mompokinde'i ahi' mian anu ma'idek na palabuatannyo aijo' ka' ia madi' mongka'oho' montibahakon palabuatannyo ma'i-ma'idek aijo' ia silakamo susumo mian anu baladosa' panyo beleyum salamatmo.

²⁰ De samian na anu ma'ima' na gau'nyo montampu'unimo mombau dosa' ka' ia Ku posingkabotakonmo isa'angu' na balaa' saba' ia silakamo de beleyum madi' mompokinde'iakon. Ia silakamo kalana iwi-iwi na dosa'nyo ka' palabuatannyo anu toto ima-ima' madi'mo Ku inau'. Panyo ia silaka aijo' Ku tuntutmo hi beleyum.

²¹ De mian anu ma'ima' na kinyonyoanyo aijo' nu pokinde'i ahi' nu beleyum da madi'mo mombau dosa' ka' nu tulutimo na pokinde' nu beleyum saba' ia madi'mo ahi' Ku hukum ka' mule beleyum salamatmo.”

I Yehezkiel jadimo momo'

²² Ku oa'i na kahosonan nu Tumpu tinokamo ka' ihongongkumo na Ia nontaloakon hi belengku, “Pobulamo ka' lako'mo mamba ibangka'nyo. Ikiijo'je mae na Aku basisik hi beleyum.”

²³ Sahingga aku nambamo i bangka'nyo ka' ikiijo' tinoangkumo na jingka jongkilaban hondo anu montandai Tumpu daagi'mo ikiijo' susumo anu toho'mo tinoangku isonibi nu Kaunyo Kebar. Lantas aku tinombahangkangmo dumo-dumon itano',

²⁴ panyo Roh nu Tumpu nompinsoopimo mae ka' nompotinjomo mae aku. Tumpu notataemo mae hi belengku, “Pinsusule'mo ka' sainjojoongmo i uno nu laigan.

²⁵ O, manusia anu madi' tumuu' batu beleyum osegotimo nu kahohon sahingga madi'mo moko ala mosabat ka' mule' madi'mo moko ala singkabot tiba mian,

²⁶ Ku pojadimo na jila' nu beleyum madi'mo moko ala mongkohenggo sahingga beleyum madi'mo moko ala mompokinde'i bansa anu saja' motomuhuk aiya.

²⁷ Saidi' mae de Aku po ule'mo motatae hi beleyum ka' po ule'mo mombee' kahosonan nu beleyum da timbalimo motatae, beleyum tionyo ahi' mompotokakonmo apaa na anu Ku poto'i, Aku, Tumpu Anu Matangkas na Kuasanyo mompoto'i hi aha. Sambahagian na aha aijo' saidi' mae mompotombihing, panyo sambagian mule' na madi' ahi' kalana aha memang bansa anu saja' motomuhuk.”