TO MIA-MIAN KOPIAN 1 - KITAB NU TUMPU ALLA LELE MA'IMAI'

Tulunan nu bansa Yehuda tiba tulunan nu bansa Simeon nohakopmo i Adoni-Bezek

¹ Salatan i Yosua sinilakamo, aha mian nu Israel nompokilawamo hi Tumpu, “O Tumpu, tulunan nu bansa ihe anu aiya hi kami na tionyo ahi' momona mamba montumbuhi aha mian Kana'an?”

² Tinaaman nu Tumpu, “Tulunan nu bansa Yehuda. Aha binee'an-Kumo kuasa da mompatundu' lipu' aijo'.”

³ Lantas notataemo na tulunan nu bansa Yehuda hi tulunan nu bansa Simeon, “Tulungi mae na kami mamba mompahampateakon mian nu Kana'an ka' mompatundu' da'erah anu binee'mo nu Tumpu hi kami. Kami sueleje montulungi belemiu mamba mompatundu' da'erah anu binee'mo nu Tumpu hi belemiu.” Sahingga tulunan nu bansa Simeon

⁴ tiba Yehuda nambamo nahampate hingga-hinggat. Ka' Tumpu nombee'imo ka'untungan nahampate hi aha nongewa aha mian nu Kana'an tiba aha mian nu Feris. Sampulu' na madala nu suludadu nu sampobali' i nate kiijo' i Bezek.

⁵ Aha nongkabotmo i Adoni-Bezek, tomundo nu lipu' aijo' ka' nontumbuhimo ia.

⁶ Ia nopalaimo, panyo i loloi'mo nu aha ka' nohakop ia lantas kanumpu nu lima ka' kanumpu nu tengkenyo pinataganmo.

⁷ Koonyo i Adoni-Bezek, “U'utu mae pitumpulu' na tomundo pinatagakonkumo na kanumpu nu limanyo ka' kanumpu nu tengkenyo, lantas pinojohokumo na aha mongkaan tuuha' nu anu kinaanmo anu manabu lengkat mae aita' i meja'ku. Uuka aiya Tumpu Allah nombaumo aku pokakana sumo aku nombaumo aha.” I Adoni-Bezek ahennyo binoamo i Yerusalem, ka' ikiijo'mo mae na ia sinilaka.

Tulunan nu bansa Yehuda nompatundu'mo Yerusalem tiba Hebron

⁸ Aha mian nu Yehuda nontumbuhimo Yerusalem, lantas nompatundu'mo ka' nompapuimo kota aijo' ka' nompapuimo miannyo.

⁹ Lapas aijo' aha namba mule' nontumbuhi aha mian nu Kana'an anu jojoong aita' mae i da'erah nu bungkutnyo; ka' suele anu jojoong i sohipi' nu puge'nyo; ka' mule' anu jojoong i da'erah anu mapeges, sasu selatan.

¹⁰ Ka' i kota Hebron, aijo'mo kota anu naipuan mae sinanggohan Kiryat-Arba. Ikiijo' aha mian nu Yehuda nompatundu'mo aha mian nu Sesai, Ahimin tiba Talmai.

I Otniel nompatundu'mo kota Debir

¹¹ Lengkat mae i Hebron, aha mian nu Yehuda nambamo nontumbuhi kota Debir, anu tempo'nyo aitu sinanggohan Kiryat-Sefer.

¹² Samian na tulunan nu bansa Yehuda sanggonyo i Kaleb, notatae, “De ihe na moko ala mompatundu' Kiryat-Sefer, ia timbali mongosoai anakku boune i Akhsa.”

¹³ I Otniel anak i Kenas, i Kenas aijo' utus ise' i Kaleb na nompatundu' kota aijo'. Sahingga i Kaleb nombee'mo i Akhsa, anaknyo da baumo bengkele'nyo i Otniel.

¹⁴ I sinaa pinompo'osoan aha, i Otniel sabole-bolemo nompoto'i hi Akhsa da momoita tano' hi tuumanyo. Sahingga nintatau'mo na i Akhsa aita' sake-sake' i keledainyo lantas pinokilawamo i Kaleb hi ia, apaa na anu nu kahanda'i Akhsa.

¹⁵ I Akhsa nontaami, “Anu ku kahanda'i to pia-piangkuka na bulakan nu uee kalana tano' anu binee'mo nu belento tuumangku hi belengku aijo' i da'erah anu mapeges.” Sahingga binee'anmo i Kaleb na ia bulakan nu uee i sasu sandakan ka' bulakan nu uee i sasu minanganyo.

Ka'untungan nahampate nu aha tulunan nu bansa Yehuda tiba tulunan nu bansa Benyamin

¹⁶ Lee' mae nu monian i Musa, aijo'mo aha mian nu Keni, nombatuki mae mian nu Yehuda nosabat mae lengkat i Yerikho kota Kurma, ka' nambamo i da'erah anu mapeges sasu selatan Arad i da'erah nu Yehuda. Ikiijo' mae aha jinojoongmo itotonga' nu aha bansa Amalek.

