MIKHA 1 - KITAB NU TUMPU ALLA LELE MA'IMAI'

¹ Pinolengkatan mae i Mikha i sa'angu' na kota' anu ise' sanggonyo Moresyet. Tempo'nyo lipu' nu Yehuda pinalentahmo nobolo-bolosan na Tomundo' aijo'mo i tomundo' Yotam, i Ahas, tiba i Hizkia. I Mikha nohumpakmo potuunon hi Tumpu mongkona Samaria tiba Yerusalem.

Nohangimo Samaria tiba Yerusalem

² Potombihing mae o bansa-bansa! Opalahatikan belemiu mian anu jojoong i songko-songko na dunia! Tumpu Anu Matangkas na kuasanyo tokamo mae susumo sakisi mongahopimo belemiu iwi-iwi'! Potombihing na Ia motataemo lengkat mae i Laigan-Nyo anu susi' kiita i suluga'.

³ Ia mintatau'mo mae lengkat i kajojoongan-Nyo anu susi' ka' lumajangmo aita' i bawo nu to bungku-bungkutnyo i dunia aiya.

⁴ To bungku-bungkutnyo hansunmo akaong i pala-Nyo susumo lilin i uno nu apu anu moakmo, tano'nyo motuba-tubasmo minsoopmo mokaiyong i to bangka-bangka'-Nyo, susumo uee anu aita' mae i bungkutnyo mo ilimo mokaiyong i hatanyo.

⁵ Iwi-iwi' aijo' saidi' mae jadimo kalana aha mian nu Israel binaladosa'mo ka' saja'mo notomuhuk hi Tumpu. Ihe na nonsaduakonmo aha mian nu Israel sahingga binaladosa'mo? Temisa' Samaria ahi' puso nu kota' Yerusalem?

⁶ Mokonyo aijo' Tumpu notataemo, “Kupojadimo na Samaria timbali tambulan nu laigan anu i hansunmo kiijo' mae i padang ka' mule' timbalimo posu'anan anggur. Kota' anu i hansunmo aijo' Ku alinmo i bangka'nyo ka' mule' pundasinyo Ku kekeimo.

⁷ Iwi-iwi' na patong anu mahan na olinyo ohansunimo ka' balang anu binee'mo hi to bou-boune anu mokalaja' i kuil opapuimo, ka' mule' iwi-iwi' na pilogotnyo ohansunimo. Balang haha aijo' anu ohumpak de aha monsombahmo pilogot momombee'i kalumba'an nu tano'. Uuka aiya iwi-iwi' aijo' oboamo nu sampobali' da bau palasombahan salaku pontalimakase hi to pilo-pilogot nu aha.”

⁸ Kalana aijo' aku, i Mikha nolibosmo na kinyonyoa ka' nompele-pele'mo. Aku i lumajangmo langgo-langgo' ka' madi'mo ni sapatu da pompotoa talalomo hondo nolibos na kinyonyoangku. Aku nolohu'mo susumo dedeng nu alas ka' nolokekmo susumo tominsi' unta.

⁹ Kalana bela nu Samaria madi'mo opoko pakuli'i ka' Yehuda mule' nu konamo nu nasip anu pokakana. Balaa' tokamo i Yerusalem, anu jinadimo sabatan daka' nu tano' kinahampeanku.

Sampobali' malia'mo mae toka i Yerusalem

¹⁰ Boli mompoto'i hi aha sampobali'to anu kiijo' mae i Gat mongkona anu jinadimo mae hi kita. Boli mompojohok aha montoa mae belemiu humangmo. O mian anu jojoong i Bet-le-Afe, pingkaliade'mo atina' i abu' salatan madi'mo ko anu otaha'imani apa-apaa!

¹¹ Belemiu mian anu jojoong i Safir, lako'mo i tampat pomboan ka' pompojoongan bolimo pilenje mibaju' ka' pa'ambangmo! Aha mian nu Zaanan madi'mo baani na mosabat lengkat i kota' nu aha. Kihis nu mian anu jojoong i Bet-Haezel momposumbu' hi belemiu saba' ikiijo' mae madi'mo ko anu montulungi.

¹² Balaa' anu lengkat mae hi Tumpu tinokamo i ahop nu sabatan daka' nu Yerusalem! Kalana aijo' madi'bisa na mian nu aha Marot taha'iman au'aitu ko anu mae montulungi.

¹³ Belemiu mian anu jojoong i Lakhis pokonamo na ajahan i kareta anu opake mahampate! Belemiu nontihomo dosa' iwi-iwi' anu bibinaumo nu aha mian kiijo' i Israel sahingga nonsaduakonmo Yerusalem suele binaladosa'mo.

¹⁴ Uuka aiya aha mian nu Yehuda, belemiu madi'mo ko kota' Moresyet-Gat. To tomu-tomundo' nu aha Israel madi'mo daagi' ko anu montulungi lengkat mae i kota' Akhzib.

¹⁵ O, mian nu Maresya, Tumpu mombee'mo belemiu hi sampobali' anu mompatundu'mo kota' nu belemiu. To pola-polaya' nu aha Israel anu balakuasa matisulukmo i uno nu to lia-liang kiijo' mae i Adulam.

¹⁶ O, mian nu aha Yehuda guntingimo na ubak nu belemiu da bau salaku tanda saba' to ana-anak nu belemiu anu okalibosi hondo nu belemiu silakamo. Kiismo na ubak nu belemiu sampe longkung susumo tomonsi' anu pangkaan bangke' nu binatang kalana to ana-anak nu belemiu oboamo itampat anu bau pompojoongan aha.