NOMBILANGMO 17 - KITAB NU TUMPU ALLA LELE MA'IMAI'

Tokon i Harun

¹ Tumpu notataemo hi Musa

² “Poto'i na aha mian nu Israel da mombee'i mae beleyum tokon sampulu' ka' ohua', batu-batu tompukan nu tulunan nu bansa mombee'mo mae sa'angu' na tokon, ka' tionyo ahi' obee' hi to pola-polaya' nu tulunan nu bansa. Sanggo nu polaya'nyo opotulis i tokonnyo,

³ ka' sanggo i Harun opotulis i tokon nu aha tulunan mae nu tompukon nu aha bansa Lewi. Samian na polaya' nu aha tompukan nu tulunan nu bansa tionyo ahi' obee'i sa'angu' na tokon.

⁴ Boa na tokon haha aijo' i Kemah-Ku, ka' opotimpas i ahop nu Peti' Palajanjian, tampat-Ku biasa singkabot tiba belemiu.

⁵ Tokon nu mian anu Ku pile'imo atina' minsumpemo. Tiba jalan anu sumo aijo', Ku pobelentimo na pososon nu to mia-mian anu saja' monsosoli belemiu.”

⁶ Han aijo' pinoto'imo i Musa hi aha mian nu Israel. Lantas to pola-polaya' nu aha mombee'mo hi ia, toto sa'angu'an na tokon anu ingala hi toto samian na polaya' nu aha tompukan nu tulunan nu bansa. Iwi-iwi'mo sampulu' ka' ohua' na tokon, ka' sala'sa'angu' kiijo'mo na tokon i Harun.

⁷ Lantas pinotimpasmo i Musa na tokon haha aijo' i uno nu Kemah nu Tumpu i ahop nu Peti' Palajanjian.

⁸ Dodododopnyo, salatan i Musa ninsoopmo i Kemah nu Tumpu, tinoanyo tokon i Harun aijo'mo tokon nu tompukan nu tulunan mae nu aha bansa Lewi ninsumpemo. Tokon aijo' mulaimo nimbuhak, nimbuhakmo ka' nimbua'mo ketapang anu motu'amo!

⁹ Ingalamo i Musa na tokon haha aijo' iwi-iwi', lantas pinotoanyomo hi aha mian nu Israel. Tinoamo nu aha apaa na anu jinadimo, lantas toto samian na polaya' haha aijo' po'ule'mo mongala tokonnyo.

¹⁰ Lantas Tumpu notataemo hi Musa, “Po'ule' potimpas na tokon i Harun i ahop nu Peti' Palajanjian. Tokon aijo' tionyo ahi' opo'una' salaku bau tanda saja' o'inau' nu aha mian Israel, anu saja' moto'idek saba' aha matemo de aha saja' mososon.”

¹¹ Apaa na anu pinalentahkonmo nu Tumpu binaumo i Musa.

¹² Lantas aha mian nu Israel notataemo hi Musa “Desumo aijo', silakamo na kami! Kami matemo!

¹³ Mian anu mongohanimo Kemah nu Tumpu lantas tionyo ahi' matemo, taalu' madi'mo ko anu otaha'imani mami.”