MAZMUR 36 - KITAB NU TUMPU ALLA LELE MA'IMAI'

Palabuatan ma'idek nu manusia ka' kanonongan nu Tumpu

¹ Anu mongkapalai panyanyi. Mazmur i Daud posaihon nu Tumpu.

Palabuatan ma'idek nu manusia

² Dosa notataemo i uno nu kinyonyoa nu mian anu palabuatannyo ma'idek, ia koonyo madi' hondo-hondo mabuhuk hi Tumpu.

³ Ia monsangka butongnyo ihebatmo hondo, sahingga madi'mo nu oa'i na kasala'annyo ka' madi' ahi' nu ka'ideki na palabuatannyo.

⁴ Potataenyo saja' anu toto ide-idek ka' kaho potatae anu mongakali ia madi'mo daagi mombau anu ma'ima' ka' madi'mo montiho kalakuan nu mian anu pande.

⁵ Itampat kahoyotannyo ia sola'mo montanga'i palabuatan ma'idek; palabuatannyo madi'mo daagi' ko anu ma'ima' anu ma'idekmo na anu nu ka'ima'i.

Kanonongan nu Tumpu

⁶ O Tumpu kalibosan nu Belento matangkas hondo sumo langit ka' mule' kanonongan nu Belento toka-tokamo i kundom.

⁷ Kanonongan nu Belento matunjo hondo sumo ko tangkasnyo nu bungkutnyo, ka' ka adinan nu Belento sumo koleengnyo nu ndalangon; manusia tiba binatang Belento na mompotuu' o Tumpu.

⁸ Talalo ahi' koangga'nyo na kalibosan nu Belento o Tumpu, manusia mihohung i uno nu hohung nu polipik nu Belento.

⁹ Sinukupmo na aha nongkaan anu nolabi-labimo i Laigan nu Belento tiba uee anu o'inum lengkat i kaunyo nu Belento anu sanang hondo na ingoa'anmo.

¹⁰ Belentomo na pinolengkatan nu kantumuu'an nu iwi-iwi' na anu konyawanyo, i uno nu jingka nu Belento na kami nontoamo jingka.

¹¹ O'amalakon da Belento tataap ahi' mongkalibosi mian anu monsumbu'i Belento, ka' mombau palabuatan ma'ima' hi mian anu madi' hodi' na kinyonyoa.

¹² Boli opojohok na aku nu tumbuhimo mae nu mian anu buulon, kabai nu laa'mo nu mian anu ma'idek na palabuatannyo.

¹³ Soba toa na mian anu mombau palabuatan anu ma'idek notua'mo, aha ka' madi'mo daagi' moko ala nobula.