HOSEA 11 - KITAB NU TUMPU ALLA LELE MA'IMAI'

¹ Tumpu notatae, “Aku mongkalibosi Israel daagi' pe'e aha ise-ise', Ilagangku na anak-Ku aijo' nosabat mae lengkat i Mesir.

² Panyo lebe Ku laga na anak-Ku aijo' lebe mule' ahi' majo'on na ia hi beleng-Ku. Ia momboa koloban ka' mompapui kamangian osombahkon hi Baal tiba hi pilogot sangga'at.

³ Padahan Aku na nompotingan Israel ilumajang ka' lewa' nontangkung kalana okalibosi. Aku na sola' nongkalesang ia panyo ia madi' mongka'oho' mongakui.

⁴ Kalana Ku kalibosi Ku po ohani na ia hi beleng-Ku. Iwi-iwi' na kasansala'annyo, Ku polaing. Ka' kalana kanonongan-Ku binee'an-Kumo mongkaan naia.

⁵ Mian nu Israel haha aijo' madi'mo mongka oho' minsusule' mae hi beleng-Ku, kalana aijo' aha tionyo ahi' minsusule'mo mamba i Mesir ka' bansa Asyur na mompalentahje aha.

⁶ Pahampatean mompaka sidamo sampe toka-toka i uno nu kota' nu aha iwi-iwi', Tumban nu sabatan daka' o ideimo ka' mian-Ku anu palesayamo ohopu'imo. Aijo' jadimo saidi' mae kalana aha nosi baumo posi pongka oho' nu aha,

⁷ ka' madi'mo hondo mohongo Aku. Sahingga aha lewa'mo opalentah, madi' ko anu moko ala mompobebas aha mau ahi' aha moloboo' momoita tulung.”

⁸ Tumpu notatae, “O Israel te toho' mule' ahi' belemiu Ku pojohok kabai Ku pala'i. Te toho' mule' ahi' belemiu Ku hopu'i susumo Adma? Kabai pa' Ku baumo susumo Zeboim? Madi' sanang na kinyonyoang-Ku mombau han aijo' kalana liibos-Ku talalo hondo daka-daka' hi beleyum!

⁹ Maumo ahi' Aku motambuha' panyo beleyum madi' Ku hukum, beleyum madi'mo daagi Ku hansuni. Saba' Aku Tumpu Allah misa' manusia. Aku Anu Susi' saja' monsangalui beleyum ka' madi'mo daagi montambuha'i beleyum.”

¹⁰ Tumpu notatae, “Mian-Ku anu palesayamo mombatukimo Aku de Aku molohu'mo susumo singa ka' mompopobuhukmo sampobali' nu aha. Mian-Ku anu palesayamo sampamo mae toka lengkat isasu kabete'an da monsombahmo Aku.

¹¹ Lengkat mae i Mesir aha tokamo mae ko lia'nyo sumomo ahi' tomonsi', ka' lengkat mae i Asyur sumomo ahi' sampahas na malapati'. Lantas aha Ku boamo minsusule' i laigan nu aha. Akumo na Tumpu anu notataemo.”