NOMBILANGMO 20 - KITAB NU TUMPU ALLA LELE MA'IMAI'

Anu jinadi i Kades

¹ I bitu'on anu momonanyo iwi-iwi' na aha mian nu Israel tinokamo i padang bola Zin ka' jinojoongmo kiijo' i Kades. I Miryam sinilakamo ka' i lamunmo ikiijo'.

² Daagi' kino sansinaan i tampat pinongkema'an nu aha madi' ko ueenyo. Sahingga tinokamo na mian haha aijo' sinihuk hi Musa ka' hi Harun

³ ka' lewa'mo nososon. “Lebe ma'ima' sahanyo kami sinilakamo i ahop nu Tumpu hingga-hinggat tiba to utu-utus mami!

⁴ Kadaka' belemiu nomboamo mae kami i padang bola aiya? Ugaat da kami silakamo i aiya hingga-hinggat tiba potuu'on mami?

⁵ Apaa na kahanda' nu belemiu nomboamo mae kami nosabat lengkat mae i Mesir no uuka mae i tampat anu sansala aiya anu madi' timbali osu'ani apa-apaa? I aiya madi' ko gandumnyo, madi' ko kau' ara, anggur ka' dalima. Ka' mule' uee anu o inum i madi'an!”

⁶ I Musa ka' i Harun nambamo natikojo'on hi mian haha aijo' lantas tinuminjomo koko sabatan nu Kemah nu Tumpu. Aha tinolodadupumo lantas jingka tandanyo Tumpu tinokamo mae ka' nonjingkaimo aha.

⁷ Tumpu notataemo hi Musa,

⁸ “Ala na tokon anu kiijo' i ahop nu Peti' Palajanjian, lantas beleyum ka' i Harun tionyo ahi' momposihuk iwi-iwi' na mian. I ahop nu aha iwi-iwi', beleyum tionyo ahi' motatae hi bungkutnyo nu batu anu daagi' ikiijo' da molubatakon mae uee. Sumo aijo' na beleyum molubatakon mae uee i bungkutnyo nu batu aijo' da mian da'isan tiba potuu'on nu aha timbali monginum.”

⁹ Sahingga i Musa nambamo nongala tokon aijo' susumo anu pinalentahkonmo nu Tumpu.

¹⁰ I Musa ka' i Harun nomposihukmo mian iwi-iwi' i ahop nu bungkutnyo nu batu aijo'. Lantas i Musa notataemo, “Potombihing mae, belemiu anu saja' moto'idek! Pa' kami tionyo ahi' mompolubatmo uee i bungkutnyo nu batu aiya da bau kapalaluan nu belemiu?”

¹¹ Lantas i Musa nohangkatmo tokon aijo' ka' nonsapahi bungkutnyo nu batu aijo' pininduan. Sahingga i lubatmo mae na uee mabohos hondo, sahingga mian iwi-iwi' ka' potuu'on nu aha nonginumo.

¹² Panyo Tumpu nompisala'imo i Musa ka' i Harun Ia notatae, “Kalana belemiu madi' talalo palesaya hi beleng-Ku momponyata', kuasang-Ku anu susi' hi bansa Israel, belemiu madi'mo molaya' aha minsoop i lipu' anu jinanji'-Kumo hi aha.”

¹³ Aijo'mo na bulakan nu uee Meriba. I tampat aijo' aha mian nu Israel lewa'mo nososon hi Tumpu ka' ikiijo' suele na Tumpu nompotoamo kuasa-Nyo anu susi' hi bansa aijo'.

Tomundo nu aha Edom madi' nompobee' bansa Israel motulu

¹⁴ Lapas aijo' daagi' kiijo' mae i Kades, i Musa nonsaimo bobotokon da mamba mangadap hi tomundo Edom. Aha notatae, “Kami lengkat mae hi aha bansa Israel anu daagi' ko tuusanannyo moto utus tiba belento Tuanku. Ugaat sinumbu'mo nu belento Tuanku na kasusa'an anu nontokaimo kami.

¹⁵ Mompolee' mami namba i Mesir ka' jinojoongmo kiijo' mae notau-taun na kopinnyo. Mompolee' mami ka' kami binaumo sosudehon madi' ma'ima', nu aha bansa Mesir,

¹⁶ ka' kami nongkakasemo hi Tumpu nomoita tulung. Ia nohongomo poitaon mami ka' nonsaimo mae samian na malaekat. Malaekat aijo' nolaya'mo mae kami nosabat i tano' nu Mesir. Uuka aiya kami kiijo'mo i Kades, sa'angu' na kota kiijo' i potempasan nu da'erah nu belento Tuanku.

¹⁷ Okakase mami de timbali belento Tuanku sanang na mompobee' kami motulu i lipu' aiya. Kami ka' potuu'on mami madi' mosele i jalan ka' madi' minsoop i pongale'an kabai i ale' nu anggur. Kami madi' monginum uee nu bubung nu belento Tuanku. Kami saja'je lumajang i jalan daka' sampe kami mompala'imo da'erah nu belento Tuanku.”

¹⁸ Panyo aha mian nu Edom nontaami, “Belemiu madi' opobee' mami na motulu i da'erah mami. De belemiu mompagala mae motulu, otumbuhimo mami na belemiu!”

¹⁹ Aha mian nu Israel notataemo, “Kami lumajangje montulumo jalan daka', ka' de kami kabai potuu'on mami monginum uee nu belemiu, o bayan mami. Kami ola kahanda' motulu.”

²⁰ Aha mian nu Edom po'ule' mule' notatae, “Madi' timbali!” Lantas aha nambamo nontumbuhi bansa Israel nu suludadu nu aha anu sukup hondo na kabaaniannyo.

²¹ Sahingga aha mian nu Israel ninsusule'mo ka' noliomo jalan sangga'at kalana madi' pinobee' nu aha mian nu Edom motulu i da'erah nu aha.

I Harun sinilakamo

²² Iwi-iwi' na aha mian nu Israel nompala'imo Kades lantas tinokamo i Bungkutnyo nu Hor,

²³ i potempasan nu Edom. Ikiijo mae Tumpu notataemo hi Musa ka' hi Harun.

²⁴ “I Harun madi' timbali minsoop i lipu' anu jinanji'-Kumo hi bansa Israel; ia silakamo kalana belemiu atina' ohua' madi'mo nohongo-hongo palentang-Ku koko kiijo' mae i bulakan nu uee Meriba.

²⁵ Boa na i Harun ka' Eleazar, anaknyo mindako i Bungkutnyo nu Hor.

²⁶ Ukatakon na baju' i Harun ka' popusok hi Eleazar. I Harun silakamo i tampat kiijo' mae.”

²⁷ I Musa nombaumo apaa na anu pinalentahkonmo nu Tumpu. I Musa, i Harun ka' i Eleazar nindakomo i Bungkutnyo nu Hor sinakisian nu mian iwi-iwi'.

²⁸ Lantas ingukatakonmo i Musa na baju' i Harun ka' pinopusoknyomo hi Eleazar. I bungkutnyo aijo' na i Harun sinilakamo, lapas aijo' i Musa ka' i Eleazar po'ule'mo nintudun.

²⁹ Iwi-iwi' na mian nohongomo taalu' i Harun sinilakamo ka' aha iwi-iwi' nonjoongakonmo liibos hi ia tinolumpulu' na sinaa na kinopinnyo.