Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

TO MIA-MIAN KOPIAN 5 - KITAB NU TUMPU ALLA LELE MA'IMAI'


Nyanyian i Debora tiba i Barak

1 Sinaa aitu nanyanyimo na i Debora tiba i Barak anak i Abinoam. Sumo uuka na koonyo nu aha:

2 Opuji' na Tumpu kalana suludadu iwi-iwi' nu aha mian Israel mongka'oho'mo mahampate, ka' mian da'isan suele mongka'oho'mo mamba mahampate.

3 Potombihing belemiu to tomu-tomundo ka' to anak-anak nu tomundo aku monyanyiakonmo Tumpu Allah nu aha mian Israel, aijo'mo Tumpu.

4 Tempo'nyo belento nambamo lengkat mae i Seir, o Tumpu, ka' da'erah nu Edom pinala'ianmo mae nu belento dunia ginayu'anmo, got nu uee anu kiita' i langit nolosutmo, ka' kundom nombulakakonmo ueenyo.

5 To bungku-bungkutnyo ginayu'anmo i ahop nu anu mongkuasai Sinai, i ahop nu Tumpu, Tumpu Allah nu aha mian Israel.

6 Tempo'nyo i Samgar, anak i Anat, ka' tempo'nyo suele i Yael, i lipu' madi'mo ko anu lumambanan sumake' i unta, madi'mo ko anu lumambanan lumajang i jalan daka'.

7 Iwi-iwi' na kota nu aha Israel madi'mo ko anu jinojoong, i liingmo sahingga belento Debora, tinokamo mae; belento tinoka mae sumomo tina anu okanonongi.

8 Salatan Israel nonsombahmo pilogot, sinidamo na pahampatean i lipu' nu aha; aha anu 40.000 na suludadu nu bansa, mau pe'e ola samian madi' ko anu nontangkakon pimuhuknyo.

9 Kona hi aha kapala nu suludadu nu aha Israel anu matangkas hondo na pangkatnyo anu sanang na kinyonyoanyo nompoita mamba mahampate talalo hondo ku angga'i. Opuji' na Tumpu!

10 Obelemiu anu monsilakai keledai mopute', belemiu anu suha-suhang i ampas anu ma'ima', ka' belemiu iwi-iwi' anu lumajang tengke, polelemo na sisikon anu inguntung na nahampate aijo'!

11 Koko bubung haha aijo' i hongomo na mian balame-lame', nonsisikmo Tumpu saja' inguntung na nahampate, Israel inguntung na nahampate, mian anu pinalesayamo hi Tumpu. Sahingga aha nojijimo nambamo i sabatan daka' nu kota.

12 Tinjomo Debora, ka' panyanyimo. Tinjomo Barak, boamo na anu tinalungku'!

13 Suludadu anu me tuha'nyo tinokamo hi polaya' nu aha, aha tinokamo ka' kahanda'mo mahampate montinjohakon Ia.

14 Aha i lumajangmo lengkat mae i Efraim nambamo i bangka'nyo, nombatuki suludadu, i Benyamin na nojiji i ahop nu aha. Lengkat mae i Makhir tinokamo na to kapa-kapala nu suludadu anu matangkas hondo na pangkatnyo, ka' lengkat mae i Zebulon tinokamo na to pola-polaya' nu suludadu.

15 To tu'a-tu'anyo nu aha Isakhar tinokamo tiba i Debora, suele, i Isakhar tinokamo, ka' i Barak suele i namba aha nombatuki ia nokaiyong i bangka'nyo. Panyo tulunan nu bansa Ruben daagi' lewa' mompotutugakon tanga'an kalana aijo' hi aha tanga'an nu aha ma'isa nosa'angu'.

16 Kadaka' aha ola jojoong i to domba-domba? Pa' ola da mompotombihing polaya' domba molaga potuu'onnyo? Memang tulunan nu bansa Ruben daagi' lewa' mompotutugakon tanga'an, kalana aijo' hi aha tanga'an nu aha ma'isa nosa'angu'.

17-18 Hau-haunyo aitu i Zebulon tiba i Naftali nongewamo totu-totu'u na nahampate, tulunan nu bansa Dan ola sinumake' i kapan, ka' tulunan nu bansa Gad ola jojoong kiijo' mae i santoa nu Yordan sasu kabete'an, ka' mule' tulunan nu bansa Asyer ola momohokot ka' madi' malai mompala'i kajojoongan nu aha i sonibi nu bone'.

19 Kiijo' i Tanaakh koko kaunyo nu Megido, to tomu-tomundo nahampatemo, To tomu-tomundo nu Kana'an nahampatemo, panyo salaka madi' ko anu binoa mae nu aha salaku anu pinahuhuakon mae.

20 to manda-mandala' suele nahampatemo nongewa Sisera, lengkat mae aita' i langa.

21 Kaunyo nu Kison nosawemo nonganjuhakonmo sampobali' nu aha. Tumbuhimo, tumbuhimo babaani ka' paho-pahoson o kinyonyoangku!

22 Tengke nu ajahan nonggalapakmo kalana nopadeka'mo lia-lia' kalana tinigamo nu aha nonsake'i.

23 “Okutuki na Meros, ka' anu jojoong ikiijo',” na koonyo nu malaekat nu Tumpu “kalana aha madi' tinoka mae nontulungi salaku suludadu anu mahampate bau pompopodaka' Tumpu.”

24 Inguntungmo na i Yael, bengkele' i Heber mian nu Keni; aha iwi-iwi' anu jojoong i kemah, iamo na anu talalo mohumpak balakat.

25 I Sisera nomoita uee, panyo susu na binee'nyo hi ia, i mangko' anu ko angga'nyo na pinombee'iannyo susu hi to tomu-tomundo.

26 Kau' pakakas nu kemah ka' malatelu i limanyo na i Yael nompatei i Sisera sahingga nobiha' na ubaknyo.

27 I tengke i Yael na ia notua' madi'mo kino nyawanyo timpa-timpas i tano' sinilakamo.

28 I jalaja' nu tolongan na pinonsiligian nu bengkele' i Sisera, ka' notatae, “Kadaka' karetanyo madi'mo tinoka, kadaka' madi'mo i hongo na galupak nu ajahannyo?”

29 Aha to posa-posaihon boune anu manonong hondo na kinyonyoanyo nontaamimo sumo anu i hongonyomo i uno nu kinyonyoanyo:

30 “Aha hau-haunyo nombagi-bagimo anu pinahuhuakon na to bala-balang toto samian na suludadu, nohumpak samian kabai ua'aha na to lalangkoyang anu ma'isa toho' no'osoa. Kakona hi Sisera, i humpak na baju' anu ko angga'nyo hondo, da obee' hi bengkele' nu tomundo, salendang anu ko suji'nyo manjoo' na ngangahan nu buhitnyo.”

31 O amalakon da iwi-iwi' na sampobali' nu belento o Tumpu, mate susumo i Sisera, panyo iwi-iwi' na anu mompahasumbu' belento Tumpu talasanggo susumo jingka aita' i langa! Lapas aijo', madi'mo ko anu nompoposia lipu' aijo' pinatompulu' na taun na kinopinnyo.

ကြှနျုပျတို့နောကျလိုကျပါ:



ကြော်ငြာတွေ