KAJADIAN 41 - KITAB NU TUMPU ALLA LELE MA'IMAI'

I Yusuf nontalangkanmo alati'nyo nu ipion i tomundo Mesir

¹ Noko lapas ohua' na taun, i tomundo Mesir nongipimo, au'aitu ia hau-haunyo tinjo-tinjo i biwi nu Kaunyo Nil.

² Monti-montiik popitu' na sapi' anu to lompo-lompo ka' bulunyo molonyu nosawe'mo lengkat mae i uee aijo' lantas nongototmo hemput i biwi nu kaunyo aijo'.

³ Lapas aijo' popitu na sapi' sangga'at i lubat mae mule'; binatang haha aijo' magesuk ka' me kilit na kampi-kampit i buku. Sapi' anu toto gesu-gesuk haha aijo' tinuminjomo i sohipi' nu sapi' haha aijo' toto lompo-lompo' i biwi nu kaunyo aijo'.

⁴ Lapas aijo' sapi' anu toto gesu-gesuk haha aijo' nongkaanmo sapi' anu toto lompo-lompo'. Lapas aijo' i tomundo nobulamo.

⁵ Lapas aijo' ia po'ule'mo i hoyot ka' nongipi mule'. I uno nu ipionnyo ia nontoa popitu' na bua' nu gandum anu ko antoknyo ka' singkapmo i naha, nimbua' i sangkau' na koengannyo.

⁶ Lapas aijo' nimbua' mule' popitu' na bua' nu gandum sangga'at, anu toto kipa-kipak ka' makadampihi' kalana kinonamo nu mombun anu lengkat mae i padang bola.

⁷ Lantas bua' nu gandum anu to kipa-kipak haha aijo' nolonyomo popi-popitu' na bua'nyo nu anu koko antoknyo u'uka. Lapas aijo' i tomundo nobulamo ka' sininsumbu'mo taalu' ia nongipimo.

⁸ Subu-subu mae i tomundo madi'mo sinanang na kinyonyoa, kalana aijo' pinalentahnyomo da olaga mae iwi-iwi' na anu pande montili'i ipion ka' mian anu ko ilimu'nyo i Mesir. Lantas sinisiknyomo na ipionnyo hi aha, panyo madi' ko samian pe'e na noko ala nontalangkan poso'nyo.

⁹ Lapas aijo' anu mongkalesang inumon notataemo hi tomundo, “Sinaa aiya ku akuimo na kasala'anku.

¹⁰ U'utu mae belento tomundo nontambuha'imo anu mongulus roti ka' hi belengku, lantas kami pinosoopmo i uno nu talungku', i laigan nu kapala anu monjagai laigan nu tomundo.

¹¹ Daagi' kino sampahuan kami ohua' nongipimo ka' ipion mami aijo' madi' pokakana na poso'nyo.

¹² Samian na olitau nu Ibrani kiijo' mae tiba kami. Ia posaihon nu kapala anu monjagai laigan nu tomundo aijo'. Kami nonsisikmo ipion mami hi ia, lantas tinalangkannyomo na poso'nyo nu ipion aijo'.

¹³ Iwi-iwi' inyata' totu'u jinadimo susumo anu tinaloakonnyomo, aitumo: i Tomundo po'ule'mo nompokalaja aku i pakalaja'anku anu momona, panyo nohukumo pinatean na anu mongkalesang roti aijo'.”

¹⁴ Sahingga i tomundo nompalentahmo da mamba mongala i Yusuf, ka' lia-lia' na ia sinabatakon mae i talungku'. Noko lapas binakis na i Yusuf ka' nombolosi baju'nyo, ia nangadapmo hi tomundo.

¹⁵ Notataemo na i tomundo hi ia, “Aku nongipimo, ka' madi' ko samian pe'e na noko ala nontalangkan poso'nyo. Daagi' ko anu nompolele hi belengku koonyo beleyum na moko ala montalangkan poso'nyo.”

¹⁶ Tinaaman i Yusuf, “misa' aku Tuanku, panyo Tumpu Allah na montili'i anu sahondo-hondonyo.”

¹⁷ Lantas notataemo na i tomundo, “Aku nongipi au'aitu aku hau-haunyo tinjo-tinjo i biwinyo nu Kaunyo Nil.

¹⁸ Lantas nosabat mae i kaunyo aijo' popitu' na sapi' anu toto lompo-lompo' ka' molonyu na bulunyo. Lantas nongototmo hemput i biwi nu kaunyo aijo'.

¹⁹ Lapas aijo' i lubat mule' mae popitu' na sapi' sangga'at anu toto gesu-gesuk ka' me kilit na kampi-kampit i buku. Ma'isa toho' aku nontoa sapi' anu sumo aijo' na ko ideknyo i songko-songko na Mesir.

