NOMBILANGMO 30 - KITAB NU TUMPU ALLA LELE MA'IMAI'

Atulannyo de balaniat

¹ I Musa nombee'mo atulan haha aiya hi to pola-polaya' nu aha tulunan nu bansa Israel.

² De samian na mo'ane balaniatmo kabai bajanji'mo ka' osumpa'akonmo hi Tumpu, sahingga ia montoongimo janjinyo aijo', ia tionyo ahi' nombaumo apaa na anu jinanji'nyomo aijo' ka' madi'mo timbali mombaleko'i potataenyo aijo'.

^3-4 De samian na langkoyang anu jojoong i laigan nu tuumanyo, balaniatmo hi Tumpu ka' montoongimo janji'nyo aijo', ka' tuumanyo mule' madi' montewa', salatan i hongonyomo na han aijo' saba' langkoyang aijo' tionyo ahi' mombau iwi-iwi' apaa na anu i niatnyomo kabai jinanji'nyomo aijo'.

⁵ Panyo de salatan i hongomo nu tuumanyo na han aijo' lantas tinewa'nyomo, saba' langkoyang aijo' madi'mo montoongi niatnyo kabai janji'nyo aijo'. Tumpu mongampuni ia kalana ia nutewa' nu tuumanyo.

^6-7 Desamian na boune anu ma'isa no'osoa balaniatmo kabai montoongimo sala'sa'angu' na janji' pa' daagi tinutugannyo pe'e momonanyo kabai madi' tantu ia sabole-bole ahi montoongi niatnyo kabai janji'nyo aijo'. De imihinyo mae ia mo'osoamo, ia sabole-bole ahi' montoongi niatnyo kabai janji'nyo aijo', asan langkainyo madi' montewa' salatan nohongomo han aijo'.

⁸ Panyo de langkai'nyo salatan nohongomo ka' montewa'mo ia, tantu ia madi'mo montoongi niatnyo kabai janji'nyo aijo'. Tumpu mongampuni ia.

⁹ De samian na balu kabai boune anu gina'atakonmo balaniatmo kabai balajanji'mo anu montoongimo butongnyo, ia montoongimo ahi' niatnyo kabai janji'nyo aijo' ka' sabole-bolemo ahi' mombau apaa na anu i niatnyo kabai jinanji'nyomo aijo'.

¹⁰ De samian na boune anu no'osoamo balaniat kabai balajanji'mo anu montoongimo butongnyo,

¹¹ ia tionyo ahi' mombau iwi-iwi' apaa na anu jinanji'nyomo aijo' asan langkai'nyo madi' montewa' salatan nohongomo han aijo'.

¹² Panyo de salatan i hongomo nu langkai'nyo na han aijo' lantas nu tewa'mo na ia, tantu boune aijo' madi'mo daagi' montoongi niatnyo kabai janji'nyo. Tumpu mongampuni ia, kalana ia nutewa' nu langkai'nyo.

¹³ Langkai' ko hak monsitujui kabai montewa' de bengkele'nyo balaniat kabai bajanji'.

¹⁴ Panyo desalatan ihongomo nu langkai'nyo na han aijo lantas madi' nu tewa', boune aijo' tionyo ahi' mombau iwi-iwi' apaa na anu iniatnyomo kabai jinanji'nyomo. Langkai'nyo situjumo i niat kabai janji'nyo aijo' kalana ia madi' nontewa' salatan i hongonyomo.

¹⁵ Desaidi mae i mihinyo langakai'nyo aijo' madi' monsitujui niat kabai janji' nu bengkele'nyo, tantu langkai'nyomo aijo' na anu tionyo ahi' montanggungi hukumannyo madi'mo nonsitujui aijo'.

¹⁶ Aijo'mo na to atu-atulannyo anu binee'mo nu Tumpu hi Musa mongkona balaniat ka' balajanji' anu obau nu samian na langkoyang anu jojoong i lagian nu tuumanyo, kabai samian na boune anu no'osoamo.