GALATIA 1 - KITAB NU TUMPU ALLA LELE MA'IMAI'

^1-3 To Utu-utus jama-jama'at i da'erah Galatia, Aku, i Paulus, ka' iwi-iwi' moto utus Kristen anu tiba aku, montaha'imani ka' o amalakon da Tumpu Tuumanto ka' Tumpu Yesus Kristus mombee'i balakat ka'ima'an hi komiu. Aku tinimbali rasul misa' ola pongka'oho' nu manusia kabai kalana i hangkat nu manusia, panyo i Yesus Kristus ka' Tumpu Allah Tuumanto anu nompo'ule'mo nompotumuu' Ia sinilaka.

⁴ Mohongo-hongo pongka'oho' nu Tumpu Tuumanto, i Kristus nombee'mo butong-Nyo kinolobanakon pinontokong to dosa-dosa'to, da kita nu posalamat i tempo' anu ma'idek aiya.

⁵ Puji' na Tumpu sampe toka sidu-sidutu'! Amin.

Sa'a-sa'angu'nyo na Lele Ma'ima'

⁶ Bangang na aku i han nu to Utu-utus! Komiu ilagamo nu Tumpu Allah, kalana balakat i Kristus, panyo uuka komiu talalo malia' mohiku Tumpu ka' mombatuki “lele ma'ima'” anu sangalasan, anu madi' pokakana Lele Ma'ima' anu lengkat mae hi Tumpu.

⁷ Sabenannyo madi'mo ko “lele ma'ima' anu sangga'at”. Ola ahi' daagi' ko to mia-mian anu mompolele hi komiu “lele ma'ima'” mongkona i Kristus anu nugeo-geo'akon nu aha sahingga mompobimbangmo komiu.

⁸ Mian anu mompolele “lele ma'ima'” anu sangalasan, anu madi' pokakana Lele Ma'ima' anu pinolelemo mami, pojohok da ia nu hukum nu Tumpu – mau pe'e mian aijo' kami, kabai malaikat lengkat mae i suluga'!

⁹ Kami nontaeakonmo u'utu mae, uuka po'ule'mo kutaeakon daagi' minsan: Mian anu mompolele hi komiu “lele ma'ima'” anu sangalasan anu madi' pokakana Lele Ma'ima' anu tinalimamo miu lengkat hi kami, mian aijo' lebe ma'ima' nu hukum nu Tumpu!

¹⁰ Pa' tiba jalan aijo' aku otoa so'o-so'omo montaha'imani da nu puji' nu manusia? Totu-totu'unyo i madi'! Aku ola ahi' montaha'imani anu ingakuanmo nu Tumpu. Pa' ko anumo binaungku da bau pongala kinyonyoa nu manusia da nu kanonongi nu mian? De aku daagi' mombau sumo aitu, aku misa'mo posaihon i Kristus.

Mosia na i Paulus tinimbali rasul

¹¹ To Utu-utus tionyo monsumbu' saba' Lele Ma'ima' anu pinolelengku aijo' misa' nolengkat hi manusia.

¹² Aku madi' nontalima lele aijo' lengkat hi manusia, ka' madi' ko samian pe'e na nongajanakon hi belengku. Posi i Yesus Kristus na nontaloakon isinyo nu Lele Ma'ima' aijo' hi belengku.

¹³ Tantu komiu nohongomo mongkona kantumuu'anku u'utu mae salaku mian anu montoongi agama Yahudi. Komiu nonsumbu'mo mosia na kosigonyo na aku nongkabisa'i jama'at nu Tumpu ka' mosia na kobaaninyo na aku nompagala nombahangusa'i aha.

¹⁴ I uno nu han mompojalan agama Yahudi manjoo' na mian nu Yahudi anu pokakana na umun tiba aku, aku na lebe monsumbu'. Ku palahatikan hondo na hahan mongkona to ada-adat nu mompolee' mami.

¹⁵ Panyo kalana ka'ima'an nu kinyonyoa nu Tumpu, Ia nompile'imo aku ma'isa pe'e i hampe ka' nolagamo aku da mompojalan anu Nu palentahkon.

¹⁶ Tumpu nomponyata'mo Anak-Nyo hi belengku, da Lele Ma'ima' mongkona Anak-Nyo timbali ku polele hi to mia-mian anu misa' Yahudi. Tempo'nyo aitu aku madi' namba hi samian pe'e momoita da opokinde'i mae.

¹⁷ Aku madi' mule' namba hi to mia-mian i Yerusalem anu tinongkohimoonamo tinimbali rasul. Panyo aku inamba i lipu' nu Arab, ka' lengkat mae i kiijo' po'ule' mule' ninsusule' mae i Damsyik.

¹⁸ Lapas aitu tinotolu' na taun, aku namba i Yerusalem da mompahasumbu' tiba i Petrus. Aku jinojoong tiba ia ola sinampulu'an ka' ingiliman na sinaa na kopinnyo.

¹⁹ Aku madi' nompahakabot tiba to rasul-rasul sangga'at ola samata-mata i Yakobus, utus nu Tumpu.

²⁰ Apaa na anu tinuliskumo aiya totu'u. Tumpu na monsumbu' saba' aku aiya madi' ahi' baleko'!

²¹ Lapas aitu aku nambamo nokiijo' i to da'e-da'erah i Siria ka' i Kilikia.

²² Sampe tempo'nyo aitu to jama-jama'at Kristen i Yudea ma'isa nonsumbu' pa' ihe na aku.

²³ Aha ola nohongomo mian notatae, “Mian anu u'utu mae nonsakisamo kami, uuka nombebakonmo kapalesaya'an anu u'utu mae ka'oho'mo nu hopu'i.”

²⁴ Sahingga aha nompuji'mo Tumpu kalana aku.