PO'ULE' INGULIT 19 - KITAB NU TUMPU ALLA LELE MA'IMAI'

Kota-kota anu bau palaian

¹ “Salatan bansa haha aijo' nupoko pateimo nu Tumpu Allah nu belemiu, ka' lipu' nu aha obee'mo hi belemiu, ka' salatan o alamo nu belemiu na kota-kota tiba laigan nu aha iwi-iwi' ka' jojoongmo ikiijo',

^2-3 da'erah aijo' tionyo ahi' obagimo nu belemiu totolu' na bahagian, toto sa'angu' na bahagian ko kota'nyo sa'angu' anu bau palaian anu dengke na o solok, da batu-batu mian anu mompatei timbali mompalaihakon butongnyo mokiijo'.

⁴ De ihehe na mian madi' nontotonggolakon nompateimo mian sangga'at anu misa' sampobali'nyo, ia timbali mompalaihakon butongnyo i sala'sa'angu' na kota aijo' ka' timbali jojoong ka' tumuu' ikiijo'.

^5-6 Bisuanyo ua'aha na mian mojajalan mamba i alas kahanda' monta' kau'. Hau-haunyo samian monta' kau' mata' nu bobolo'nyo tinongulatmo i pantungannyo ka' nongkona sangalunyo sahingga sinilakamo. Jadi mian anu nonsilakai panyo madi' tinotonggolakonnyo aijo' madi' mohumpak kasala'an ka' timbali malai i sala'sa'angu' na kota palaian anu totolu' aijo' da salamat. De ola sa'angu' na kota, anu bau palaian ugat talalo majo'on na malai mokiijo', ka' to utu-utusnyo mongala-alapakonmo mombalosakon anu pinatean aijo' sahingga montuloi'mo ia, ka' kalana ia pinusamo hondo sahingga mompateimo mian anu madi' ko sala'nyo aijo'.

⁷ Kalana aijo' ku palentahkon hi belemiu da montoukai totolu' na kota'.

⁸ De Tumpu Allah nu belemiu mompaka po'ewamo da'erah miu susumo anu jinanji'-Nyomo hi mompolee' nu belemiu, ka' iwi-iwi' na lipu' aijo' obee'mo hi belemiu,

⁹ belemiu tionyo ahi' mompile'i mule' totolu' na kota' bau palaihan. (Lipu' aijo' obee'mo hi belemiu de belemiu mombaumo iwi-iwi' apaa na anu ku palentahkon hi belemiu sinaa aiya, ka' de belemiu mongkanonongi Tumpu Allah nu belemiu ka' tumuu' montuluti pangajalan-Nyo.)

¹⁰ Bau na aijo' da belemiu boli baladosa' kalana nompobebasmo mian anu madi' ko sala'nyo da madi pinatean lipu' anu binee'mo nu Tumpu Allah nu belemiu hi belemiu.”

¹¹ “Panyo madi' pokakana de ko mian molalubusi sampobali'nyo, ka' sangaja' memang mongka'ideki ka' mompateimo ia, lantas mompalaihakonmo butongnyo i sala'sa'angu' na kota palaian da boli opatei.

¹² Anu sumo aijo' to pola-polaya' nu kota' nu aha tionyo ahi' molaga mian aijo' lantas mombee' ia hi to utu-utusnyo anu mangaku timbali mombalosakon anu pinateanmo aijo' da ia timbali opatei.

¹³ Boli mongkalibosi ia. Pobebas na Israel da boli opatei susumo aijo'; da mohumpak ka'ima'an.”

Madi' opobee' na molalin potempasan nu tano'

¹⁴ “De belemiu tokamo i lipu' anu binee'mo nu Tumpu Allah nu belemiu hi belemiu, boli molalin potempasan nu tano' mokiijo' hi sangalu miu anu polo'mo binagi daagi' naipuan pe'e mae.”

Atulan mongkona sakisi

¹⁵ “De ola samian na sakisi madi' opongala na mompoto'i samian anu osangka sinala'mo; opai-pai lio ua'aha na sakisi anu opongala i han aijo'.

¹⁶ De daagi' ko samian kahanda' mombau da mian sangga'at timbali sala', nu bau-baumo na sangka'annyo aijo' anu madi' totu'u i ahop nu mian kopian, saba'

¹⁷ ua-ua'aha tionyo ahi' mamba i tampat ponsomban Tumpu anu pinoto'imo nu Tumpu da o ulus nu to ima-imam, ka' mian kopian anu tempo'nyo aijo' mokalaja.

¹⁸ To mia-mian kopian tionyo ahi' mompalesa palakala aijo' ima-ima', ka' de memang mian aijo' lewa'mo monsisik anu madi' totu'u te sangalunyo aha mian nu Israel,

¹⁹ ia tionyo ahi' montalima hukuman susumo anu kinoboli' opokona hi sampobali'nyo aijo'.

²⁰ Iwi-iwi' na mian tantu mohongo han aijo' ka' mabuhukmo, sahingga madi'mo ko anu mombau anu ma'idek susumo aijo'.

²¹ Boli ko pikilan molibos i palakala haha aijo'. Hukumannyo aijo'mo: Nyawa bolosnyo nyawa, mata bolosnyo mata, bese' bolosnyo bese', lima bolosnyo lima ka' tengke bolosnyo tengke.”