ROMA 11 - KITAB NU TUMPU ALLA LELE MA'IMAI'

Ka'ima'an nu kinyonyoa nu Tumpu hi bansa nu Israel

¹ Aku mompokilawa: Apaa Tumpu nongalinmo mian-Nyo anu pinalesayamo? Tantu madi'! Aku pe'e mian nu Israel lee' mae i Abraham anu tinonsoop i bansa Benyamin.

² Madi'! Tumpu madi' mongalin mian-Nyo anu palesayamo, anu pinile'an-Nyomo salatanmo pe'e i moona. To Utu-utus monsumbu' apaa na anu tinulis i uno nu Kitab nu Tumpu mongkona i Elia, tempo'nyo ia nompotoka han anu tinimbali i Israel hi Tumpu Allah. I Elia notatae,

³ “Kita Tumpu, to mia-mian nompateimo to nabi-nabi-nTo ka' nohopu'imo iwi-iwi' na tampat ponsombahkonan kuluban anu o bee' hi Kita. Me aku sausa' ka' kahanda'mo nupatei nu aha na aku.”

⁴ Apaa na pinontaami nu Tumpu hi Elia? Tumpu nontaami, “Aku daagi' nomposisa popitu' na madala na mian anu monsombah Aku. Aha ma'isa toho' nonsombah Pilogot nu Baal.”

⁵ Sumo aitu mule' tempo' uuka aiya: Daagi' ko to mia-mian sangkiding anu pinile'anmo nu Tumpu, kalana balakat-Nyo.

⁶ Ia nompile'i aha kalana balakat-Nyo, ka' misa' mimpu'u i ka'ima'an nu kinyonyoa nu aha. Kalana de pompile'i nu Tumpu aijo' mimpu'u i ka'ima'an nu kinyonyoa nu mian, nyata' balakat nu Tumpu aijo' misa'mo balakat anu totu-totu'u.

⁷ Jadi, mosia? Mian nu Israel anu palesayamo madi'mo mohumpak apaa na anu nulio nu aha. Anu mohumpak ola santompuk ise-ise' na mian anu pinile'anmo nu Tumpu. Iwi-iwi' sangga'at ola pinanggaga madi' nompa juli polaga nu Tumpu.

⁸ Kalana i uno nu Kitab nu Tumpu tinulismo sumo uuka, “Tumpu nompotimbalimo kinyonyoa tiba pikilan nu aha da ponga'; ka' sampe tempo' uuka mata nu aha madi' moko ala montoa, tiba bihing nu aha madi' moko ala mohongo.”

⁹ I Daud notatae suele, “Bakas da bau-bauon nu aha timbali bau posi pohakop aha, ka' timbali bolo', tampat nu aha manabu' ka' mohopu'!

¹⁰ Bakas da anu nutoa nu aha timbali pintung da aha madi' moko ala montoa; ka' pojohok na aha da timbali tadungkung sampe toka sidu-sidutu'.”

¹¹ Ku pokilawa mule': Tempo'nyo mian nu Yahudi nanabu'mo, te aijo' tinimbalimo da aha mohopu'? Madi' sahondo-hondonyo! Panyo kalana aha baladosa', sahingga ola ahi' bansa sangga'at na pinosalamat, sahingga nonsabapimo mian nu Yahudi nasakitmo na kinyonyoa hi bansa sangga'at aijo'.

¹² Kalana bansa Yahudi nombaumo sala' ka' madi'mo nohongo-hongo pongka'oho' nu Tumpu, sahingga bansa-bansa sangga'at binalakatanmo nu Tumpu. Apaa mule' de pompahasumbu'an nu bansa Yahudi tiba Tumpu nompo'ule'mo na'ima'; tantu lebe daka' na balakat anu Nubee' nu Tumpu!

Kasalamatan nu bansa-bansa sangga'at anu misa' Yahudi

¹³ Panyo uuka aiya lebe ma'ima' aku basisik hi to Utu-utus anu misa' Yahudi! Sapinnyo uuka, salaku Rasul hi to bansa-bansa anu misa' Yahudi, aku talalo hondo mongangga'i kalajangku.

¹⁴ Ku kahanda'i da aku moko ala monsakiti kinyonyoa nu posi bansangku, da tiba jalan aijo' aku moko ala momposalamat sambagian anu aijo' hi aha.

¹⁵ Kalana aha madi'mo tinalima nu Tumpu, sahingga pompahasumbu'an nu dunia tiba Tumpu mompo'ule'mo ma'ima'; apaa mule' de aha otalima nu Tumpu! Tantu aijo' pokakanamo sumo mian mate po'ule'mo tumuu'!

¹⁶ De sandihis na roti anu momona binee'mo hi Tumpu, aijo' alati'nyo iwi-iwi' na roti obee'mo hi Tumpu. Ka' de bakat nu kau' anu Nu Tumpu, aijo' alati'nyo to panga-panga'nyo anu-Nyomo suele.

¹⁷ Sambagian na to panga-panga' nu kau' zaitun – aijo'mo na to mia-mian Yahudi – tinutu'akonmo. Ka' i pinontutu'akonan aijo', na pinompokampa'an panga' nu kau' zaitun nu kuhat, aijo'mo to Utu-utus anu misa' Yahudi. Kita Utus pinokampa' i kiijo' da kita Utus mongoa'i iwi-iwi' na anu ma'ima' i kantumuu'an nu mian Yahudi anu palesayamo.

¹⁸ Mokonyo aitu boli komiu monsangka dengke na aha anu tinutu'akonmo sumo panga' aijo'. Tionyo o' inau' miu, taalu' komiu ola panga'nyo. Ka' misa' panga'nyo anu mombee'i mongkaan bakatnyo, panyo bakatnyo na anu mombee'i kaanon i panga'nyo.

