TO MIA-MIAN KOPIAN 6 - KITAB NU TUMPU ALLA LELE MA'IMAI'

I Gideon

¹ Po'ule' mule' mian nu Israel binalado'a hi Tumpu, sahingga Ia nombee'mo hi bansa Midian da kinuasan nu aha pinopitu' na taun na kinopinnyo.

² Mian nu Israel nabuhukmo hondo hi aha mian nu Midian, sahingga aha lewa'mo natisuluk i liang ka' i tampat sangga'at anu madi' ko anu mompoposia i bungkutnyo.

³ Ka' mule' de aha mian nu Israel anu mongale' mosu'anmo apa-apaa, tokamo mae na mian nu Midian tiba aha mian nu Amalek ka' to mia-mian anu lengkat mae i padang bone', montumbuhi aha mian nu Israel.

⁴ Aha mombaumo kemah i da'erah Israel ka' mongidei sosu'anon iwi-iwi' anu kiijo' mae toka-toka i da'erah anu montikubi Gaza sasu selatan. Ka' mule' potuu'on domba, sapi' ka' keledai nu aha mian Israel opopalaihakonmo. Mau mule' pa' apaa madi' ko anu nu potuha' nu aha sahingga aha mian nu Israel madi'mo daagi' ko anu okaan.

⁵ Mian haha aijo' tinoka mae da'isan hondo tiba potuu'on ka' kemah nu aha manjoo' hondo na binoa mae nu aha. Aha tiba unta nu aha manjoo' hondo madi' opoko ala o bilang. Aha toka mae mongidei lipu' aijo',

⁶ ka' aha mian nu Israel imadi'mo hondo moko ala mompoposia aha.

⁷ Lapas aijo' aha mian nu Israel nomoitamo tulung hi Tumpu da aha moko ala mongewa mian nu Midian.

⁸ Tumpu nonsaimo samian na nabi namba hi aha. Nabi aijo' notatae, “Sumo uuka na koonyo nu Tumpu, Tumpu Allah nu mian Israel: 'Belemiu i lapasakon-Kumo da madi'mo obotuani i Mesir.

⁹ Belemiu pinosalamat-Kumo da madi'mo nu palentah nu aha mian Mesir tiba aha mian i lipu' aiya tempo'nyo belemiu nontumbuhimo aha, lantas binee'-Kumo hi belemiu na tano' nu aha.

¹⁰ Pinoto'ing-Kumo hi belemiu tukoong-Ku Akumo na Tumpu Allah nu belemiu, ka' tukoong-Ku belemiu madi'mo timbali monsombah to pilo-pilogot nu bansa Amori anu jinojoonganmo miu na lipu' nu aha tempo' uuka aiya. Panyo belemiu madi'mo nohongo-hongo anu pinalentahkon-Kumo.’ ”

¹¹ Daagi' kino sansinaan malaekat nu Tumpu tinokamo i kota Ofra, lantas sinumuhangmo i patu nu kau' terpentin, anu i Yoas, mian lee' mae i Abiezer. Anaknyo anu sanggonyo i Gideon, hau-haunyo mongutut gandum i tampat pompao'an anggur. Ia nokalaja aijo' natisuluk da aha mian nu Midian madi' montoa ia.

¹² Malaekat nu Tumpu aijo' nanintoamo hi ia, “O, olitau anu mahoson ka' baani! Tumpu monsangaja'imo beleyum!”

¹³ Tinaaman i Gideon, “Ampun, tuan! De totu'u belento Tumpu monsangaja'imo mae kami kadaka' iwi-iwi' na han aiya nongkonamo mae kami. Iyamo na han anu okabangangi iwi-iwi', anu toho'mo binau nu Tumpu naipuan mae anu sinisikmo nu mompolee' mami mosia na Tumpu nonsabatakonmo aha lengkat mae i Mesir? Uuka aiya Tumpu nompala'imo kami ka' nompojohokmo kami nukuasai nu aha mian Midian.”

¹⁴ Lapas aijo' Tumpu nombee'imo palentah aiya hi Gideon, “Tiba kahosonan ka' kabaanian nu beleyum iwi-iwi', lako'mo lapasakon na mian nu Israel da bolimo nukuasai nu mian Midian. Akumo na anu nompokau beleyum.”