²⁰ Sapi' anu toto gesu-gesuk haha aijo' nongkaanmo sampe i ningkot popi-popitu' na sapi' anu molompo' u'uka.

²¹ Panyo lapas aijo' sapi' anu toto gesu-gesuk haha aijo' daagi' sajojoongannyo magesuk. Lantas nobulamo na aku.

²² Lapas aijo' aku po'ule'mo i hoyot ka' nongipi mule', au'aitu aku nontoa popitu' na bua' nu gandum anu ko antoknyo ka' i nahamo iwi-iwi' nimbua' i sa'angu' na koengannyo.

²³ Lantas po'ule' mule' nimbua' popitu' na bua'nyo nu gandum anu toto kipa-kipak ka' makadampihi' kalana kinonamo nu mombun anu lengkat mae i padang bola.

²⁴ Bua'nyo nu gandum anu toto kipa-kipak haha aijo' nolonyomo bua'nyo nu anu koko antoknyo u'uka. Sinisikkumo ohu-ohua' na ipionku aijo' hi to mia-mian anu pande montili'i ipion, panyo madi' ko samian pe'e na noko ala nontalangkan poso'nyo.”

²⁵ Lantas notataemo na i Yusuf hi tomundo, “Ohu-ohua' na ipion aijo' pokakana na alati'nyo: Tumpu Allah nompoto'imo hi belento Tuanku, apaa na anu tionyo Nu bau.

²⁶ Popitu' na sapi' anu molompo' aijo', aijo'mo popitu' na taun, ka' popitu' na bua' nu gandum anu ko antoknyo aijo', aijo'mo popitu' na taun suele, ohu-ohua' aijo' pokakana na alati'nyo.

²⁷ Popitu' na sapi' anu toto gesu-gesuk anu tinoka mae i mihi, ka' popitu' na bua' nu gandum anu toto kipa-kipak kalana kinonamo nu mombun anu lengkat mae i padang bola aijo', aijo'mo tempo' nu kakulangan i anu okaan kopinnyo popitu' na taun.

²⁸ Susumo anu tinaloakonkumo hi belento Tuanku, Tumpu Allah nompotoamo hi belento Tuanku apaa na anu saidi' mae nu bau.

²⁹ Tokaje mae mule' popitu' na taun na tempo'nyo na anu saja' sanang i songko-songko na lipu' nu Mesir.

^30-31 Lapas aijo' tokaje mule' popitu' na taun na kakulangan i anu okaan ka' tempo' nu kasanangan aijo' okolilimimo hondo kalana tempo' nu kakulangan aijo' pin hondo, sahingga lipu' aiya mapenggesmo.

³² Ipion nu belento Tuanku pininduan, aijo' alati'nyo saba' han aijo' pinotantumo nu Tumpu Allah ka' Tumpu Allah mombaumo lia-lia'.

³³ Kalana aitu lebe ma'ima' belento Tuanku mompile'imo samian na anu pande ka' ma'ima' na mongatun, obee'i kuasa da mongatun lipu' aiya.

^34-35 Belento mule' Tuanku tionyo ahi' mohangkat anu mokalaja sangga'at ka' mombee'i aha kuasa molimu' anu olima' na bahagian, sambahagian na o ala na bua'nyo nu gandum iwi-iwi' anu pinadakmo; popitu' na taun na kopinnyo i uno nu tempo'nyo nu kasanangan aijo'. Lantas opo una' i to kota-kota ka' o jagai.

³⁶ Gandum aijo' pontoukai kaanon kopinnyo popitu' na taun de tokamo na tempo'nyo nu kakulangan i anu okaan i Mesir. Desumo aitu yo layat madi' mate nu ohop.”

I Yusuf i hangkatmo tinimbali gubernur i Mesir

³⁷ I Tomundo tiba anu ko pangkatnyo sangga'at monsitujuimo tanga'an i Yusuf aijo'.

³⁸ Lantas i tomundo notataemo hi aha, “Susa' na kita mohumpak mian sangga'at anu lebe sosok molingkudui i Yusuf, kalana ia nubaya'i nu rok nu Tumpu Allah.”

³⁹ Sahingga i tomundo notataemo hi Yusuf, “Tumpu Allah nompoto'imo iwi-iwi' aiya hi beleyum, jadi nanasamo beleyum lebe pande ka' monsumbu' mongatun molingkudui mau mule' pa' ihe.

⁴⁰ Beleyum ku hangkatmo timbali gubernur, ka' iwi-iwi' na layatku tionyo ahi' nontuluti palentah nu beleyum. Ola aku na lebe matangkas na kuasa molingkudui beleyum.”

