NOMBILANGMO 25 - KITAB NU TUMPU ALLA LELE MA'IMAI'

Bansa Israel i Bungkutnyo nu Peor

¹ Hau-haunyo bansa Israel jinojoongmo i Bangka'nyo nu Sitim, to momo'ane nu aha nasala'mo tiba to bou-boune nu aha Moab anu jojoong ikiijo'.

² To bou-boune ikiijo' lewa'mo nonsale'i da mamba i lamean monsombahkon koloban bau pongadati pilogot nu aha. Mian nu Israel suele nongkaanmo koloban aijo' ka' nonsombahmo pilogot nu aha mian Moab.

³ Kalana aha mian nu Israel nonsombahmo Baal kiijo' i Peor, Tumpu nontambuha'imo aha ka' notataemo hi Musa,

⁴ “Hakop iwi-iwi' na mian anu mongkapalai bansa aijo' ka' pateimo na aha i ahop nu mian da'isan salaku bau pontuluti palentang-Ku, da Aku madi'mo motambuha' hi bansa aijo'.”

⁵ Lapas aijo' i Musa notataemo hi to mia-mian kopian nu aha Israel, “Belemiu toto samian tionyo ahi' mompatei iwi-iwi' na mian anu i uno nu tompukan nu tulunan nu bansa nu belemiu ihe na anu nonsombahmo Baal kiijo' i Peor.”

⁶ Salatan i Musa ka' iwi-iwi' na mian hau-haunyomo lewa'mo i humang i sabatan nu Kemah nu Tumpu, aha nontoamo mian nu Israel samian nomboamo samian na boune nu aha Midian ninsoopmo i uno nu kemahnyo.

⁷ Salatan i Pinehas, anak i Eleazar, makumpu i Imam Harun nontoamo han aijo', ia nambamo ka' pinala'iannyomo na mian anu sinihukmo aijo'. Ia nongala sa'angu' na talombo'

⁸ lantas tinumputnyomo na mo'ane ka' boune aijo' i uno nu kemah. Ua-ua'aha na mian aijo' binunu'nyomo nu talombo' aijo' sahingga madi'mo daagi' kino balaa' anu jinadi i Israel.

⁹ Panyo tempo'nyo aitu anu i natemo 24.000 mo na mian.

¹⁰ Lantas Tumpu notataemo hi Musa,

¹¹ “I Pinehas, anak i Eleazar, makumpu i Imam Harun, jinunjuhi'mo na nontijohakon katalasanggoan-Ku hi aha mian nu Israel, sahingga Aku madi'mo pusa ka' Aku madi'mo sida na mompatei bansa aijo'.

¹² Jadi poto'i hi Pinehas taalu' Aku mombaumo palajanjian tiba ia.

¹³ Ia ka' lee'nyo Ku potataapmo salaku imam sampe toka sidu-sidutu', kalana ia jinunjuhi'mo na nontinjohakon Aku, Tumpu Allah-Nyo, ka' nombaumo paladamean da madi'mo baladosa' na aha mian nu Israel.”

¹⁴ Aha mian Israel anu pinateanmo tiba boune nu aha Midian aijo' sanggonyo i Zimri, anak i Salu, tu'anyo nu sa'angu' na auwan lengkat mae i tulunan nu aha bansa Simeon.

¹⁵ Boune aijo' sanggonyo i Kozbi; ia anak i Zur, mian anu mongkapalai aha sa'anakan kiijo' i Midian.

¹⁶ Tumpu nombee'mo palentah aiya hi Musa,

¹⁷ “Ewamo na aha mian nu Midian ka' patei na aha,

¹⁸ kalana tanga'an ma'idek anu pinopikilakonmo nu aha kona hi belemiu kiijo' i Peor, ka' kalana i Kozbi anak nu mian anu mongkapalai aha sa'anakan kiijo' i Midian. I Kozbi aijo' boune anu nate pinatean tempo'nyo daagi' kino balaa' anu jinadi kiijo' i Peor.”