¹⁵ Tinaaman i Gideon, “Mosiamo na aku, Tumpu? Iya na jadi ku poko ala molapasakon mian nu Israel da bolimo nukuasai nu aha mian Midian. Hi tulunan nu bansa Manasye kamimo na mian anu madi' baani ka' mahoson. Ka' hi kami sampoto utusan akumo na anu madi' ko kaliangannyo.”

¹⁶ “Moko ala mombau na beleyum!” na koonyo nu Tumpu, “kalana Akumo na montulungi beleyum. Aha mian nu Midian dengke na beleyum mompatei ola susumo beleyum mongahopi samian.”

¹⁷ Tinaaman i Gideon, “De aku totu-totu'u nuka'ima'i nu belento Tumpu, soba bee'i mae sa'angu' na tanda salaku bau pomponyata' saba' Tumpu na nombee'i mae palentah atina' hi belengku.

¹⁸ Ku poita da sanang na belento Tumpu montanda'i pe'e i aiya da ku tatui pe'e anu okaan hi belento Tumpu.” “Timbali,” na koonyo nu Tumpu, “Ku tanda'i na beleyum sampe beleyum minsusule'mo mae.”

¹⁹ Sahingga nambamo na i Gideon, lantas nongkola'mo sa'angu' na mee' anu daagi' bata'nyo ka' nongala labu sampulu' na kilogram, lapas aijo' nombaumo roti anu madi' ginalo'an ragi. Lapas aitu antoknyo anu kinola'mo aijo' pino'isinyomo i kalanjang ka' boulonnyo ingisinyo i kuhon, lantas iwi-iwi' aijo' binoanyomo ka' tinotuakonnyomo hi malaekat nu Tumpu anu hau-haunyo nontanda'i i patu nu kau' terpentin aijo'.

²⁰ Malaekat nu Tumpu aijo' notataemo, “Potimpasmo na antoknyo ka' roti atina' i batu aiya ka' bouloni nu boulon nu antoknyo aijo'.” I Gideon nombaumo apaa na anu pinalentahkonmo hi ia.

²¹ Lapas aijo' malaekat nu Tumpu aijo' nompotikmo tuu' nu kau' anu totoong hi ia i antoknyo ka' i roti aijo'. Batu aijo' i noakmo ka' nopapumo madi'mo ko anu tinontuha' na antoknyo ka' roti aijo'. Lapas aijo' madi'mo ko anu tinoa na malaekat aijo'.

²² I Gideon sininsumbu'mo taalu' anu tinoka mae aijo' hi ia malaekat nu Tumpu. Sahingga ia nabuhukmo ka' notatae na i Gideon, “Silakamo na aku, o Tumpu Anu Matangkas na kuasanyo! Kalana aku nompaha tonto'mo tiba malaekat nu belento Tumpu!”

²³ Panyo Tumpu notatae hi ia, “Tendamo! Boli mabuhuk. Beleyum madi' silaka.”

²⁴ Lantas i Gideon nompotinjomo sa'angu' na mezbah ikiijo' ka' sinanggohannyo “Tumpu na Pinolengkatannyo mae nu Ka'ima'an”. Mezbah aijo' daagi' kiijo' i Ofra, aijo'mo kota nu aha mian Abiezer.

²⁵ Pihi-pihi aijo' Tumpu nombee'imo palentah sumo uuka hi Gideon, “Ala na sapi' lakinyo anu nu tuuma nu beleyum, aijo'mo sapi' anu ma'ima' hondo umunnyo popitu'mo na taun. Tatakimo na mezbah anu pinotinjo nu tuuma nu beleyum bau ponsomban Baal, lantas tua'akonmo na ohi'nyo anu bau pontandai Pilogot boune Asyera anu i sohipi'nyo nu mezbah aijo'.

²⁶ Potinjo i tambulannyo aijo' sa'angu' na mezbah anu lewa'mo tinutugan ima-ima'. Lapas aitu sapi' lakinyo aijo' iwi-iwi' tionyo ahi' nu potunu salaku bau koloban hi Tumpu. O ala na ohi' anu binau pontandai Pilogot boune Asyera anu tinua'akonmo nu beleyum aijo' da bau kau' anu oposun.”

²⁷ Sahingga i Gideon nompile'imo aha sampulu' na mian posaihonnyo lantas nambamo nombau apaa na anu pinalentahkonmo nu Tumpu hi ia. Panyo kalana ia talalo mabuhuk hi sampoto utusannyo ka' hi to mia-mian i kampung aijo', ia madi' baani na mombau han aijo' sina-sinaa. Jadi binaunyo na aijo' pihi-pihi.

