TITUS 1 - KITAB NU TUMPU ALLA LELE MA'IMAI'

¹ Anakku i Titus! Aku i Paulus nontulis sulat aiya salaku posaihon nu Tumpu ka' rasul i Yesus Kristus. Aku pinile'anmo ka' sinai da montulungi to mia-mian anu pinile'anmo nu Tumpu da timbali mahoson i kapalesaya'an nu aha. Aku mule' tionyo molaya' aha da monsumbu' pangajalan anu totu'u, anu ingajalakonmo nu agamanto.

² Pangajalan aijo' nimpu'u i anu otaha'imani, aijo'mo kita montalimaje kantumuu'an kopian ka' sampe toka sidu-sidutu'. Tumpu Allah nonjanji'mo kantumuu'an aijo' ma'isa pe'e dunia aiya tinimbali – ka' Tumpu madi' toho' baleko'.

³ I tempo' anu na tantumo, Tumpu momponyata'mo anu jinanji'-Nyomo, apaa na anu pinotuun-Nyomo aijo'. Potuunon aijo' pinalesayakonmo hi belengku, ka' pinolelengkumo kalana palentah nu Tumpu anu Momposalamat kita.

⁴ Titus, beleyum atina' totu-totu'u anakku, kalana beleyum ka' aku hingga-hinggat pinalesayamo hi Kristus. Ku taha'imani ka' o'amalakon da Tumpu Tuumanto ka' i Kristus Yesus Tomundo anu Momposalamat kita, mombee'i balakat ka' ka'ima'an hi beleyum.

Pakalaja'an i Titus kiijo' i Kreta

⁵ Aku nompala'imo beleyum i Kreta da beleyum timbali mongkalesang to hahan anu daagi' palalu o atun. Ka' mule', da beleyum mohangkat to pola-polaya' nu jama'at i batu-batu kota. Ka' o inau' na sonto-sonto' anu kupoto'i aiya:

⁶ Samian na polaya' nu jama'at tionyo ahi' samian anu madi' ko kasala'annyo; ia tionyo ko bengkele' ola samian; to ana-anaknyo tionyo ahi' pinalesayamo hi Kristus ka' misa' sumo to ana-anak anu lausala ka' anu madi' opoko ala o atun.

⁷ Polaya' nu jama'at atina'mo mian anu mongatun pakalaja'an nu Tumpu, ia madi' timbali ko kasala'annyo. Ia madi' timbali kobubuun kabai saja' pusa, kabai saja' malangu, kabai mongka'ima'i mahantuda', kabai kinyonyoa saja' mompopikilakon doi.

⁸ Ia tionyo ahi' sanang na montalima mian anu sonsoo' i laigannyo, mongka'ima'i hahan anu ma'ima', timbali mongatun butong, jujun, susi' ka' ta'atun.

⁹ Ia tionyo montoongi hoso-hoson pangajalan anu timbali opalesaya, sumo anu ingajanakonmo hi ia. Tiba jalan anu sumo aijo' ia moko ala mompokinde'i mian kalana montoongi pangajalan anu totu'u, ka' momponyata' kasala'an nu to mia-mian anu mompisala'i ia.

¹⁰ Kalana manjoo' na mian anu moto muhukmo, lebe-lebe to mia-mian anu u'utunyo mae montoongi agama Yahudi; aha mongakali mian sangga'at nu potatae nu aha anu madi' ko gunanyo.

¹¹ Mian anu susumo haha aijo' tionyo ogintumi na nganga'nyo, kalana aha mompotasibu manjoo' na auwan kalana to panga-pangajalan anu madi' ko gunanyo. Aha mombau sumo aijo' ola kalana mongka'oho' molio kauntungan anu madi' pantas!

¹² Toho' kino posi nabi nu aha, anu lengkat mae i Kreta suele, notatae, “To mia-mian nu Kreta saja' baleko', ka' sumo binatang anu bahangihi', mabebes ka' moluluk.”

¹³ Apaa na anu tinaloakon nu nabi aijo' memang totu'u. Aijo' na sababnyo beleyum tionyo ahi' sabole-bole montewa' aha; da aha tataap mintoong i jalan anu totu'u

¹⁴ ka' madi'mo daagi' montoongi i sisik nu aha Yahudi anu madi' totu'u kabai atu-atulan anu binau nu to mia-mian anu madi' montalima pangajalan anu totu'u aijo'.

¹⁵ Iwi-iwi na apaa susi' kona hi to mia-mian anu susi'. Panyo kona hi to mia-mian anu pikilannyo mahenyu ka' anu madi' palesaya, madi' hondo-hondo ko anu susi', kalana pikilan ka' kinyonyoa nu aha nahenyumo!

¹⁶ Aha notatae, tukoonyo aha monsumbu' nu Tumpu, padahan palabuatan nu aha madi' totu'u. Aha monsaduakon da mongkahumimi'i ka' madi' mongka'oho' tulu-tulutan; aha aijo'mo na to mia-mian anu madi' moko ala mombau apa-apaa na anu ma'ima'.