^41-42 Lapas aijo' i tomundo nongukatmo sinsingnyo anu aijo' i bua' nu limanyo, anu ingukin ko sap nu kalaja'an, lantas pinopusokmo i bua' nu lima i Yusuf ka' notatae, “Tiba jalan aiya beleyum i hangkatkumo timbali gubernur i songko-songko Mesir.” Lapas aijo' pinopusoknyomo hi Yusuf sa'angu' na juba' lenan anu ma'ima' ka' pino olo'mo i gogohongnyo sa'angu' na lante' mosoni'.

⁴³ Lantas binee'nyomo hi Yusuf na kaleta nu kalaja'an anu ko ohua'nyo da bau kasake'annyo ka' anu saja' monsangalui salaku bau pongadati tomundo lumajang aita' imoona i kaleta aijo' ka' lewa' moloboo'akon “Jaga! Bee'i jalan! Bee'i jalan!” Sumo aijo' na i Yusuf i hangkatmo tinimbali gubernur i songko-songko na Mesir.

⁴⁴ Notatae na i tomundo hi ia, “Aku na tomundo – ka' ku poto'i saba' de misa' kaloasan lengkat hi beleyum, madi' ko samian pe'e i songko-songko na Mesir, timbali mombau apa-apaa.”

^45-46 Lantas i tomundo nonsanggohimo i Yusuf sa'angu' na sanggo, i basa nu aha Mesir, aitumo i Zafnat – Paaneah. Pino'osoakonnyomo suele tiba samian na anak boune sanggonyo i Asnat, anak i Potifera anu montoongi pangkat imam i kota Heliopolis. I Yusuf umunnyo tolumpulu'mo na taun salatan ia nontampu'unimo kalaja tinimbali tomundo i Mesir. Sahingga nambamo na i Yusuf lengkat i laigan nu tomundo ka' nambamo nonsongkohi iwi-iwi' na lipu'.

⁴⁷ I uno nu tempo' popitu'mo na taun na kasanangan aijo', tano' saja'mo nohasinakon sosu'anon molabi-labi.

⁴⁸ Gandum haha aijo' i limu' i Yusuf lantas pino una'nyomo i to kota-kota. Batu-batu kota pinaha po'una'annyomo gandum hasin nu to ale-ale' anu ohani' i kota aijo'.

⁴⁹ Gandum anu i limu'nyo aijo' nanjoo'mo hondo sahingga i Yusuf madi'mo nontakan, kalana konjoo'nyo sumomo bone' i biwi nu ambai.

⁵⁰ Ma'isa pe'e tinoka na tempo' nu kakulangan i anu okaan aijo', i Asnat bengkele' i Yusuf nohampeakonmo ua'aha na anak mo'ane.

⁵¹ Notatae na i Yusuf, “Tumpu Allah nompotimbalimo aku nongkolilimimo iwi-iwi' na kasansala'anku ka' hi to utu-utus nu tuumangku.” Kalana aijo' sinanggohannyomo na anaknyo anu momona “I Manasye”,

⁵² Ia notatae mule', “Tumpu Allah nombee'imo to ana-anak hi belengku i tempo'nyo aku kinasusa'an”, lantas anak ko ohua'nyo sinanggohannyomo “i Efraim”.

⁵³ Pinopitu' na taun na sinanang anu ingoa'anmo nu lipu' Mesir aijo' i ningkotmo.

⁵⁴ Sahingga tinokamo na tempo' nu kakulangan i anu okaan, madi' sala' susumo anu tinaloakonmo i Yusuf. I songko-songko na dunia tinokanmo nu kakulangan i anu okaan, panyo i songko-songko na Mesir ko kaanon anu tinoukaanmo.

⁵⁵ Salatan Layat nu Mesir nontampu'unimo sinusa' i anu okaan, aha nompoitamo anu okaan hi tomundo. Lantas i tomundo nompalentahmo aha namba hi Yusuf da montuluti iwi-iwi' apaa na anu nu palentahkon i Yusuf hi aha.

⁵⁶ Salatan kasusa'an i anu okaan kino susa-susa'nyomo ka' tinoka-tokamo i songko-songko na lipu', i Yusuf nontuhea'akonmo iwi-iwi' na gudang ka' nompobalukmo gandum hi mian nu Mesir.

⁵⁷ Lengkat mae i songko-songko na dunia, to mia-mian tinokamo mae i Mesir nongoli gandum hi Yusuf, kalana kasusa'an i anu okaan aijo' totu-totu'u sinusa'mo iyaya mae.