KAJADIAN 10 - KITAB NU TUMPU ALLA LELE MA'IMAI'

Lee' nu to ana-anak i Nuh

¹ Aiya na lee' nu to ana-anak i Nuh, aijo'mo i Sem, i Ham, ka'i Yafet. Ilapas na iyaba', aha toto-totolu' nohumpakmo to ana-anak mo'ane.

² To ana-anak i Yafet aijo'mo i Gomer, i Magog, i Madai, i Yawan, i Tubal, i Mesekh ka' i Tiras.

³ Lee' i Gomer aijo'mo anu jojoong i Askenas, Rifat ka' Togarma.

⁴ Lee' i Yawan aijo' mo anu jojoong i Elisa, Spanyol, Siprus ka' Rodes.

⁵ Aha mompolee' nu to bansa-bansa anu jojoong i biwi nu ambai ka' i to togo-togong. Aijo'mo iwi-iwi' na lee' i Yafet. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.

⁶ To ana-anak i Ham aijo'mo i Kus, i Mesir, i Libia ka' i Kana'an.

⁷ Lee' i Kus aijo'mo anu jojoong i Seba, Hawila, Sabta, Raema ka' Sabtekha. Lee' i Raema aijo'mo anu jojoong i Seba ka' Dedan.

⁸ I Kus kino anak mo'ane sanggonyo i Nimrod anu momona binaani i dunia aiya.

⁹ Ia tinulunganmo nu Tumpu sahingga tinimbalimo topo bebas anu mahoson. Kalana aitu mian bisa montaloakon, “O amalakon da Tumpu mompotimbali beleyum mian topo bebas anu mahoson sumo i Nimrod.”

¹⁰ Momona kalaja'annyo monsongkohi Babel, Erekh ka' Akad, toto-totolu' aijo' i tano' Babilonia.

¹¹ Lengkat kiijo' mae ia nambamo nokiijo' i Asyur, lantas nompotinjomo kota Niniwe, Rehobot-Ir, Kalah,

¹² ka' Resen anu kiijo' i olot nu Niniwe ka' Kalah. Iwi-iwi' aijo' kaho to kota-kota daka'.

¹³ Lee' i Mesir aijo'mo anu jojoong i Lidia, Anamim, Lehabim, Naftuhim,

¹⁴ Patrusim, Kasluhim, ka' Kaftorim. Bansa Kasluhim aijo'mo na mompolee' mae nu bansa Filistin.

¹⁵ To ana-anak i Kana'an, aijo'mo i Sidon na tumpenyo lantas mule' i Het.

¹⁶ I Kana'an suele mompolee' nu bansa Yebusi, Amori, Girgasi,

¹⁷ mian nu Hewi, Arki, Sini,

¹⁸ Arwadi, Semari ka' Hamati. Tulunan nu bansa Kana'an haha aijo' sinongkomo namba jo'o-jo'on,

¹⁹ sahingga potempasan nu lipu' nu aha ingewamo lengkat i Sidon namba i Selatan lau-laus nokiijo' i Gerar, tinoka-toka koko Gaza, ka' namba sasu i kabete'an lau-laus nokiijo' i Sodom, Gomora, Adma ka' Zeboim, tinoka-toka koko Lasa.

²⁰ Aijo'mo iwi-iwi' na lee' i Ham. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.

²¹ I Sem utus tu'a i Yafet, mompolee' nu aha iwi-iwi' bansa Ibrani.

²² To ana-anak i Sem aijo'mo i Elam, i Asyur, i Arpakhsad, i Lud ka' i Aram.

²³ Lee' i Aram aijo'mo mian anu jojoong i lipu' Us, i Hul, i Geter ka' i Mas.

²⁴ I Arpakhsad tuuma i Selah. Ka' i Selah tuuma i Eber.

²⁵ I Eber kino anak ua'aha na mo'ane; tumpenyo sanggonyo i Peleg, kalana tempo'nyo aitu to bansa-bansa i dunia noga'a-ga'atmo; tuenyo sanggonyo i Yoktan.

²⁶ Lee' i Yoktan aijo'mo mian anu jojoong i lipu' Almodad, i Selef, i Hazar-Mawet ka' i Yerah,

²⁷ i Hadoram, i Uzal, i Dikla,

²⁸ i Obal, i Abimael, i Seba,

²⁹ i Ofir, i Hawila, ka' i Yobab. Iwi-iwi' aijo' lee' i Yoktan.

³⁰ Daerah kajojoongan nu aha ingewamo lengkat mae i Mesa nokiijo' i Sefar, aijo'mo da'erah nu bungkutnyo sasu kabete'an.

³¹ Aijo'mo iwi-iwi' na lee' i Sem. Batu-batu bansa ka' tulunan nu bansa jojoong i posi-posi lipu'nyo ka' ko posi basa'nyo.

³² Iwi-iwi' aijo' lee' i Nuh, bansa toka sa'angu' na bansa ko posi-posi lee' nu aha. Ahamo na nolee'akon to bansa-bansa i dunia aiya noko lapas na iyaba' daka' aijo'.