NOSABATMO 13 - KITAB NU TUMPU ALLA LELE MA'IMAI'

Anak tumpe osombahkon

¹ Tumpu notataemo hi Musa,

² “Osombahkon mae iwi-iwi' na anak to momo'ane anu tumpe hi belengKu. Batu-batu anak to momo'ane anu tumpe i Israel, ka' batu-batu potuu'on lakinya anu momona inganakakon, atina' anu nu beleng-Ku.”

Lamean Roti anu Madi' ko Raginyo

³ I Musa notataemo hi bansa Israel, “Sinaa aiya Tumpu anu Daka' hondo na kuasa-Nyo nompobebasmo belemiu, sahingga belemiu timbalimo nosabat nompala'i lipu' nu Mesir, tampat belemiu binotuanan. Kalana aijo' lame'akon na sinaa aiya. Boli mongkaan roti anu ko raginyo.

⁴ Sinaa aiya, tanggal sa'angu' bitu'on Abib kabai bitu'on sa'angu, belemiu nompala'imo lipu' nu Mesir.

⁵ Binasumpa' na Tumpu nonjanji'mo hi mompolee' nu belemiu mombee'mo hi belemiu lipu' nu bansa Kana'an, Het, Amori, Hewi, Yebus. De nuboamo nu Tumpu na belemiu i lipu' anu kaya ka' molumba' aijo', sataun toka sataun i bitu'on Abib, belemiu tionyo ahi' mombau lamean aiya.

⁶ Pitun sinaa na kopinnyo belemiu tionyo ahi' mongkaan roti anu madi' ko raginyo, ka' i sinaa ko ipitunnyo tionyo ahi' obaumo na lamean bau pongadati Tumpu.

⁷ Pitun sinaa na kopinnyo aijo' belemiu madi' timbali mongkaan roti anu ko raginyo, ka' i songko-songko na lipu' nu belemiu madi' timbali ko ragi kabai pa' apa-apaa na anu ko raginyo.

⁸ De montampu'unimo molame'akon aijo' belemiu tionyo ahi' monsisikakon hi anak nu belemiu anu to momo'ane taalu' iwi-iwi' aijo' binaumo nu belemiu kalana iwi-iwi' apaa na anu binaumo nu Tumpu hi belemiu tempo'nyo belemiu nompala'imo mae lipu' nu Mesir.

⁹ Lamean aiya bau pompotuka hi belemiu salaku tanda anu oposegot i lima nu belemiu kabai i siakan nu belemiu. Lamean aiya mompotuka' belemiu da saja' montaloakon ka' monggulu'i to Atu-atulan nu Tumpu, kalana Tumpu nonsabatakonmo mae belemiu lengkat i Mesir, nu kuasa-Nyo anu daka'.

¹⁰ Lame'akon na bau-bauon aiya sataun toka sataun kona i tempo'nyo anu tinantukanmo.”

Anak tumpe

¹¹ I Musa notataemo hi bansa Israel, “Sinaa aiya Tumpu nomboamo belemiu mamba i lipu' Kana'an anu jinanji'-Nyomo nusumpa' hi belemiu ka' hi mompolee' nu belemiu. Salatan tano' aijo' belemiumo na tumpunyo,

¹² belemiu tionyo ahi' monsombahkonmo batu-batu anak mo'ane tumpe ka' batu-batu potuu'on lakinyo anu momona inganakakon. Iwi-iwi' aijo' anumo nu Tumpu,

¹³ panyo de keledai lakinyo anu momona inganakakon tionyo ahi' sa'angu' na anak nu domba na bau pombolosi anu okolobanakon hi Tumpu salaku bau pontolosi keledai. De belemiu madi' mongka'oho' mombolosi keledai aijo', yo gogohongnyo na tionyo ahi' opato'akon. Batu-batu anak nu belemiu mo'ane anu momona i hampe'akon tionyo ahi' obolosi.

¹⁴ De saidi' mae i mihinyo anak nu belemiu mompokilawa apaa na alati'nyo iwi-iwi' aijo', belemiu tionyo ahi' montaami sumo uuka, 'Tiba kuasa nu Tumpu anu Daka' hondo nomboamo mae kita nosabat lengkat i lipu' nu Mesir, tampato binotuanan.

¹⁵ Salatan tomundo nu Mesir pinanggagamo ka' madi'mo nongka'oho' mompobee' mae kita namba, Tumpu nompateimo batu-batu anak mo'ane anu tumpenyo i Mesir, mau anak nu manusia mau pe'e anak nu binatang. Mokonyo aijo' kita mongkolobanakon hi Tumpu batu-batu potuu'on lakinyo anu momona inganakakon, salaku pombolosi to ana-anakto mo'ane anu tumpe.'

¹⁶ Anu saja' obau aijo' bau pompotuka' kita salaku tanda anu pinosegot i lima kabai i siakanto. Tiba jalan anu sumo aijo' kita saja'mo monginau' Tumpu anu nonsabatakonmo mae kita lengkat i Mesir nu kuasanyo anu daka'.”

Hohung nu kundom ka' jingka nu apu

¹⁷ Salatan pinobee'mo nu tomundo Mesir na bansa Israel namba, Tumpu Allah madi' nomboa aha notulu jalan anu monsahak lipu' Filistin, mau mule' aijo' ahi' na jalan anu magontop. Tinutugan nu Tumpu Allah? “Boli-boli mian haha aijo' mompele-pele'mo de montoamo aha tantu mahampatemo lantas po'ule'mo minsusule' i Mesir.”

¹⁸ Kalana aitu Tumpu nomboamo aha notulu i jalan mompoliliit da monsahak padang bola mokiijo' i sasu ambai Gelagah. Tempo'nyo nompala'imo Mesir na aha mian nu Israel haha aijo' bubu'mo nomboa toongon susumo anu mahampatemo.

¹⁹ I Musa nomboa buku i Yusuf iwi-iwi', kalana i Yusuf daagi' tutuu' nompokaumo Israel binasumpa' da mombau sumo aijo'. Sumo uuka na potuunon i Yusuf, “De Tumpu mompobee'mo belemiu, bangke'ku tionyo oboa nu belemiu boli opo una' i aiya.”

²⁰ Mian nu Israel nompala'imo Sukot ka' binakemahmo i kota Etam, i sohipi' nu padang bola.

²¹ De sinaa Tumpu lumajang momona i ahop nu aha nu hohungi nu kundom, ka' de pihimo Ia na mamba momona aijo' hi aha i jingka apu mompotiju' jalan. Sahingga aha timbali lumajang sinaa ka' pihi.

²² Toka sansina-sinaa hohung nu kundom saja' mohohungi bansa aijo', ka' toka sampahu-pahu jingka nu apu monjingkai aha.