MARKUS 1 - KITAB NU TUMPU ALLA LELE MA'IMAI'

Sisikon i Yohanes anu Mompalamandikan

¹ Aiyamo na Lele Ma'ima' anu mongkona i Yesus Kristus, Anak nu Tumpu.

² Lele Ma'ima' aijo' lengkat pe'e sumo anu tinulis i Nabi Yesaya, sumo uuka, “ ‘Aiyamo na posaihon-Ku,’ koonyo nu Tumpu; ‘Aku monsai ia imoona, Beleyum i mihije, da ia mombau kajalananum.’

³ Daagi' ko mian molo-moloboo' i padang bone', ‘Posadiamo na jalan hi Tumpu; pohatakon na to jala-jalan anu Nu tului.’ ”

⁴ Sumo anu tinulis aijo', sumo aitumo na i Yohanes i lubat mae i padang bolaa. Ia nompalamandikan mian ka' nompotokakon lele lengkat mae hi Tumpu. “Komiu tionyo mombabali'i dosa-dosa'um ka' tionyo o palamandikan, da Tumpu mongampuni komiu,” sumo aitu na koonyo i Yohanes.

⁵ Iwi-iwi' na mian anu nolengkat mae i kampung Yudea ka' i kota Yerusalem namba nohongo i Yohanes. Aha nongakui to dosa-dosa' nu aha, ka' i Yohanes nompalamandikan aha i Kaunyo nu Yordan.

⁶ I Yohanes nompake pakean bulu nu unta. Pombutu'nyo atina'mo kilit, ka' anu nukaan kihi-kihi', ka' juu' nu uani'.

⁷ Ia noleleakon sisik aiya, “Lapasje na aku, ka' toka na mian anu lebe daka' molingkudui aku. Ka' matiduku mombukai segot nu sapatunyo pe'e, aku madi' pantas.

⁸ Aku mompalamandikan komiu nu uee, panyo ia mompalamandikanje komiu nu Roh nu Tumpu.”

I Yohanes nompalamandikan i Yesus

⁹ Tempo'nyo aitu i Yesus tinoka lengkat mae i Nazaret, i tano' nu Galilea, ka' i Yohanes nompalamandikan Ia i Kaunyo nu Yordan.

¹⁰ Salatan i Yesus i lubat lengkat i uee aijo', Ia nontoa langit tinabuka' ka' Roh nu Tumpu nintatau' mae sumo tomonsi' malapati' i buan nu ubak-Nyo.

¹¹ Lapas aitu i hongonyo potatae nu Tumpu nontaeakon, “Beleyum na Anak anu Ku kalibosi. Beleyum na anu momposanang kinyonyoangku.”

I Yesus sinobaan nu Ibilis

¹² Lau-laus lapas aitu Roh nu Tumpu nomboa i Yesus i padang bolaa.

¹³ Patompulu' na sinaa Ia jinojoong i kiijo', sinobaan nu Ibilis. To bina-binatang anu ma'ela' suele kiijo' tiba Ia, ka' to mala-malaikat anu mongkalibosi Ia.

I Yesus nolaga aha opat na anu saja' mongikan

¹⁴ Salatan i Yohanes tinalungku', i Yesus namba nokiijo' i Galilea, ka' noleleakon Lele Ma'ima' lengkat hi Tumpu i kiijo' mae.

¹⁵ Koo-Nyo, “Tumpu malia'mo montampu'uni mompalentah. Balatobatmo bolimo mombau dosa-dosa'um, ka' opalesayamo na Lele Ma'ima' anu lengkat mae hi Tumpu!”

¹⁶ Salatan i Yesus i lumajang i biwi nu Dowiwi Galilea, Ia nontoa ua'aha na anu saja' mongikan, aitumo i Simon ka' utus ise'nyo i Andreas. Aha hau-haunyo mompagala ikan i dowiwi aijo' nu buani'.

¹⁷ I Yesus notatae hi aha, “Batuki na Aku. Aku mongajan komiu mombuani' mian.”

¹⁸ Lau-laus aha nompala'i buani' nu aha, ka' nombatuki Yesus.

¹⁹ I Yesus i lumajang lau-laus, ka' nontoa mule' ua'aha na mian moto utus anu sangga'at, aitumo i Yakobus ka' i Yohanes, to ana-anak i Zebedeus. Aha kiijo' i uno nu duangan, ka' hau-haunyo mompoko'ima'i buani' nu aha.

²⁰ I Yesus lau-laus nolaga aha. Ka' aha nompala'i tuuma nu aha i uno nu duangan tiba te mian anu tinamboannyo. Lantas aha namba nombatuki Yesus.

Mian anu sinoku'on nu roh ma'idek

²¹ I Yesus ka' anu saja' mombatuki Ia tinoka i kota Kapernaum. Tempo' po'ule'mo sinaa nu Sabat, i Yesus ninsoop i uno nu laigan pogalejaan, ka' nontampu'uni nongajan.

²² To mia-mian anu nohongo, binangang i balu-balu'-Nyo nu Ia nongajan. Kalana Ia mongajan ko kuasa-Nyo, madi' sumo to gulu-gulu' agama.

