MALEAKHI 2 - KITAB NU TUMPU ALLA LELE MA'IMAI'

¹ Tumpu Anu Daka Na Kuasanyo notataemo hi to ima-imam, “Sumo uuka na palentang-Ku toka hi belemiu:

² O adati mae na Aku nu palabuatan nu belemiu. De belemiu madi' mongka'oho' mompotombihing potataeng-Ku, belemiu Ku kutukimo. Iwi-iwi' na anu ihumpakmo nu belemiu salaku lejeki obali'mo timbali kutuk. Memang ahi' iwi-iwi' na anu toto ima-ima' aijo' kinutukan-Kumo kalana belemiu madi' montapali palentang-Ku.

³ To ana-anak nu belemiu Ku hukumo ka' mule ohup nu belemiu Ku sapuimo nu sengkun nu binatang anu kinolobanakonmo nu belemiu, ka' mule' belemiu oboamo i tambulan nu sengkun.

⁴ Sahingga osumbu'je nu belemiu talu' palentah aiya binee'-Kumo, da palajanjian-Ku tiba to ima-imam lee' i Lewi tataap ahi' saja' opake.

⁵ I uno nu palajanjian aijo' jinanji'-Kumo hi aha na kantumuu'an anu madi'mo ko anu mompoposia ka' mule' mohumpakmo ka'ima'an i uno nu kantumuu'an ka' mule' aha Ku palentahmo mongadati Aku. Toka i tempo'nyo aijo' aha memang mongadatimo Aku ka' mule' mongkabuhukmo Aku.

⁶ Aha mompogulu'mo han anu totu'u misa'mo anu madi' totu'u. Aha mompahakonamo hondo tiba Aku ka' mule' sahondo-hondonyomo na montuluti pongka'oho'-Ku. Aha mule' ahi' montulungimo manjoo' na mian da madi'mo daagi' mombau palabuatan anu ma'idek.

⁷ Memang ahi' kahalusan nu to ima-imam na mompogulu' han anu totu'u apaa na anu Ku kahanda'i, Tumpu Anu Matangkas na Kuasanyo. Hi ahamo ahi' na tampat nu mian da'isan mompokilawa apaa na anu Ku ka'ima'i kalana ahamo ahi' aijo' na anu pinalentang-Kumo da mompoto'i.

⁸ Panyo uuka aiya belemiu to ima-imam noselemo madi' nontulu jalan anu sahondo-hondonyo. Iwi-iwi na pangajalan nu belemiu nonsaduakonmo da'isan na mian sahingga nombaumo kasala'an. Belemiu nongideimo palajanjian anu binaung-Kumo tiba belemiu.

⁹ Sahingga Aku suele mompotimbalimo belemiu madi' nu pajuli nu mian Israel kalana belemiu madi'mo nontuluti pongka'oho'-Ku ka' mule' kalana belemiu mombeda-bedakon mian tempo'nyo nompogulu' mian anu palesayamo hi belengku.”

Mian da'isan madi'mo tinulu-tulutan hi Tumpu

¹⁰ Temisa' kita iwi-iwi' aiya ko tuuma ahi anu pokakana? Temisa' kita iwi-iwi' aiya pinotimbali ahi' nu Tumpu anu pokakana? De sumo aijo' kadaka' kita bubuu'mo madi' nontuluti palajanjian ka' mule' tiba jalan aijo' madi'mo nontuluti palajanjian anu bianumo nu Tumpu tiba mompolee'to?

¹¹ Mian nu Yehuda nolanggaimo palajanjian nu Tumpu tiba aha ka' nombaumo hahan anu okabuhuk hondo kiijo' i Yerusalem ka' mule' isongko-songko na lipu'. Aha nohumimi'imo Laigan nu Tumpu anu nunu ka'ima'i ka' mule' no'osoamo tiba to bou-boune anu monsombah to pilo-pilogot nu bansa sangga'at.

¹² O'amalakon da to mia-mian anu nombaumo susumo aijo' nu alinimo nu Tumpu da madi'mo maninggalo hi mian nu Israel. O'amalakon da aha madi'mo daagi' mombatuki bansato monsombahkon koloban-koloban hi Tumpu Anu Daka na Kuasanyo.

¹³ Ka' mule' daagi aiya na palabuatan sangga'at nu belemiu. Mezbah nu Tumpu i ngueeanmo nu belemiu nu lolu' nu mata; belemiu ihumangmo ka' tinumando'mo kalana Tumpu madi'mo daagi' nonsitujui nontalima iwi-iwi na koloban nu belemiu.

¹⁴ Belemiu nompokilawamo kadaka' Ia madi'mo nontalima. Kalana sinumbu'mo nu Tumpu na belemiu madi' mompalakai ima-ima' boune anu inika'anmo nu belemiu daagi tempo'nyo olitau na belemiu. Boune aijo' sangalu nu belemiu i uno nu kantumuu'nu belemiu, panyo belemiu nongkabisa'imo ia, maumo ahi' ia aijo' i ahop nu Tumpu jinanji'mo nu belemiu sabole-bole ahi' tataap montuluti Ia.

¹⁵ Temisa' Tumpu Anu olamo ahi' sa'a-sa'angu'nyo nompotimbalimo belemiu sa'a-sa'angu'nyo na butong, sa'a-sa'angu'nyo na santuu' tiba boune aijo'? Apaa na nu kahanda'i nu Tumpu i potatae aijo'? Madi' ko sangalasannyo alati'nyo da belemiu mohumpak to anak-anak anu timbali mian anu anu palesaya hi Tumpu anu sahondo-hondonyo ahi'. Jadi ojagai ahi' na butong nu belemiu, da boli ko anu atina' hi belemiu na madi' mompalakai bengkele'nyo.

¹⁶ “Aku mongka'ideki poga'atan,” na koonyo nu Tumpu nu aha Israel. “Kuka'ideki de ko sala' samian anu atina' hi belemiu mombau palabuatan anu buhingison hi bengkele'nyo. Jadi ojagai na butong nu belemiu ka' boli hondo-hondo mongkabisa'i bengkele' nu belemiu.”

Sinaa pomputusian malia'mo toka

¹⁷ Belemiu nongosaimo Tumpu nu potatae nu belemiu. Panyo pinokilawamo nu belemiu, “Te mosia na kami nongosaimo Tumpu?” Ka' notataemo, “Iwi-iwi' na mian anu nombaumo palabuatan anu ma'idek nu anggap nu Tumpu ma'ima', ka' mule' Ia situju hi aha.” Kabai nompokilawa mule' ahi', “Iya na Tumpu anu o'a-o'anggap adin aijo'?”