GALATIA 6 - KITAB NU TUMPU ALLA LELE MA'IMAI'

Mompaha tulu-tulungi

¹ To Utu-utus! De daagi' ko samian o humpak mombau dosa', sahanyo komiu anu tumuu' mombatuki Roh nu Tumpu mompotiju' mian aijo' minsusule' i jalan anu totu'u. Panyo komiu mompotiju' aijo' boli kopesa-pesa ka' jaga da boli sampe posi komiu tagoda mule'.

² Tionyo ahi' komiu mompaha tulu-tulungi kasusa'an nu mian, da tiba jalan anu sumo aijo' komiu montulutimo palentah i Kristus.

³ De daagi' ko samian monsangka butongnyo talasanggo padahan madi', mian aijo' mombaleko'imo posi butongnyo.

⁴ Batu-batu mian mosi palesa ahi' butongnyo pa' kalakuannyo ma'ima' kabai madi'. De ma'ima', ia timbali mongoa'i sanang i han aijo'. Panyo madi' timbali ia mompokakanakon tiba apaa na anu nubau nu mian sangga'at.

⁵ Kalana toto samian nu posi tanggung ahi' na ulusannyo.

⁶ Mian anu nontalimamo pangajalan i Kristus, tionyo ahi' mobagi hi gulu'nyo apaa na anu ma'ima' iwi-iwi', anu daagi'mo hi ia.

⁷ Boli tagoda ihan anu madi' ma'ima'. Tumpu madi' timbali opahaikakon! Apaa na anu sinu'anmo, aijo'mo na anu o ala na bua'nyo.

⁸ De mian monsu'an mombatuki sipat nu manusia, ia mohumpakje kapatean i sipatnyo aijo'. Panyo de ia monsu'an mombatuki pompotiju' nu Roh nu Tumpu, ia mohumpakje kantumuu'an kopian ka' sampe toka sidu-sidutu' lengkat mae hi Roh nu Tumpu Allah.

⁹ Kalana aijo', boli kita ma'osa na mombau hahan anu ma'ima', kalana de kita madi' belenti, na mombau hahan aijo', kita mohumpakje hasinnyo.

¹⁰ Jadi' de daagi' ko tempo' hi kita, tionyo ahi' kita mombau anu ma'ima' hi iwi-iwi' na mian, anu talalo hondo, toka hi to Utu-utusto sangko mian anu pinalesayamo totu-totu'u.

Pokinde' ka' salan do'a

¹¹ Palahatikan ima-ima' na han aiya anu tinuliskumo nu hulup anu toto daka-daka'.

¹² To mia-mian anu mongka'oho' mosi puji' butongnyo i hahan nu dunia, ahamo na mompagala mompakisa komiu da mombatuki atulan nu sunat. Panyo aha mombau sumo aijo' ola da aha madi' osakisa nu mian Yahudi kalana salib i Kristus.

¹³ Mau mule' to mia-mian anu nombatukimo atulan nu sunat, madi' ahi' mompojalan atulan nu agama. Panyo aha mongkahanda'i da komiu o sunatmo, da aha timbali mombuulakon, kalana komiu nontulutimo atulan aijo'.

¹⁴ Panyo aku totu-totu'u madi' hondo mongka'oho' mombuulakon apa-apaa, sambiha'nyo Tumpunto i Yesus Kristus anu sinilakamo sinalib. Kalana Ia sinilakamo sinalib, sahingga dunia madi'mo daagi' ko alati'nyo apa-apaa hi belengku. Ka' mongkona dunia aiya, aku suele sumo anu sinilakamo.

¹⁵ Sinunat kabai madi' sinunat, aijo' madi' palalu. Anu palalu aijo'mo timbali manusia bu'ou.

¹⁶ Kona hi to mia-mian anu tumuu' sipatnyo sumo aitu, ka' sumo aitu mule' kona hi iwi-iwi' mian anu palesayamo hi Tumpu Allah, kutaha'imani Tumpu mombee'ije ka'ima'an ka' balakat-Nyo.

¹⁷ Ka' mule' bolimo ko samian pe'e na po'ule' monsusa'i aku, kalana i butongku daagi'mo kinotopia-piangkuka na ko bukuti'nyo na aku nombatukimo i Yesus.

¹⁸ O amalakon da Tumpunto i Yesus Kristus saja' mombalakati to Utu-utus. Amin. Tabea' mami, I Paulus 17