²³ Tempo'nyo aitu anu sinoku'on nu roh ma'idek ninsoop i uno nu laigan pogalejaan, ka' noloboo',

²⁴ “O Yesus, mian nu Nazaret, Beleyum mongka'oho' mombau apaa hi kami? Beleyum toka da monsilakai kami? Kusumbu' ihe na Beleyum: Beleyumo na posaihon anu Susi' lengkat mae hi Tumpu Allah!”

²⁵ “Hokot!” sinegaan i Yesus na roh aijo', “Posabatmo lengkat hi mian aiya!”

²⁶ Sahingga roh ma'idek aijo' nompada-padahakon mian aijo' hoso-hoson, lapas aitu nosabat lengkat hi mian aijo' ka' noloboo'.

²⁷ Iwi-iwi' na mian binangang hondo, ka' sinailapas aha notatae samian ka' sangga'at, “Ibeh apaa na aiya? Sa'angu' na pokinde' anu sala'je! Tiba palentah ka' kuasanyo, Ia mompalentah to roh-roh ma'idek nosabat, ka' aha nohongo Ia!”

²⁸ Sahingga lele mongkona i Yesus tinogilelemo lia-lia' i songko-songko na tano' nu Galilea.

I Yesus nompa'alin da'isan na mian

²⁹ I Yesus ka' anu saja' mombatuki Ia, nompala'imo laigan pogalejaan aijo', ka' namba i laigan i Simon ka' i Andreas. I Yakobus ka' i Yohanes namba suele ka' aha.

³⁰ Monian tina nu bengkele' i Simon hau-haunyo nusihabi i kamale'an. Tempo'nyo i Yesus ka' anu saja' mombatuki Ia ninsoopmo i laigan aijo', pinoto'imo hi Yesus na han aijo'.

³¹ Sahingga i Yesus namba hi tina nu bengkele' i Simon ka' nontoongi limanyo, ka' nonsampusi ia nobula. Panasnyo na'alinmo ka' ia mule' nontampu'unimo nomposadiai kapalaluan nu aha.

³² Mamalom salatan sinaa makakinsapmo, to mia-mian nomboa hi Yesus iwi-iwi' na mian anu masakit, ka' anu sinoku'onmo nu roh ma'idek.

³³ Songko-songko na miannyo i kota aijo' nosa'angu'mo i ahop nu laigan aijo'.

³⁴ Lantas i Yesus nompa'alinakon da'isan na mian anu mongoa'i sansala nu ngangahan na panyakit, ka' nolaa' mule' manjoo' na roh ma'idek. Ia madi' nompobee' to roh-roh ma'idek aijo' motatae, kalana aha monsumbu' ihe na Ia.

I Yesus nongajan i Galilea

³⁵ Dodododopnyo, daagi' subu-subu hondo i Yesus nobula ka' nompala'i laigan. Ia namba nokiijo' i tampat anu liing i sambiha' nu kota, ka' binalado'a i kiijo' mae.

³⁶ Panyo i Simon ka' to sanga-sangalunyo namba nolio Ia.

³⁷ Ka' salatan aha nompahakabot Ia, aha notatae, “Iwi-iwi' na mian hau-haunyo molio kita Tuuma.”

³⁸ Panyo i Yesus nontaami, “Imbo' da kita molausakon lumambananto i kota-kota sangga'at anu mompaha ohani aiya. Aku tionyo mombee'i sisik nu Tumpu kiijo' mae, kalana aijo'mo na patujungku toka mae.”

³⁹ Kalana aijo' i Yesus namba noyaya, songko-songko i Galilea, ka' nombee'i sisik nu Tumpu i to lai-laigan pogalejaan, ka' nolaa' to roh-roh ma'idek.

I Yesus nompa'alin samian anu ko panyakit kilit

⁴⁰ Samian na anu ko panyakit kilit anu talalo okabuhuk tinoka hi Yesus. Mian aijo' natidupu ka' notatae, “De Tuumangku mongka'oho', Tuumangku timbali nompa'alin aku.”

⁴¹ I Yesus nolibos hi mian aijo'. Jadi, Ia nompanya mian aijo' ka' Ia notatae, “Aku mongka'oho', pa'alinmo!”

⁴² Tempo'nyo aijo' panyakit aijo' imadi'mo ka' na'alinmo.

⁴³ Lantas i Yesus nonsai ia namba tiba pokinde' aiya,

⁴⁴ “Jaga, boli o sisik mau mule' hi he, panyo lako'mo hi imam, ka' poita na ia da mompototu'u saba' beleyum na'alinmo. Lantas bau pina'alinanum aijo', palasombahkon na koloban sumo anu pinalentahkon i Musa, salaku bukuti' hi aha to mia-mian, kalana beleyum totu-totu'u na'alinmo.”

⁴⁵ Panyo mian aijo' namba, ka' lau-laus saja' nonsisik anu jinadi aijo' iyayamae sampe i Yesus ola ninsoop hoko-hokot i kota. Ia ola jinojoong i sambiha' nu kota i tampat anu liing. Mau sumo aijo' mian saja' toka hi Ia, lengkat iyayamae.