PO'ULE' INGULIT 4 - KITAB NU TUMPU ALLA LELE MA'IMAI'

I Musa nongkakeha'imo Israel da tulu-tulutan

¹ Lantas i Musa notataemo hi bansa aijo', “Tuluti iwi-iwi' na atulan anu pinogulu'kumo hi belemiu, da belemiu timbali tumuu' sampe monjojoongimo tano' anu nubee' nu Tumpu, Tumpu Allah nu mompolee' miu, hi belemiu.

² Apaa na anu ku palentahkon, boli otuangi kabai oga'ai mau ola sangkiding. Tuluti na palentah nu Tumpu Allah nu belemiu iwi-iwi' anu binee'kumo hi belemiu.

³ Pinosi toamo nu belemiu apaa na anu binaumo nu Tumpu Allah miu i Bungkutnyo nu Peor. Batu-batu mian anu monsombah Baal i tampat kiijo' pinatean-Nyomo,

⁴ panyo belemiu anu sabole-bole tulu-tulutan hi Tumpu Allah nu belemiu, daagi' tumuu' sampe tempo' uuka aiya.

⁵ Iwi-iwi' na atulan haha aijo' pinogulu'kumo hi belemiu susumo anu pinalentahkonmo nu Tumpu Allah-ngku. Tuluti na iwi-iwi' aijo' i lipu' anu opinsoopi miu ka' jojoongmo ikiijo'.

⁶ Obau na aijo' ma'i-ma'ima'. De belemiu mombau sumo aijo', saba' kapandean nu belemiu timbali nutoa nu to bansa-bansa sangga'at. De nuhongomo nu aha na atulan haha aijo' aha motataemo, ‘Palias na kopandenyo nu pikilan nu aha bansa anu daka' aijo'!’

⁷ Bansa daka' iya na anu ko pilogotnyo ka' anu ohani hondo aijo' de opalaluimo susumo Tumpu Allah-nto ohani hondo hi kita? Ia montaami de kita momoitamo tulung hi Ia.

⁸ Ka' bansa daka' iya na anu ko atulannyo susumo aijo' na ko adinnyo pokakana sumo atulan anu pinogulu'kumo hi belemiu sinaa aiya?

⁹ Boli okolilimi ka' otutugi ima-ima', da sidu-sidutu' i uno nu kantumuu'an miu madi' okolilimi nu belemiu apaa na anu pinosi toamo nu belemiu. Sisikakon hi to maku-makumpu nu belemiu,

¹⁰ na sinaa aijo' de belemiu tuminjomo i ahop nu Tumpu Allah nu belemiu i Bungkutnyo nu Sinai. Tempo'nyo aitu Ia notataemo hi belengku, ‘Posihuk mae na bansa aijo'. Ku ka'ima'i da aha mohongo apaa na anu kahanda' Ku poto'i, da aha balagulu' tulu-tulutan hi beleng-Ku i uno nu kantumuu'an nu aha sidu-sidutu', ka' da aha mompogulu' to ana-anak nu aha da tulu-tulutan hi beleng-Ku.’

¹¹ Sisikakon hi to ana-anak nu belemiu mosia na belemiu toka tuminjo i tengke nu bungkutnyo anu pinintungmo kalana sinaputmo nu tibuk sumomo kundom anu tinumatampokmo ka' apunyo noakmo tinokatokamo i langit.

¹² Lapas aijo' Tumpu notataemo hi belemiu aijo' mae i apu, ka' i hongomo nu belemiu na potatae-Nyo, panyo madi' nontoa Ia pa' mosia na balu-balu'nyo.

¹³ Kiijo' mae Ia nompoto'imo hi belemiu apaa na anu tionyo ahi' obau nu belemiu, salaku bau pomponyata' apaa na anu jinanji'akon-Nyomo hi belemiu. Sampulu' na palentah anu tinulis-Nyomo i ohua' na batu pontulisan aijo' tionyo ahi' obau nu belemiu.

¹⁴ Tumpu nompokaumo aku da mompogulu' hi belemiu iwi-iwi' na atulan anu tionyo ahi' otuluti i lipu' anu opinsoopije nu belemiu, ka' o jojoongi aijo'.”

Pokinde' da boli monsombah pilogot

¹⁵ “Tutugi ima-ima'! Tempo'nyo Tumpu notatae hi belemiu i uno nu apu kiijo' mae i Bungkutnyo nu Sinai, madi' ko apa-apaa na anu tinoa nu belemiu.

