KAJADIAN 4 - KITAB NU TUMPU ALLA LELE MA'IMAI'

I Kain ka' i Habel

¹ Lapas aijo' i Adam noduhusmo tiba i Hawa, bengkele'nyo, lantas pinoboamo na bengkele'nyo aijo'. Ia nompohampemo samian na anak mo' ane ka' notatae, “Tumpu na nontulungi mae aku sahingga nohumpakmo samian na anak mo' ane.” Sahingga sinanggohannyomo i Kain.

² Lantas i Hawa nohampeakon mule' samian na mo'ane, sanggonyo i Habel. I Habel tinimbali polaya' domba, panyo i Kain tinimbali topo ale'.

³ Daagi' kino sa'angu' na tempo' i Kain nongalamo sambahagian na isi nu ale'nyo, lantas sinombahkonnyomo hi Tumpu.

⁴ Lantas i Habel nongalamo anak nu domba tumpenyo i sala'sa'angu' na dombanyo, kinolotnyomo, lantas sinombahkonnyomo na bagian anu talalo ma'ima' hi Tumpu. Tumpu sinanangmo hi Habel ka' suele anu sinombahkonmo aijo' kina'ima'an-Nyomo.

⁵ Panyo madi' nontalima i Kain ka' anu sinombahkonnyo. I Kain pinusamo hondo ka' ohupnyo nabisangmo.

⁶ Sahingga Tumpu Allah notataemo hi Kain, “Kadaka' beleyum pinusamo? Kadaka' ohup nu beleyum nabisangmo?

⁷ De beleyum nombaumo anu ma'ima', tantu beleyum tolomoing; panyo de beleyum nombaumo anu ma'idek, saba' dosa' montanda'imo minsoop i uno nu kinyonyoa nu beleyum. Dosa' kahanda'mo mongkuasai butong nu beleyum, panyo beleyum tionyo ahi' mohungku'i ia.”

⁸ Lantas i Kain notataemo hi Habel, utus ise'nyo, “Imbo' da kita mamba i ale'.” Salatan aha tinokamo ikiijo' i Kain nompateimo i Habel utusnyo ise'.

⁹ Pinokilawa nu Tumpu hi Kain, “Iyamo na i Habel utus ise' nu beleyum?” I Kain nontaami, “Aku madi' monsumbu'. Te aku na monjagai utusku ise'?”

¹⁰ Lantas Tumpu notatae, “Kadaka' beleyum nombaumo han anu ma'idek aijo'? Baso' nu utus ise' nu beleyum nolagamo mae aku hoso-hoson lengkat mae i tano', sumomo potatae anu moloboo' momoita da obalosakon.

¹¹ Beleyum kinutukanmo sahingga madi'mo moko ala mongusahakon tano'. Tano' aijo' nonsosopmo baso' nu utus ise' nu beleyum sumomo nonganga'akon nganga'nyo montalima baso' nu utus ise' nu beleyum salatan beleyum nompateimo ia.

¹² De beleyum mosu'an sosu'anon, tano' madi' mombee'i hasinnyo apa-apaa; beleyum timbalimo anu mahalajangan madi'mo ko tampat kajojoongan i dunia.”

¹³ Sahingga notataemo na i Kain hi Tumpu, “Hukuman itina' talalo hondo maboat madi'mo ku poko ala osimbu.

¹⁴ Belento nolaa'mo aku mosabat i tano' aiya, majo'onmo i tampat aiya anu saja' katokaan nu Belento. Aku timbalimo anu mahalajangan anu madi'mo ko tampat kajojoongan i dunia aiya, ka' maumo pa' ihe na mian mompateimo aku de nukabot nu aha na aku.”

¹⁵ Panyo Tumpu notatae, “Madi'. De beleyum opatei, saba' salaku pombalosi popitu' na mian tibamo anu mompatei beleyum aijo' suele opatei.” Lapas aijo' Tumpu nompokonaimo tanda hi Kain da ihe na singkabot tiba ia boli mompatei ia.

¹⁶ Lantas nambamo na i Kain lengkat aitu hi Tumpu ka' jinojoongmo i tano' sanggonyo, “Mahalajangan” i bahagian Eden sasu kabete'an.

Lee' i Kain

¹⁷ I Kain ka' bengkele'nyo nohumpak mo anak mo' ane anu sinanggohannyomo i Henokh. Lapas aitu i Kain nompotinjomo sa'angu' na kota ka' sinanggohannyomo na kota aijo' susumo sanggo nu anaknyo.

¹⁸ I Henokh tuuma i Irad. I Irad tuuma i Mehuyael. I Mehuyael tuuma i Metusael, ka' i Metusael aijo'mo na tuuma i Lamekh.

¹⁹ I Lamekh ko bengkele'nyo ua'aha, i Ada ka' i Zila.

²⁰ I Ada nohampeakon i Yabal, ka' lee' i Yabal aijo'mo na bansa anu mompotuu' binatang, ka' jojoong i kemah.

²¹ Utus ise'nyo sanggonyo i Yubal, ka' lee' i Yubal anu saja' mahaik musik kasapi ka' puloit.

²² I Zila nohampeakon i Tubal-Kain, ka' lee'nyo mombau ngangahan nu pakakas aijo'mo salaka ka' besak. I Tubal-Kain ko utus ise' boune sanggonyo i Naama.

²³ I Lamekh notataemo hi ua-ua'aha na bengkele'nyo, “I Ada ka' i Zila, potombihing mae na koonyo! Samian na olitau pinateankumo kalana nonjagunmo mae aku.

²⁴ De popitu' na mian pinatean bau pombalosi kalana i Kain pinateanmo, saba' pitumpulu' ka' popitu' na mian na opatei de aku opateimo.”

I Set ka' i Enos

²⁵ I Adam ka' bengkele'nyo nohumpak mule' samian na anak mo' ane. Notatae na i Hawa, “Tumpu Allah nombee'imo mae aku anak mo' ane bau pombolosi i Habel, anu pinateanmo i Kain.” Kalana aijo' sinanggohannyomo na anak aijo' i Set.

²⁶ I Set kino anak mo' ane anu sinanggohannyo i Enos. Mulai tempo' aitu mian nontampu'unimo nonsanggo, sanggo nu Tumpu de monsombahmo.