¹⁷ Lapas aijo' hingga-hinggat tiba tulunan nu bansa Simeon, tulunan nu bansa Yehuda aijo' nambamo nontumbuhi ka' nompatundu'mo aha mian nu Kana'an anu jojoong i kota Zefat. Aha nongkutukimo kota aijo' lapas aijo' nohopu'imo ka' nonsanggohimo Horma.

^18-19 Tumpu nontulungimo aha mian nu Yehuda sahingga aha noko alamo nompatundu' da'erah anu i bungkutnyo. Panyo aha madi' noko ala nompatundu' Gaza, Askelon kabai Ekron, tiba da'erahnyo iwi-iwi' anu ikiijo', kalana bansa haha aijo' jojoong iwi-iwi' i sonibi nu bone' ko kareta bau pahampate besak na binau; kalana aijo' aha mian nu Yehuda madi' noko ala nolaa' aha.

²⁰ Sumo anu pinalentahkonmo i Musa, Hebron obee' hi Kaleb, kalana naipuan mae totolu' na tompukan nu mian lee' mae i Enak i laa'mo i Kaleb nosabat i kota aijo'.

²¹ Tulunan nu bansa Benyamin madi' noko ala nolaa' aha mian nu Yebus nosabat nompala'i kota nu Yerusalem. Mokonyo aijo' aha mian nu Yebus daagi' jinojoong ikiijo' hingga-hinggat tiba aha tulunan nu bansa Benyamin.

To tulu-tulunan nu bansa lee' mae i Yusuf nompatundu'mo Betel

^22-23 Tulunan nu bansa Efraim tiba Manasye lee' mae i Yusuf nambamo nontumbuhi kota Betel, anu tempo'nyo aitu sinanggohan Lus. Ka' Tumpu nontulungimo aha. Tempo'nyo anu mondoyoni sinaimo namba i kota aijo',

²⁴ aha siningkabotmo tiba samian na mo'ane anu lengkat mae i kota. Koonyo nu aha hi ia, “De beleyum mongka'oho' montulungi kami da kami moko ala minsoop i kota aijo' madi'je opoposia mami na beleyum.”

²⁵ Sahingga mian aijo' nompotiju'mo jalan pinsoopan i kota aijo'. Lantas aha mian nu Efraim tiba Manasye ninsoopmo i kota aijo' ka' nompateimo iwi-iwi' na anu jojoong ikiijo' ola mian aijo' tiba to utu-utusnyo na madi' pinatean.

²⁶ Lapas aijo' ia nolalinmo i lipu' nu aha mian Het, lantas nombaumo sa'angu' na kota ikiijo' ka' sinanggohannyomo Lus. Kota aijo' sanggonyo daagi' sabole-bole sumo aijo'.

To bansa-bansa anu madi' i laa' nu mian Israel

²⁷ Tulunan nu bansa Manasye madi' nolaa' anu jojoong i kota Bet-Sean, Taanakh, Dor, Yibleam ka' Megido tiba to kampu-kampung anu ohani ikiijo'.

²⁸ Memang salatan mian nu Israel nompaka pahosonmo i han iwi-iwi', aha nompakisamo mian nu Kana'an da mombauakon kalaja nu aha, panyo aha madi' nolaa' aha mian nu Kana'an aijo' da boli jojoong ikiijo'.

²⁹ I kota Gezer, tulunan nu bansa Efraim madi' nolaa' aha mian nu Kana'an anu jojoong i kota aijo'. Jadi aha mian nu Kana'an daagi' tataap jinojoong ikiijo' hingga-hinggat tiba aha.

³⁰ Aha jojoong i kota Kitron tiba Nahalol madi' suele i laa' nu aha tulunan nu bansa Zebulon. Mokonyo aijo' bansa Kana'an daagi' tataap jinojoong ikiijo' hingga-hinggat tiba aha, panyo mian nu Kana'an haha aijo' opakisamo da mombauakon kalaja nu aha.

³¹ Anu jojoong i kota Ako, Sidon, Ahlab, Akhzib, Helba, Afek tiba Rehob suele madi' i laa' nu aha tulunan nu bansa Asyer.

³² Mokonyo aijo' aha mian nu Kana'an, tumpu nu lipu' aijo' daagi' tataap jinojoong ikiijo' hingga-hinggat tiba aha mian nu Asyer.

³³ Anu jojoong i kota Bet-Semes ka' Bet-Anat suele madi' i laa' nu tulunan nu bansa Naftali. Mokonyo aijo' aha mian nu Kana'an tumpu nu lipu' aijo' daagi' tataap jinojoong ikiijo' hingga-hinggat tiba aha mian nu Naftali. Panyo aha opakisamo da mombauakon kalaja nu aha mian nu Naftali.

^34-35 Bansa Amori daagi' tataap jojoong kiijo' i Ayalon, Saalbim tiba i Bungkutnyo nu Heres, kalana tulunan nu bansa Dan pinakisamo sinai nu aha mamba i da'erah nu bungkutnyo, ka' madi'mo pinobee' mokaiyong i hatanyo. Panyo bansa Amori aijo' saja' nusansala nu tulunan nu bansa Efraim tiba Manasye ka' opakisa mombauakon kalaja nu aha, na ohua' na tulunan nu bansa aijo'.

³⁶ I sasu utara Sela potempasan nu aha mian nu Amori motulu i Pindakoan mokiita' i Akrabim.