KAJADIAN 23 - KITAB NU TUMPU ALLA LELE MA'IMAI'

I Sara sinilakamo lantas i Abraham nongolimo tano' bau polamunan

¹ Salatan i Sara umunnyo 127 mo na taun,

² ia sinilakamo i Hebron i tano' nu aha Kana'an. I Abraham nolibosmo hondo ka' lewa'mo nohaangi bengkele'nyo aijo' sinilakamo.

³ Lapas aijo' i Abraham nompala'imo bengkele'nyo sisinila kamo aijo' ka' namba hi to mia-mian nu Het, anu jojoong i lipu' aijo'. Ia notatae,

⁴ “Aku aiya mian anu i salipu'an mae jojoong i totonga' nu belemiu to Utu-utus, pobee' mae na aku mongoli santake na tano' bau polamunanku bengkele'ku.”

⁵ Aha nontaami,

⁶ “Kami mongadati belento Tuan salaku polaya' anu mahoson aiya hi kami, jadi lamunmo na bengkele' nu belento Tuan i uno nu polamunan mami anu ma'ima' hondo. Kami iwi-iwi' mongoa'i sanang hondo na montoukai polamunan bengkele' nu belento Tuan.”

⁷ Lapas aijo' dinumaladupumo na i Abraham i ahop nu aha,

⁸ ka' notatae, “De to Utu-utus sanang da ku lamun na bengkele'ku i aiya, tulungi poitakon mae hi Efron, anak mo'ane i Zohar,

⁹ da nu pobaluk mae hi belengku na Liang Makhpela anu kiijo' i sohipi' nu ale'nyo. Lebe ma'ima' ia mompobaluk tano' aijo' i aiya da osakisi nu to Utu-utus. Olinyo ku saimbaya-bayanmo; da tano' aijo' timbalimo anungku.”

¹⁰ Tempo'nyo aitu i Efron hau-haunyo suha-suhang tiba to mia-mian nu Heto aijo' i tampat kasingkabotan i sabatan daka' nu kota. Lantas sinakisianmo nu mian iwi-iwi' anu daagi' ikiijo', ia nontaami,

¹¹ “Posi bansangku na timbali sakisi, saba' ale' aijo' tibamo liangnyo ku bee'mo da belento Tuan timbalimo molamun bengkele' nu belento Tuan.”

¹² Sahingga i Abraham dinumaladupumo i ahop nu to mia-mian Het haha aijo',

¹³ ka' i hongomo nu mian iwi-iwi' na ia notatae i Efron, “Ku poita da opotombihing mae na aku. Aku kahanda' mongoli songko-songko na ale' kiijo'. Alamo na doinyo, da ku lamunmo na bengkele'ku ikiijo'.”

¹⁴ Tinaaman i Efron,

¹⁵ “Santake na tano' anu olinyo ola pato atu na doi salaka – apaamo ahi' na alati'nyo aijo' hi kita ohua'? Lamunmo na bengkele' nu belento Tuan ikiijo'.”

¹⁶ I Abraham nonsitujuimo olinyo aijo'. Ia nolekengmo doi salaka susumo anu sinanggomo i Efron, na konjoo'nyo, aijo'mo pato atu na doi salaka, pokakana timbangan anu nupakae nu to daga-dagang. Lantas binayannyomo hi Efron, sinakisian nu mian Het iwi-iwi' haha aijo'.

¹⁷ Sumo aijo' na ale' i Efron anu ikiijo' i Makhpela i sasu kabete'an Mamre, tinimbalimo anu i Abraham. Tano' aijo' te ale' tibamo liangnyo ka' iwi-iwi' na to kau-kau' tibamo to kau-kau' anu i potempasannyo.

¹⁸ Tano' aijo' ingakuanmo nu mian Het iwi-iwi' anu tinoka siningkabot i sabatan daka' nu kota aijo' tukoonyo nu aha i Abraham mo na tumpunyo.

¹⁹ Lapas aijo' i lamunmo i Abraham na i Sara bengkele'nyo i uno nu liang Makhpela i tano' nu Kana'an.

²⁰ Sumo aijo' na ale' ka' liangnyo anu momonanyo mian nu Het na tumpunyo, tinimbalimo anu i Abraham da tano' aijo' bau polamunan.