NOSABATMO 40 - KITAB NU TUMPU ALLA LELE MA'IMAI'

Kemah nu Tumpu pinotinjomo ka' ola samata-mata ponsomban Tumpu

¹ Tumpu notatae hi Musa,

² “Bau na Kemah-Ku i tanggan sa'angu' bitu'on sa'angu'.

³ Posoop i unonyo na Peti' Palajanjian anu ko tulisannyo Sampulu' na Pelentah ka' pokona na hude pongkukumbungi i ahopnyo.

⁴ Pokoko na meja' tiba posadiaonnyo. Posoop suele na tengke nu sulu' ka' tutungimo na sulu'nyo.

⁵ Pokoko na mezbah mosoni' tampat pompapuan kamangian i ahop nu Peti' Palajanjian, ka' pokonamo na lalanse' i Sabatan nu Kemah.

⁶ Pokoko na mezbah bau pontunuan koloban i ahop nu Sabatan nu Kemah.

⁷ Pokoko na tampat nu uee i olotnyo nu Kemah ka' mezbah aijo', lantas isimo nu uee.

⁸ Lapas aijo' pokonamo na hude bola-bola aijo' titikub i natan nu Kemah.

⁹ Lapas aijo' Kemah ka' iwi-iwi' na posadiaonnyo tionyo ahi' nu sombahkonmo hi beleng-Ku, aijo'mo nu pipi'imo nu lanya' anu opake monsombah, sahingga iwi-iwi' aijo' samata-mata Akumo na tumpunyo.

¹⁰ Osombahkon na mezbah ka' iwi-iwi' na posadiaonnyo susumo anu pinoto'imo aijo', da iwi-iwi' samata-mata Akumo na tumpunyo.

¹¹ Baumo sumo aijo' suele na tampat nu uee ka' paningkokoannyo.

¹² Lapas aijo' pokaumo na i Harun tiba to ana-anaknyo toka mae i sabatan nu Kemah ka' mimbaso'.

¹³ Popusok na baju' nu imam hi Harun, ka' opipi'imo nu lanya' na ia da ia mokalaja samata-mata hi beleng-Ku salaku imam.

¹⁴ Lantas laga mae na to ana-anaknyo mati ohani mae, ka' popusok na kameja hi aha.

¹⁵ Lantas opipi'i nu lanya' na aha susumo beleyum mompipi'imo nu lanya' tuuma nu aha, da aha suele mokalajamo hi beleng-Ku salaku imam. Tiba jalan mompipi'i nu lanya' aijo' tulunan nu bansa nu aha molundu-lundu na lee' nu aha saja' montoongi pangkat imam.”

¹⁶ I Musa nombaumo iwi-iwi' aijo' susumo anu pinalentahkon nu Tumpu.

¹⁷ Sahingga i tanggan sa'angu' bitu'on sa'angu' i taun ko ohua'nyomo salatan bansa Israel nompala'imo Mesir, Kemah nu Tumpu aijo' pinotinjomo.

¹⁸ I Musa nompaha potimpasmo paningkokoannyo, nompaha potinjomo ohi'nyo, nompaha pokonamo kau' balatannyo ka' nompaha potinjomo totokolonnyo.

¹⁹ Lantas pino atopnyomo na atop nu Kemah tiba kukubnyo anu i sambiha'nyo aita' i buannyo susumo anu pinalentahkonmo nu Tumpu.

²⁰ Lapas aijo' batu ohu-ohua' aijo' pinosoopnyomo i uno nu Peti' Palajanjian. Lantas kinulubanmo i Musa na Peti' aijo', ka' pinosoopnyomo na kau' polembanan i pasinsingnyo.

²¹ Lantas pino'una'nyomo na Peti' aijo' i uno nu Kemah ka' nompokona hude pongkukumbungi i ahopnyo, susumo anu pinalentahkonmo nu Tumpu hi ia.

²² Lapas aijo' i Musa nompokokomo meja' i uno nu Kemah, sasu utara i sambiha'nyo nu hude,

²³ lantas i meja' aijo' pinotimpasmo na roti anu osombahkon.

²⁴ Tengke nu sulu' pinokokonyomo i uno nu Kemah, i sasu selatan, mompaha ahop tiba meja' aijo',

²⁵ lantas, sulu' haha aijo' tinutungannyomo i ahop nu Tumpu.

²⁶ Mezbah mosoni' pinokokonyomo i uno nu Kemah, i ahop nu hude,

²⁷ lantas pinapuannyomo na kamangian anu manohong susumo anu pinalentahkonmo nu Tumpu hi Musa.

²⁸ I Musa nompokonamo lalanse' nu sabatan nu Kemah,

²⁹ ka' i ahop nu sabatan aijo' pinokokonyomo na mezbah bau pontunuan koloban. I mezbah aijo' sinombahkonnyomo na koloban anu otunui tiba koloban roti anu osombahkon.

³⁰ Tampat pongisian uee, tambaga na binau pinokokonyo i olotnyo nu Kemah ka' mezbah, lantas ingisiannyomo nu uee.

³¹ I Musa, i Harun tiba to ana-anaknyo nombaso' imo lima ka' tengke nu aha ikiijo',

³² de aha minsoopmo i Kemah nu Tumpu kabai mongohanimo mezbah.

³³ Titikubnyo nu Kemah ka' mezbah aijo' pinokonanmo i Musa hude bola-bola lantas pinokalayo'nyomo na lalanse' i sabatan daka' nu natan. Sahingga jinadimo na kalajanyo aijo' iwi-iwi'.

Kundom nonsaputmo Kemah nu Tumpu

³⁴ Lapas aijo' nintatau'mo mae na kundom nonsaputmo Kemah nu Tumpu ka' Kemah aijo' najingkamo hondo, tandanyo Tumpu tinokamo.

³⁵ Mokonyo aijo' i Musa madi'mo noko ala ninsoop i Kemah aijo'.

³⁶ De kundom aijo' ta angkatmo mokiita' madi'mo monsaput Kemah nu Tumpu, bansa Israel montatakimo Kemah nu aha, kalana molalinmo i tampat sangga'at.

³⁷ Panyo de kundom aijo madi' ta'angkat mokiita', aha madi' mamba mompala'i tampat aijo'.

³⁸ Tempo'nyo bansa Israel namba ka' lewa' nolali-lalin, Tumpu jojoong i Kemah aijo', susumo kundom de sinaamo ka' susumo apu de pihimo.