IMAMAT 26 - KITAB NU TUMPU ALLA LELE MA'IMAI'

Balakat kona hi mian anu tulu-tulutan

¹ Tumpu notataemo, “Boli mombau Bapilogotan kabai mompotinjo patong kabai batu anu o ukin da osombah! Akumo na Tumpu Allah nu belemiu.

² Obau na lameannyo i sinaa nu Sabat ka' i sina-sinaa lamean nu agama sangga'at ka' o adati na tampat anu tinantukanmo bau samata-mata ponsomban Aku. Akumo na Tumpu.

³ De belemiu tumuu' ka' montuluti atulan-Ku haha aiya ka' mule' montuluti palentang-Ku haha aiya.

⁴ Ku tudunakonje mae na ujan toka i tempo'nyo, sahingga ale' ko hasinnyomo ka' kau' mimbua'mo.

⁵ Hasin nu ale' nu belemiu saidi' mae molabi-labimo, sahingga mau tempo'nyomo pontipuan bua' nu anggur, belemiu daagi' mompadak gandum. Ka' de tokamo na tempo'nyo motuganmo gandum, belemiu daagi' montipu bua'nyo nu anggur. Belemiu ko kaanonmo anu sukup ka' kantumuu'an nu belemiu sanangmo i lipu' nu belemiu.

⁶ Aku monjagaije kaamanan nu lipu'miu sahingga belemiu hoyotmo bobogon ka madi'mo ko anu o kabuhuk manmo pa'hihe. To binatang-binatang anu mahangas, Ku hopu'imo ilipu'aijo ka' madi'mo ko anu mahampahe ilipu' nu belemiu.

⁷ Belemiu moko alamo mompatundu' anu monsampobali' belemiu;

⁸ aha olima' na belemiu moko alamo mompatundu' sa'atu na mian, ka' aha sa'atu na mian, belemiu moko mompatundu' sa'atu na madala na mian.

⁹ Ku balakatimo na belemiu, ka' momponjoo'je makumpu nu belemiu. Apaa na anu jinanji'-Kumo hi belemiu tionyo ahi' Ku ganapi.

¹⁰ Isi nu ale' nu belemiu molabi-labimo sahingga sukupmo na anu okaan sataun. Ka' mule' belemiu tantu monsabatakonmo labinyo nu anu pinadak pininmo da tampatnyo ponguna'anmo anu sala'je pinadak.

¹¹ Aku jojoongmo hi belemiu i Kemah-Ku ka' Aku madi'mo mongka'ideki belemiu.

¹² Aku monsangaluimo belemiu; Aku timbalimo Tumpu Allah nu belemiu ka' belemiu timbalimo mian anu pinalesayamo hi beleng-Ku.

¹³ Aku, Tumpu Allah nu belemiu anu nomboamo mae belemiu nosabat lengkat mae i Mesir da belemiu madi'mo daagi' timbali botuan. Kakuasa'an anu nongkabisa'imo belemiu i hopu'an-Kumo ka' belemiu Ku potimbalimo mian anu bebas.”

Hukuman kona hi mian anu madi' tulu-tulutan

¹⁴ Tumpu notataemo, “De belemiu madi' mohongo-hongo Aku ka' madi' mombau anu Ku palentahkon,

¹⁵ de belemiu molanggaimo anu jinanji'-Kumo ka' anu binaung-Kumo hi belemiu ka' madi' mongka'oho' montuluti katantuan ka' to atu-atulan-Ku,

¹⁶ belemiu Ku hukumo. Ku potokamo mae na balaa' hi belemiu, panyakit ka' nusihabimo anu madi'mo opoko ala opakuli'i sahingga mata nu belemiu mapisokmo ka' belemiu tumuu'mo susa'. Belemiu mosu'an sosu'anon panyo madi' mongkaan hasinnyo, kalana anu monsampobali' belemiu toka mae mompatundu' belemiu ka' mongingkotimo apaa na anu sinu'anmo nu belemiu.