²⁸ Salatan anu jojoong i kota aijo' nobulamo dodododopnyo subu-subu tinoamo nu aha na mezbah ponsomban Baal ka' ohi'nyo anu pontandai pilogot boune Asyera notua'mo. Ka' tinoa mule' nu aha na tampat aijo' pinotinjoanmo sa'angu' na mezbah ka' mule' pinompotunuanmo sapi' lakinyo salaku koloban.

²⁹ Aha nompaha poki-pokilawamo samian ka' samian, “Ihe na anu nombaumo sumo aiya?” Salatan pinaha pokilawamo, i humpakmo nu aha taalu' i Gideon anak i Yoas na nombau han aijo'.

³⁰ Lantas aha notataemo hi Yoas, “Anak nu beleyum nongideimo mezbah nu Baal ka' nontua'akonmo ohi'nyo anu bau pontandai Pilogot boune Asyera anu i sohipi'nyo nu mezbah aijo'. Kalana aitu, boa mae na anak nu belento aijo' i sambiha'nyo aiya. Ia tionyo ahi' opateimo!”

³¹ Panyo tinaaman i Yoas hi aha iwi-iwi' anu nongka'idekimo aijo', “Pa' belemiu mongka'ima'i Baal ka' monsangaja'imo ia? Ihe na monsangaja'i ia opateimo sinaa aiya! De memang Baal aijo' Tumpu Allah yo bakas da ia mosi sangaja'ije butongnyo, kalana anu ingideanmo aijo' mezbahnyo.”

³² Kalana i Yoas notatae, “Pojohok da i Baalmo na mongewa i Gideon, kalana ia nongideimo mezbahnyo,” sahingga nolengkat pe'e i aijo' mian nonsanggohimo i Gideon “Yerubaal”.

³³ Tempo'nyo aitu aha iwi-iwi' mian nu Midian, Amalek tiba tulunan nu to bansa-bansa sangga'at i padang bone' sasu kabete'an Yordan sinihukmo. Aha notaapmo i Kaunyo nu Yordan ka' binakemahmo i hatanyo nu Yizreel.

³⁴ Panyo i Gideon kinuasanmo nu Roh nu Tumpu sahingga pinuhannyomo na tolompet polaga aha mian nu Abiezer da toka mae mosa'angu' tiba ia.

³⁵ Ia mule' nonsaimo mian namba hi tulunan nu bansa Asyer, Zebulon, Naftali, tiba hi tulunan nu bansa Manasye – anu i sasu kabete'an ka' anu i sasu kinsoban nu Yordan mompoita tulung da aha mosa'angu' tiba ia. Sahingga aha iwi-iwi' tinokamo da montulungi i Gideon.

³⁶ Lantas i Gideon notataemo hi Tumpu Allah, “O Tumpu, belento nontaloakonmo tukoonto belento kahanda' mongala aku da mompobebasmo aha mian nu Israel.

³⁷ De memang sumo aijo', yo i tano' aiya, i tampat mami biasa mongutut gandum pinotimpaskumo na bulu nu domba anu ginuntingmo. De dodop ola bulu nu domba aiya na nu humpisi nu dondu'ok, ka' tano'nyo na madi', jadi aijo'mo na pontoan taalu' belento nongalamo aku bau pompobebas aha mian nu Israel.”

³⁸ Sahingga tinimbalimo susumo aijo': Salatan i Gideon nobulamo dodododopnyo subu-subu ka' nompao'imo bulu nu domba aijo', ia nohumpak uee nu dondu'oknyo sinamangko'.

³⁹ Lantas ia notataemo hi Tumpu Allah, “O Tumpu, boli motambuha' de aku po'ule' mule' motatae. Pobee' pe'e mae na aku po'ule' monggunting bulu nu domba aiya da bau pontoanku mule' tanda. Panyo uuka aiya bulu nu domba aiya na tataap moti'i ola tano' na humpismo.”

⁴⁰ Pihi-pihi aitu Tumpu Allah nombaumo apaa na anu pinoitamo i Gideon aijo', sahingga dodododopnyo subu-subu bulu nu domba aijo' tinoa memang moti'i, panyo tano'nyo i humpisanmo nu dondu'ak.