MAZMUR 27 - KITAB NU TUMPU ALLA LELE MA'IMAI'

Do'a pompuji' Tumpu

¹ Mazmur i Daud. Tumpu aijo'mo na jingkaku ka' kasalamatanku, madi'mo ko anu ku kabuhuk. Tumpu aijo'mo na benteng bau pihohunganku, aku madi'mo mabuhuk.

² De aku nu tumbuhi mae nu mian anu ma'idek na kinyonyoanyo anu kahanda'mo mompatei mae aku ahamo ahi' na tosumpun ka' tombahangkangmo.

³ Maumo ahi' aku otiku nu gombuan nu suludadu anu da'isan hondo, aku madi'mo mabuhuk. Maumo ahi' tokamo mae na anu mompahampateakon mongewa aku, aku tataap sabole-bole montaha'imani Tumpu.

⁴ Ola sa'angu' na anu ku kakase hi Tumpu, ola aiya na anu ku kahanda'i: jojoong i Laigan nu Tumpu sampe toka sidu-sidutu' de aku daagi' tutuu' da ku oa'i na kanonongan nu Tumpu, ka' mongkakase da nu pokinde'i mae nu Tumpu.

⁵ Tumpu na monjagai mae aku de aku nu tokaimo mae nu kasusa'an; Ia momposuluk aku i uno nu Laigan-Nyo, ka' mohangkat aku mokiita' ibungkutnyo nu batu.

⁶ Uuka aiya aku inguntungmo na nahampate nongewa sampobali'ku anu nontikubimo mae aku; jadi aku nontaligalaimo kalana ilame'mo, ka' sinombahkonkumo na koloban bau pontalima kaseh i Lagian nu Belento; aku manyanyimo ka' mompuji'mo Tumpu.

⁷ O Tumpu potombihingakon mae de aku mongkakasemo momoita tulung hi Belento, kalibosiakon mae na aku ka' taami mae na aku!

⁸ Belento notataemo, “Tokamo mae monsombah Aku.” Tinaamankumo, “Aku malia-lia'mo mae toka, o Tumpu;

⁹ boli matisuluk dumo madi' ku toa.” Boli motambuha' ka' mongka'idekimo mae posaihon nu Belento aiya, kalana Belentomo na anu nontulungimo mae aku. Boli mongalin aku kabai mompala'imo mae aku, O Tumpu, anu nomposalamatmo aku.

¹⁰ Maumo ahi' tuuma tiba tinangku mompala'imo aku, Tumpu na mompotuu' aku.

¹¹ Poto'i mae hi belengku apaa na anu nu kahanda'i nu Belento, o Tumpu, taka' mae na aku ijalan anu hodi', kalana sampobali'ku da'isan hondo.

¹² Boli mombee' aku i pisuu nu mian anu mongewamo mae aku, anu molambanimo mae aku nu potatae toto bale-baleko' ka' kahanda'mo mompatei mae.

¹³ Aku palesaya hondo totu-totu'u saidi' mae mongoa'ije kanonongan nu Tumpu i uno nu kantumuu'anku i dunia aiya.

¹⁴ Sabole-bole ahi' taha'iman hi Tumpu, pohoson ka' bolimo mongabali' na kinyonyoa nu beleyum; ingat, sabole-bole ahi' taha'iman hi Tumpu.