¹⁷ Belemiu Ku hukumo, sahingga belemiu nu patundu'imo nu sampobali' nu belemiu ka' nukuasaimo nu to mia-mian anu mongka'ideki belemiu; Belemiu mabuhukmo hondo sahingga belemiu mopalaimo, maumo madi' ko anu mololoi'.

¹⁸ De lapasmo na mongoa'i hukuman aijo' iwi-iwi', belemiu ma'isa ahi' montuluti Aku, hukuman nu belemiu Ku paka tuangimo lipat pimpitun.

¹⁹ Belemiu talalo hondo kobubuun, panyo Ku patundu'mo na belemiu. Ujan madi'mo tudun, sahingga tano' nu belemiu timbalimo mapengges ka' mokutmo sumo besak.

²⁰ Iwi-iwi' na lawe nu belemiu madi'mo ko gunanyo, kalana ale' nu belemiu madi'mo ko hasinnyo ka' sosu'anon nu belemiu madi'mo mimbua'.

²¹ De belemiu tataap panggaga hi beleng-Ku ka' madi'mo montuluti Aku, saba' hukuman nu belemiu Ku paka tuangimo mule' lipat pimpitun.

²² Ku potokamo mae na to bina-binatang anu mahangas atina' hi belemiu. Binatang haha aijo' monsa'umo to ana-anak nu belemiu, mompateimo potuu'on nu belemiu, ka' mohopu'imo belemiu, sahingga konjoo'nyo nu belemiu memo sangkiding hondo ka' to jala-jalan i lipu' nu belemiu liingmo.

²³ De lapasmo na mongoa'i hukuman aijo' iwi-iwi', belemiu madi' ahi' mohongo-hongo Aku, ka' daagi' ahi' sabole-bole panggaga hi beleng-Ku,

²⁴ saba' Ku dokemo na belemiu ka' mohukumo belemiu pimpitun lipat lebemo maboat molingkudui anu uuka mae momona.

²⁵ Ku podaagi'mo na pahampatean atina' hi belemiu da mohukum belemiu kalana belemiu nolanggaimo palajanjian-Ku tiba belemiu. Ka' de belemiu sihukmo i kota nu belemiu kahanda' da madi'mo ko anu mompoposia, Ku podaagi'mo na panyakit anu madi' opoko ala opakuli'i, sahingga belemiu tantu mati ta'alukmo hi anu monsampobali' belemiu.

²⁶ Kaanon nu belemiu saidi' mae mingkotmo, sahingga aha sampulu' na to bou-boune ola sa'angu' na tampat bau pontunuan roti anu daagi' hi aha. Kaanon aijo' ola ogantangi, ka' de belemiu moko kaanmo, belemiu daagi' ahi' mongoa'i mo'ohop.

²⁷ De lapasmo na mongoa'i hukuman aijo' iwi-iwi', belemiu madi' ahi' mohongo-hongo Aku, ka' daagi' ahi' sabole-bole panggaga hi beleng-Ku,

²⁸ saba' pusamo na Aku, Ku dokemo na belemiu ka' Ku hukumo na belemiu pimpitun lipat lebemo maboat molingkudui hukuman anu uuka mae momona.

²⁹ Belemiu madi'mo ko kaanon sahingga belemiu mongkaanmo posi to ana-anak nu belemiu.

³⁰ Ku honsuhimo na tampa-tampat pontalakanian nu belemiu aita' i puge'nyo, ka' mohobo'akonmo mezbah-mezbah nu belemiu, tampat pompapuan kamangian, ka' mombahetakonmo to bangke-bangke' nu belemiu, mokiijo' i bapilogotan nu belemiu anu nohobo'mo aijo'. Kalana nongkahumimi'imo,

³¹ kota-kota' nu belemiu Ku potimbalimo tambulan nu anu i honsuhanmo, tampat pontalakanian nu belemiu pilogot Ku honsuhimo, ka' anu okolobanakon nu belemiu madi'mo Ku talima.

³² Lipu' nu belemiu Ku ideimo ingko-ingkot sahingga sampobali' nu belemiu anu nonjojoongimo kiijo' tolokengkengmo na montoa anu ingideanmo hondo aijo'.

