MAZMUR 121 - KITAB NU TUMPU ALLA LELE MA'IMAI'

Tumpu na monjagai mae kita

¹ Nyanyian mamba i tampat anu ko balakatnyo Aku montoa mokiita' ito bungku-bungkutnyo, lengkat mae iya na anu montulungi aku?

² Anu montulungi mae aku lengkat mae hi Tumpu anu nompotimbalimo langit ka' tano'.

³ Ia madi' mompojohok beleyum mohumpak balaa', anu monjagai beleyum saja' balajaga-jaga.

⁴ Memang, anu monjagai Israel aijo' madi' toho' matatundu' kabai kahoyotan.

⁵ Tumpu na monjagai beleyum Ia saja' i sohipi' nu beleyum da monjagai beleyum.

⁶ Beleyum madi' nusakiti nu singit de sinaamo, kabai kalana bitu'on de malomo.

⁷ Tumpu na monjagai beleyum da madi' mohumpak balaa' Ia na monjagai beleyum da kantumuu'an nu beleyum salamat.

⁸ Ia na monjagai beleyum, de beleyum toka mae ka' mambamo, uuka aiya ka' sampe toka sidu-sidutu'.