¹⁶ Jadi obala'ingati da belemiu boli baladosa' kalana belemiu nombaumo patong da osombah binau sumo mo'ane kabai boune,

^17-18 tomonsi' kabai ikan, binatang jumolo kabai binatang sangga'at.

¹⁹ Boli baladosa' kalana monsombah ka' palesayamo hi apaa na anu otoa nu belemiu i langit: batu nu sinaa, bitu'on ka' to manda-mandala'. Tumpu Allah nu belemiu nompojohokmo bansa haha aijo' sangga'at monsombah balang haha aijo'.

²⁰ Panyo belemiu bansa anu pinosalamat-Nyomo lengkat mae i Mesir, tampat belemiu nongoa'i sansala anu taha-tahahumo. Belemiu binoa-Nyomo mae nosabat lengkat i lipu' aijo' da timbalimo bansa-Nyo susumo balu-balu'nyo belemiu uuka aiya.

²¹ Panyo Tumpu Allah nu belemiu nontambuha'imo aku kalana sinaduakon nu belemiu ka' Ia binasumpa'mo tukoonyo aku madi'mo motaap i Kaunyo nu Yordan ka' minsoop i tano' anu ma'omuk anu Nu bee'mo hi belemiu.

²² Madi'mo pin belemiu motaapmo mokiijo' ka' monjojoongimo tano' anu ma'omuk aijo': Panyo aku madi'mo mamba hingga-hinggat, kalana aku silakamo i aiya.

²³ Tutugi ima-ima'! Boli okolilimi na anu jinanji'mo nu Tumpu Allah miu hi belemiu. Tuluti na palentah-Nyo; boli hondo-hondo mombau patong na belemiu maumo sumo apaa da osombah,

²⁴ kalana Tumpu Allah nu belemiu sumo apu montoyo'i. Ia madi' mongka'oho' opokakanakon sumo pa' apaa.

²⁵ Ka' mule' de belemiu saidi' mae pinmo na jojoong i lipu' aijo' ka' ko makumpumo, boli baladosa' kalana mombaumo patung maumo pa' sumo apaa. Palabuatan anu sumo aijo' sa'angu' na han anu ma'idek hi mata nu Tumpu Allah nu belemiu ka' monsaduakon Ia da motambuha'.

²⁶ Langit ka' tano' na timbali sakisi sinaa aiya de maluannyo belemiu madi' tulu-tulutan hi belengku, belemiu malia-lia' sampa mate i tano' anu o jojoongi miu i santoa nu Kaunyo Yordan aijo'. Belemiu madi' pin na jojoong ikiijo', belemiu opateimo ingko-ingkot.

²⁷ Nubagi-bagimo nu Tumpu na belemiu mamba i to bansa-bansa sangga'at ka' me sangkiding na belemiu anu daagi' tumuu'.

²⁸ Ikiijo' mae belemiu monsombahmo to pilo-pilogot anu nubau nu lima nu manusia, pilogot haha aijo' kau' na binau ka' batu anu madi' moko ala montoa kabai mohongo, madi' moko ala mongkaan kabai mongooki.

²⁹ Lantas belemiu moliomo Tumpu Allah nu belemiu, ka' de o lio miu totu-totu'u na kinyonyoa, tantu o humpak nu belemiu na Ia.

³⁰ De belemiu nutokai nu balaa' aijo' iwi-iwi' ka' belemiu i uno nu kasusa'an, saba' belemiu minsusule'mo hi Tumpu Allah nu belemiu ka' tulu-tulutanmo hi Ia.

³¹ Tumpu Allah nu belemiu atina'mo na Tumpu Allah anu talalo hondo mongkalibosi. Ia madi' mompala'i kabai mompatei belemiu, kabai mongkolilimi palajanjian-Nyo hi mompolee' nu belemiu.

³² Soba tutugi apaa na anu tinimbalimo tempo'nyo naipuan mae belemiu ma'isa pe'e i hampe salatanmo pe'e sinaa momonanyo Tumpu Allah nompotimbali manusia i dunia aiya. Lio i songko-songko na dunia. Pa' toho'mo tinimbali na han anu daka' hondo sumo aijo'. Pa' toho'mo ko mian anu nohongo apaa na anu jinadimo sumo aijo'?

³³ Pa' daagi' ko bansa anu sabole-bole tinumuu' salatan nohongomo pilogot notatae hi aha aijo' mae i apu, susumo anu tina'upmo nu belemiu?