³³ Ku podaagi'mo na pahampatean i lipu' nu belemiu ka' mongga'aga'atakonmo mamba i lipu' nu mian anu i salipu'an. Ale' nu belemiu madi'mo okalaja, ka' kota-kota' nu belemiu opojohokmo me susumo tambulan nu apa-apaa.

^34-35 Tempo'nyo aijo' hau-haunyo belemiu binoa ka' pinojoongmo i lipu' nu sampobali' nu belemiu, ale' nu belemiu anu madi' opobee' nu belemiu da milawe, tempo'nyo belemiu daagi kiijo' mae, madi'mo belemiu nongale'i ka' nohumpakmo kasampatan milawe.

³⁶ Bubuu' belemiu anu kiijo' mae i lipu' sangga'at anu pinomboan ka' pinompojoongan belemiu Ku bauje da aha talalo mabuhuk, sahingga mau ola kiakas nu hon nu kau' anu nupuhi nu mombun okabuhukmo sahingga aha mopalaimo. Belemiu mopalaimo sumomo ko anu nololoi'i unonu pahampatean, lantas tombahangkangmo maumo madi' ko sampobali' nu belemiu koko atina' hi belemiu.

³⁷ Belemiu mopalaimo ka' mompaha dupa-dupa'mo samian ka' samian mau mule' madi' ko anu nololoi'. Ka' belemiu madi'mo moko ala mongewa sampobali' nu belemiu.

³⁸ Belemiu silakamo kiijo' mae i lipu' pinomboan, ka' nupateimo nu lipu' anu monsampobali' belemiu.

³⁹ Sambagian na belemiu anu madi'mo manjoo' ka' anu daagi tumuu' i lipu' nu anu monsampobali' belemiu saja' susa' na kantumuu'an kalana dosa' nu belemiu ka' dosa' nu mompolee' nu belemiu.

⁴⁰ Panyo lee' nu belemiu mongakuije dosa' nu aha ka' dosa' nu mompolee' nu aha anu madi'mo mohongo-hongo Aku ka' noto idekmo beleng-Ku,

⁴¹ sahingga Aku nongalamo kaputusan molaa'mo aha momboamo ka' opojoongmo i lipu' nu anu monsampobali' aha. Ahennyo, de lee' nu belemiu matundu'mo ka' montalimamo hukuman kalana dosa' ka' kalana noto idekmo na aha.

⁴² Ku inau'mo na palajanjian-Ku hi Yakub, hi Ishak ka' hi Abraham. Aku po'ule'mo mongkobu'oui palajanjian-Ku, aijo'mo mombee'i tano' aijo' hi bansang-Ku.

⁴³ Panyo tano' aijo' tionyo ahi' o alini pe'e na miannyo da totu-totu'u milawe pe'e. Ka' mian anu pinalesayamo hi beleng-Ku tionyo ahi' montalima iwi-iwi' na hukuman anu Ku nabu'akon hi aha kalana madi' mongka'oho' montuluti atulan ka' palentang-Ku haha aiya.

⁴⁴ Panyo mau mule' daagi' kiijo' mae i lipu' nu anu monsampobali', aha madi' Ku pojohok kabai Ku silakaimo iwi-iwi'! Kalana de aha Ku silakaimo Aku madi'mo montotu'ui palajanjian-Ku hi aha, padahan Aku aiya Tumpu, Tumpu Allah nu aha.

⁴⁵ Aku mongkobu'ouije palajanjian anu jinanji'-Kumo tiba mompolee' nu aha tempo'nyo Aku nompotoamo kakuasa'an-Ku hi iwi-iwi' na bansa tempo'nyo nomboa mian anu pinalesayamo hi beleng-Ku nosabat lengkat mae i Mesir da Aku, Tumpu, timbalimo Tumpu Allah nu aha.”

⁴⁶ Aijo'mo na to atu-atulan ka' to pale-palentah anu binee'mo nu Tumpu aita' i Bungkutnyo nu Sinai hi Musa da ogunakon hi bansa Israel.