¹⁹ Panyo kita Utus ugaat notataemo, “Ii', panyo panga-panga'nyo aijo' otutu'akon da aku timbali opokampa' i batangnyo!”

²⁰ Aijo' memang totu'u. Panyo aha o'alin kalana aha madi' palesaya, panyo kita Utus otalimamo kalana kita Utus pinalesayamo. Jadi boli kita timbali kobubuun kalana tinalimamo; ola ahi' kita Utus tionyo mongoa'i mabuhuk.

²¹ Kalana de Tumpu madi' nolibos, sahingga nongalinmo mian nu Yahudi anu susumo to panga-panga', anu panga'nyo ahi' memang totu-totu'u aijo', boli taha'iman Ia molibos na mongalin kita Utus!

²² Jadi aiya otoantomo na kononongnyo hondo nu Tumpu tiba mule' na koboat nu palentah-Nyo. Palentahnyo maboat hondo hi mian baladosa', panyo ia manonong hi kita Utus – asan kita Utus tataap tumuu' i anu nu ka'ima'i. De madi', tantu kita mule' suele o'alin.

²³ Ka' mongkona to mia-mian nu Yahudi aijo', de aha madi'mo mombau susumo anu madi' palesaya, saba' aha po'ule'mo otalima; kalana Tumpu ko kuasa po'ule' montalima aha.

²⁴ Kita Utus anu misa' nolengkat mae i bansa nu Yahudi sumo panga' nu kau' zaitun nu kuhat. Jadi, de kita Utus madi' mo'imboa tiba kalakuan nu kita Utus, timbali ahi' opokampa' i kau' anu totu-totu'u zaitun, lebe-lebe mule' to mia-mian Yahudi anu kinantuangakon sumo to panga-panga' nu kau' anu totu-totu'u memang zaitun aijo'. Tantu lebe dengke mule' na Tumpu po'ule' monsule'akon aha i posi kau' zaitun nu aha.

Kalibosan nu Tumpu kona hi mian iwi-iwi'

²⁵ To Utu-utus! Kupoita da komiu boli mongoa'i au' aitu nonsumbu'mo iwi-iwi'. Kalana daagi' ko sangahan anu nukahanda'i nu Tumpu Allah, panyo anu ma'isa nusumbu' nu mian. Ka' ku kahanda'i da osumbu' miu; aijo'mo: Sambagian mian nu Yahudi panggaga, panyo kalakuan nu aha aijo' ola toka sampe pa'sangkuka na konjoo'nyo nu to mia-mian misa' Yahudi anu toka hi Tumpu aijo' sukupmo.

²⁶ Sumo aijo' na mian nu Yahudi iwi-iwi' oposalamat. Kalana i uno nu Kitab nu Tumpu tinulismo sumo uuka, “Tomundo' anu Momposalamat tokaje mae lengkat i Sion; Iaje na mongalini iwi-iwi' ka'idekan anu lengkat mae hi lee' i Yakub.

²⁷ Aku binajanji'mo salaku bau pontoongingku aha tempo'nyo Aku nongampunimo to dosa-dosa' nu aha.”

²⁸ Kalana mian nu Yahudi madi' mongka'oho' montalima Lele Ma'ima' lengkat mae hi Tumpu, sahingga tinimbalimo sampobali' nu Tumpu; sahingga aijo' na tinimbali ka'untungan nu to Utu-utus anu misa' Yahudi. Panyo kalana anu pinile'anmo nu Tumpu sahingga to mia-mian Yahudi aijo' tataap Nukalibosi nu Tumpu, kalana monginau' mompolee' nu aha.

²⁹ Kalana de Tumpu nompile'imo mian ka' mombalakatimo mian aijo', Tumpu madi'mo toho' po'ule' momadi'akon apaa na anu binau-Nyomo.

³⁰ U'utu mae komiu madi' mohongo-hongo Tumpu. Panyo uuka aiya Tumpu nompoto'imo tukoonyo komiu pinobebasmo i kasala'an, kalana to mia-mian Yahudi madi'mo mohongo-hongo.

³¹ Sumo aijo'mo suele na to mia-mian Yahudi aijo'. Uuka aiya aha madi'mo nohongo-hongo Tumpu, da komiu opobebasmo i kasala'an. Panyo aha saidi' mae suele opobebasje i kasala'annyo.

³² Kalana Tumpu nompojohokmo iwi-iwi' na mian kinuasanmo nu panggaga, da Ia timbali mompotoa kalibosan-Nyo hi aha iwi-iwi'.

Pompuji' Tumpu

³³ Totu'u daka' na kakaya'an nu Tumpu! Totu'u daka' na kapandean-Nyo tiba ponsumbu'an-Nyo! Ihe na moko ala monsumbu' anu pinoko potantu-Nyomo? Ihe na moko ala monsumbu' bau-baunyo nu Ia mokalaja?

³⁴ I uno nu Kitab nu Tumpu tinulismo sumo uuka, “Ihe na moko sumbu' pikilan nu Tumpu? Ihe na timbali mombee'i pokinde' hi Ia?

³⁵ Ihe na toho'mo nombee'i apa-apaa hi Tumpu sahingga timbali momoita pombalosi-Nyo?”

³⁶ Tumpu na nombau iwi-iwi' aijo'. Iwi-iwi' nolengkat mae hi Tumpu tiba mule' bau kapentingan nu Tumpu. Puji' na Tumpu sampe toka sidu-sidutu'! Amin.