EFESUS 5 - KITAB NU TUMPU ALLA LELE MA'IMAI'

Tumuu' i uno nu jingka

¹ Komiu to ana-anak nu Tumpu anu nu Nukalibosi, mokonyo aijo' komiu tionyo bala usaha mombatuki sonto' nu Tumpu.

² Kantumuu'anum maunyo ahi' okinyonyoai nu kalibosan susumo pongkalibosi i Kristus kita. Ia nongkulubanakonmo butong-Nyo kalana kita, salaku palasombahan anu manohong ka' momposanang kinyonyoa nu Tumpu.

³ Komiu te mian anu palesayamo hi Tumpu. Mokonyo aijo' han masala' ka' anu ma'idek ka' madi' mingkona, kabai mule' mangoa anu madi' pantas hi komiu. Boli sampe mian sangga'at ko pikilan montaloakon tukoonyo komiu mombau hahan anu sumo aijo'.

⁴ Madi' mule' pantas hi komiu montaloakon potatae anu mahenyu, anu masala' ka' anu madi' mingkona. Ola ahi' komiu maunyo montalima kase hi Tumpu.

⁵ Palahatikan ima-ima': mian anu ko gau' masala' kabai anu madi' mingkona, kabai mangoa, (kalakuan sumo aijo' sumomo monsombah pilogot), mian aijo' madi' timbali minsoop mian anu palesayamo, anu nu palentah i Kristus ka' Tumpu.

⁶ Boli komiu nu akali nu to sisi-sisik anu madi' mimbatu. Kalana anu hahan aijo'mo na monsaduakon Tumpu montambuha'i to mia-mian anu madi' tulu-tulutan hi Ia.

⁷ Jadi, boli hondo-hondo mosangalu tiba to mia-mian anu susumo aijo'.

⁸ Komiu pe'e naipuan mae daagi' i uno nu pintung. Uuka komiu tinimbalimo mian anu palesayamo hi Tumpu, jadi komiu i unomo nu jingka. Mokonyo aijo' komiu tumuu'mo ahi' i uno nu jingka.

⁹ Kalana lengkat i jingka aijo' na kalubatan nu ngangahan na bauon anu ma'ima', adin ka' hodi' i pontoan nu Tumpu.

¹⁰ O usahakon da monsumbu' apaa na anu momposanang kinyonyoa nu Tumpu.

¹¹ Boli mombau bauon anu madi' mingguna, anu nu nubau nu to mia-mian anu tumuu' i uno nu pintung. Ola ahi' maunyo opotalang miu na hahan anu sumo aijo'. (

¹² Kalana hahan anu nu nubau nu aha opohowini aijo', mau pe'e ola mombisalakon mongambangimo.)

¹³ Iwi-iwi' anu jiningkanmo nu jingka, manasamo na otoa.

¹⁴ Kalana iwi-iwi' anu manasamo na otoa, aijo' majingka. Mokonyo aijo' tinaloakonmo, “Hee pobulamo na beleyum anu hoyot, ka' anu sinilakamo, po'ule'mo tumuu'! I Kristus monjingkaimo beleyum.”

¹⁵ Mokonyo aijo', opokopiani ima-ima' na gau' nu kantumuu'an miu. Boli tumuu' sumo to mia-mian ponga'; tumuu'mo sumo to mia-mian anu pande.

¹⁶ Pake ima-ima' na kasampatan anu daagi' hi beleyum, kalana tempo' uuka tempo'mo anu ma'idek.

¹⁷ Boli ponga', panyo oselidiki apaa na anu nukahanda'i nu Tumpu.

¹⁸ Boli komiu malangu nu anggur, kalana aijo' mongidei komiu. Ola ahi' maunyo komiu nukuasai nu Roh nu Tumpu.

¹⁹ Opake na potatae nu Mazmur, nyanyian pompuji-puji' ka' elok nu nyanyian rohani, i uno nu beleyum ko basi-basisik. Maunyo ahi' komiu mingkinyonyoa lame' na manyanyi mompuji' Tumpu.

²⁰ Mau mule' pa' apaa tionyo komiu saja' montalima kase hi Tumpu Tuuma i uno nu sanggo i Yesus Kristus Tumpunto.

Langkai' ka' bengkele'

²¹ Bau pongadati i Kristus, maunyo ahi' komiu mompaha hongo-hongo samian ka' samian.

²² Bengkele', pohongo-hongo hi langkai'um, sumo hi Tumpu.

²³ Kalana langkai' mongkapalai bengkele'nyo, pokakana sumo i Kristus suele mongkapalai jama'at, ka' ia mule' Tomundo anu Momposalamat jama'at anu tinimbalimo butongnyo.

²⁴ Pokakana sumo jama'at suele mohongo-hongo i Kristus, sumo aitu mule' i uno nu iwi-iwi' na han bengkele' tionyo mohongo-hongo langkai'nyo.

²⁵ Langkai', kalibosi na bengkele'um, pokakana sumo i Kristus mongkalibosi jama'at, ka' nongkulubanakonmo butong-Nyo kalana jama'at aijo'.

²⁶ I Kristus nombau sumo aijo' da Ia timbali mompobelesi' jama'at aijo', nu pangajalan-Nyo, ka' aijo' tinanda'anmo nu uee palamandian, da lapas aijo' timbalimo Nu potalima hi Tumpu.

²⁷ Tiba jalan anu sumo aijo' i Kristus mompotinjomo jama'at aijo' talasanggo ka' Susi' i ahop-Nyo, madi' ko ideknyo kabai anu kulang mau mule' apaa.

²⁸ Sumo aitumo na langkai' tionyo mongkalibosi bengkele'nyo, sumo ia mongkalibosi posi butongnyo. Mian anu mongkalibosi bengkele'nyo alati'nyo ia mongkalibosi butongnyo. (

²⁹ Madi' toho' ko mian anu mongka'ideki posi butongnyo. Ola ahi' ia mompalakai ka' monjagai sumo i Kristus singkona mompalakai jama'at-Nyo.

³⁰ Osumbu'to na aijo', kalana kita tinonsoopmo i butong i Kristus.)

³¹ I uno nu Kitab nu Tumpu tinulismo, “Mokonyo aijo' samian na mo'ane maunyo ahi' mompala'i tuuma tinanyo da mosa'angu' tiba bengkele'nyo, ka' ua-ua'aha tinimbalimo sa'a-sa'angu'.”

³² Ayat nu kitab anu sinanggo aijo' maleeng na alati'nyo. Ka' aijo' kupogoma' tiba pompaha sumbu'an i Kristus tiba jama'at.

³³ Panyo ayat nu kitab anu sinanggo aijo' daagi' suele ko tuusanannyo tiba komiu: Maunyo ahi' batu-batu langkai' mongkalibosi bengkele'nyo, sumo ia mongkalibosi posi butongnyo, ka' maunyo ahi' batu-batu bengkele' ko'usaha ahi' mongadati langkai'nyo.