YEHEZKIEL 10 - KITAB NU TUMPU ALLA LELE MA'IMAI'

Tumpu nompala'imo Laigan-Nyo

¹ Lantas aku nonsindamo nokiita' anu susumo piboloyuk ibuan nu ubak nu malaekat ka' aku notoamo daagi' ko anu sumo tampat kajojoongan, batu nilam na binau.

² Lapas aijo' Tumpu notataemo hi aha mian anu singkap nompusok hude lenan aijo', “Pinsoopmo i olot nu bola nu loda haha aijo' anu i aluk nu malaekat haha aijo' pongala mae sangkakup na oba nu apu. Lantas okakambuhakonmo na oba aijo' ikota'.” Ia nontulutimo, ka' pinalahatikankumo.

³ Salatan ia ninsoopmo, malaekat haha aijo' tinuminjo'mo isasu salatan Laigan na Tumpu. Santompuk na kundom nonsongkohimo popasannyo anu i unonyo ka' mule' songko-songko na Laigan nu Tumpu.

⁴ Jingka anu majingka hondo salaku tanda Tumpu tinokamo najingka lengkat mae aijo' i malaekat haha aijo' ka' nolalinmo i sabatan pinsoopan mokiijo' i Laigan nu Tumpu sahingga popasannyo najingkamo hondo.

⁵ Onyi' nu polipik nu malaekat haha aijo' de mompapa'imo kahongoan toka-toka ipopasan anu isambiha'nyo, sumomo ahi' potatae nu Tumpu Anu Mahakuasa.

⁶ Lapas aijo' Tumpu nonsaimo mian anu nompusok hude lenan aijo' da mongala sangkakup na oba nu apu anu aijo' i'olot nu bola nu loda haha aijo' anu i'aluknyo nu malaekat haha aijo', mian aijo' ninsoopmo ka' tinuminjomo koko hi sala' sa'angu' na bola nu loda haha aijo'.

⁷ Lantas sala' samian na malaekat haha aijo' nonggoggoakonmo limanyo i uno nu apu anu aijo' itotonga' nu aha, ka' nontolukmo mae tinopia-piangkuka na oba ka' binee'nyomo hi mian anu nompusok hude lenan aijo'.

⁸ Tinoangku taalu' i'aluk nu polipik nu malekat aijo' toto samian daagi' ko anu susumo lima nu manusia.

^9-10 Tinangku mule' taalu' malaekat haha aijo' toto samian ko bola nu loda isohipi'nyo. Opa-opat na bola nu loda haha aijo' pokakana ka' jongkilaban susumo mainan anu ma'ima' hondo. Toto sa'angu' ko bola nu loda sa'angu' anu sangga'at mule' anu manintobat itotonga'nyo.

¹¹ Jadi malaekat haha aijo' timbali mamba i'opat na tampat anu nu patui nu aha. Aha moko ala ahi' mamba maumo pa' moya na nu ka'ima'i nu aha, madi' pilenje mombalik butong nu aha.

¹² Songko-songko na butong nu aha, tundun nu aha, lima nu aha, polipik nu aha ka' bola nu loda haha aijo' kaho ko matanyo.

¹³ Ihongongku taalu' bola nu loda haha aijo' osanggohi' “tombusisi'”.

¹⁴ Toto samian na malaekat haha aijo' ko ohupnyo anu madi' pokakana. Momona ohupnyo ohup nu sapi', ko ohua'nyo ohup nu manusia, ko totolu'nyo ohup nu singa, ko opatnyo ohup nu bonyia'.

^15-17 Malaekatmo haha aijo' na anu u'utu mae tinoangku isonibi nu Kaunyo Kebar. De mongkohenggomo na malaekat haha aijo' kabai mombokamo polipiknyo kahanda' lumahapmo mokiita' ilanga ka' lumahapmo mamba pa' moya kabai belentimo, loda haha aijo' saja' batu-batuk kalana nu kuasai ahi' nu malaekat haha aijo'.

¹⁸ Lantas jingka anu majingka hondo salaku tanda Tumpu tokamo, ka' mompala'imo sabatan pinsoopan i Laigan nu Tumpu ka' molalinmo mokiita' i malaekat haha aijo'.

¹⁹ Tinoangku na malaekat haha aijo' nombokamo polipiknyo ka' ilumahap nompala'imo tano' lantas nambamo, ka' bola nu loda haha aijo' suele ahi' batu-batuk. Lantas aha belentimo koko sabatan daka' i Laigan nu Tumpu anu isasu kabete'an, panyo jingka anu majingka hondo na tataap ahi' monjingkai aha.

²⁰ Aku tinonginau'mo taalu' aijo'mo ahi' na malaekat haha aijo' anu u'utu mae tinoangkumo i'aluk nu kakuasa'an nu Tumpu Israel isonibi anu Kaunyo Kebar.

²¹ Malaekat haha aijo' toto samian ko ohupnyo opat, ohua' na paan na polipiknyo ka' mule' daagi' ko anu susumo lima nu manusia i'aluk nu polipiknyo haha aijo'.

²² Ohup mu aha pokakanamo suele ohup nu malaekat haha aijo' anu tinoangkumo isonibi nu Kaunyo Kebar. Toto samian lumajang hodi-hodi' mompatui anu nu ahopimo.