KAJADIAN 11 - KITAB NU TUMPU ALLA LELE MA'IMAI'

Menara i Babel

¹ Momonanyo to bansa-bansa songko-songko i dunia aiya ola sa'angu' na basa' ka' basa' nu aha pokakana.

² Tempo'nyo aha nambamo nolalin i sasu kabete'an, aha tinokamo i sa'angu' na bangka'nyo nu Babilonia, lantas jinojoongmo ikiijo' mae.

³ Aha binasale'mo samian ka' samian, “Imbo' da kita mombau batu tela ka' opapui sampe mokuut.” Sumo aitu na aha binapikin sahingga kino batu telamo da bau laigan ka' ter bau pongkampitnyo.

⁴ Koonyo nu aha, “Imbo' da kita mompotinjo kota tiba sa'angu' na menara anu tuu'nyo toka i langit, da kita talasanggo ka' madi' moga'a-ga'at i songko-songko na dunia.”

⁵ Sahingga nintau'mo mae na Tumpu nontoa kota ka' menara anu pinotinjomo nu manusia.

⁶ Lantas Ia notataemo, “Aha aiya sa'angu' na bansa ka' sa'angu' na basa', ka' aiya sala'je tampu'unan nyo na tanga'an nu aha. Madi'mo pin aha moko alamo mombau maumo pa' apaa na nukahanda'i nu aha.

⁷ Sahanyo Kita mintatau'mo ka' mompotabuntala' basa' nu aha da aha madi'mo mopaha sumbu' sisik samian ka' samian.”

⁸ Sumo aijo' na Tumpu nongga'a-ga'atakon aha namba i songko-songko na dunia. Lantas aha madi'mo nompotinjo kota aijo'.

⁹ Kalana aijo', kota aijo' sinanggohanmo Babel, kalana ikiijo' Tumpu nompotabuntala'mo basa' nu aha iwi-iwi' na basa', ka' lengkat ikiijo' aha gina'a-ga'atakonmo nu Tumpu nobagi-bagimo namba i songko-songko na dunia.

Lee' i Sem

¹⁰ Aiyamo na lee' i Sem. Ohua' na taun salatan ilapasmo na iyaba' daka-daka' salatan i Sem umunnyo 100 mo na taun, ia nohumpakmo samian na anak mo'ane sanggonyo i Arpakhsad.

¹¹ Lapas aijo' ia daagi' tinumuu' 500 na taun, ka' nohumpak mule' to ana-anak sangga'at.

¹² Salatan i Arpakhsad umunnyo 35 mo na taun, ia nohumpakmo anak mo'ane sanggonyo i Selah.

¹³ Lapas aijo' i Arpakhsad daagi' tinumuu' 403 na taun, ka' nohumpak mule' to ana-anak sangga'at.

¹⁴ Salatan i Selah umunnyo 30 mo na taun, ia nohumpakmo anak mo'ane sanggonyo i Eber.

¹⁵ Lapas aijo' i Selah daagi' tinumuu' 403 na taun, ka' nohumpak mule' to ana-anak sangga'at.

¹⁶ Salatan i Eber umunnyo 34 mo na taun, ia nohumpakmo anak mo'ane sanggonyo i Peleg.

¹⁷ Lapas aijo' i Eber daagi' tinumuu' 430 na taun, ka' nohumpak mule' to ana-anak sangga'at.

¹⁸ Salatan i Peleg umunnyo 30 mo na taun, ia nohumpakmo anak mo'ane sanggonyo i Rehu.

¹⁹ Lapas aijo' i Peleg daagi' tinumuu' 209 na taun ka' nohumpak mule' to ana-anak sangga'at.

²⁰ Salatan i Rehu umunnyo 32 mo na taun, ia nohumpakmo anak mo'ane sanggonyo i Serug.

²¹ Lapas aijo' i Rehu daagi' tinumuu' 207 na taun ka' nohumpak mule' to ana-anak sangga'at.

²² Salatan i Serug umunnyo 30 mo na taun, ia nohumpakmo anak mo'ane sanggonyo i Nahor.

²³ Lapas aijo' i Serug daagi' tinumuu' 200 na taun, ka' nohumpak mule' to ana-anak sangga'at.

²⁴ Salatan i Nahor umunnyo 29 mo na taun, ia nohumpakmo anak mo'ane sanggonyo i Terah.

²⁵ Lapas aijo' i Nahor daagi' tinumuu' 119 na taun, ka' nohumpak mule' to ana-anak sangga'at.

²⁶ Salatan i Terah umunnyo 70 mo na taun, ia nohumpakmo aha totolu' na anak mo'ane, aijo'mo i Abram, i nahor ka' i Haran.

Lee' i Terah

²⁷ Aiya mo na lee' i Terah: I Terah tuuma i Abraham, i Nahor ka' i Haran. I Haran kino anak mo'ane sanggonyo i Lot.

²⁸ I Haran sinilaka i kampung kinahampeannyo, aijo'mo Ur, i da'erah Babilonia, tempo'nyo aitu tuumanyo daagi' tutuu'.

²⁹ I Abram no'osoa tiba i Sarai, lantas i Nahor no'osoa tiba i Milka anak boune i Haran. I Haran daagi' ko anak mo'ane sangga'at sanggonyo i Yiska.

³⁰ I Sarai aijo' lengke'.

³¹ I Terah nompala'i kota Ur i da'erah Babilonia hingga-hinggat tiba i Abram anaknyo, i Lot makumpunyo, ka' i Sarai moniannyo boune, aijo'mo bengkele' i Abram. Ia ko kahanda' mamba i lipu' Kanaan. Panyo salatan tinokamo i Haran aha jinojoongmo ikiijo' mae.

³² Ka' i tampatmo aijo' na i Terah sinilaka salatan umunnyo 205 mo na taun.