³⁴ Pa' toho'mo kino pilogot anu baani nongala sa'angu' na bansa, hi aha to bansa-bansa anu aiya i dunia lantas nompotimbalimo aha mian anu pinalesayamo hi Ia, susumo anu binaumo nu Tumpu Allah miu hi belemiu kiijo' mae i Mesir? Pinosi toamo nu belemiu mosia na Tumpu Allah nompotoka balaa' ka' pahampatean, ka' nombaumo hahan anu okabangangi ka' mule' nombaumo hahan anu opalias kalana kahosonannyo anu tahahumo hondo aijo'.

³⁵ Iwi-iwi' aijo' pinotoamo nu Tumpu hi belemiu da bau pomponyata' saba' ola Tumpu, aijo'mo na Tumpu Allah ka' madi'mo ko sangga'atannyo.

³⁶ Aita' mae i langit Ia nompohongomo potatae-Nyo hi belemiu da mompokinde'i belemiu, i dunia aiya Ia nompotoamo hi belemiu apu-Nyo anu tahahumo hondo, ka' aijo' mae i apu Ia notataemo hi belemiu.

³⁷ Kalana Ia mongkanonongi mompolee' miu sahingga belemiu pinile'an-Nyomo; nu kuasa-Nyo anu daka' hondo ka' belemiu binoa-Nyomo nosabat lengkat mae i Mesir.

³⁸ Aha bansa-bansa anu lebe daka' ka' lebe mahoson i laa'-Nyo ka' nompala'imo belemiu kalana nolaya'mo belemiu mamba i lipu' nu aha, anu binee'-Nyomo hi belemiu, lipu' anu uuka aiya tinimbalimo anu nu belemiu.

³⁹ Kalana aijo' soba ahi' tutugi sinaa aiya ka' bolimo okolilimi, ola Tumpu sa'a-sa'angu'nyomo na Tumpu Allah i langit ka' i dunia; madi' ko anu sangga'at.

⁴⁰ Tuluti iwi-iwi' na atulan anu ku bee' sinaa aiya hi belemiu, da belemiu ka' lee' nu belemiu mohumpak kabilahian ka' motuus na tumuu' i lipu' anu binee'mo nu Tumpu Allah nu belemiu da belemiu na tumpunyo sampe toka sidu-sidutu'.”

To kota-kota bau palaian i sasu kabete'an Kaunyo nu Yordan

⁴¹ Lantas tinantukanmo i Musa totolu' na kota i sasu kabete'an Kaunyo nu Yordan

⁴² da timbali kota bau palaian, tampat nu mian timbali momposalamat butongnyo de ia madi' nontotonggolakon na nompatei mian anu misa' sampobali'nyo. Ia timbali mompalaihakon butongnyo i sala' sa'angu' na kota haha aijo' da madi' suele opatei.

⁴³ Kona hi tulunan nu bansa Ruben tinoukanmo kota Bezer aita' i hatanyo nu bungkutnyo i padang bola; kona hi tulunan nu bansa Gad kota Ramot i da'erah Gilead, ka' hi aha mian nu Manasye kota Golan i da'erah Basan.

Bansa Israel binee'anmo Atulan nu Tumpu Allah

⁴⁴ Lantas i Musa nombee'imo atulan haha aiya ka' mule' palentah nu Tumpu Allah haha aiya hi bansa Israel.

^45-46 Han aijo' binaunyo salatan noko posabatmo na aha lengkat mae i Mesir ka' jinojoongmo i bangka'nyo sasu kabete'an Kaunyo nu Yordan mompaha ahop tiba kota Bet-Peor. Da'erah aijo' u'utu mae da'erah i tomundo Sihon tomundo nu mian Amori, anu naipuan mae nompalentah kota Hesybon. I Musa ka' bansa Israel nompatundu'mo ia tempo'nyo aha nosabat mae i Mesir.

⁴⁷ Aha nonjojoongimo tano' i Tomundo Sihon aijo', ka' suele tano' i Tomundo Og anu lengkat mae i Basan, samian na tomundo nu aha Amori sangga'at anu jojoong i sasu kabete'an Kaunyo nu Yordan.

⁴⁸ Tano' aijo' lengkat mae i kota Aroër sohipi' nu Kaunyo Arnon, toka-toka i sasu utara ka' i lau-lausmo i Bungkutnyo nu Siryon, aijo'mo Bungkutnyo nu Hermon,

⁴⁹ ka' songko-songko na da'erah i sasu kabete'an Kaunyo nu Yordan toka-toka i sasu selatan Ambai Mate i tengke nu Bungkutnyo Pisga.